NI Guy Hollis Pierce, a miembro ti Bagi a Manarawidwid dagiti Saksi ni Jehova, ket nalpas ti naindagaan a biagna idi Martes, Marso 18, 2014. Agtawen iti 79 idi natungpal ti namnamana a mapagungar kas maysa kadagiti kakabsat ni Kristo.—Heb. 2:10-12; 1 Ped. 3:18.

Nayanak ni Guy Pierce idiay Auburn, California, U.S.A., idi Nobiembre 6, 1934, ken nabautisaran idi 1955. Nagkasarda iti dungdungnguenna a ni Penny idi 1977 ken naaddaanda iti annak. Ti kapadasanna kas ama ket nakatulong iti panagbalinna a nadungngo. Nagbalinda a payunir ken Penny idi 1982, ket idi 1986 nangrugi ti 11 a tawen a panagserbina kas manangaywan iti sirkito iti Estados Unidos.

Idi 1997, nangrugi da Guy ken Penny Pierce nga agserbi kas miembro ti pamilia ti Bethel iti Estados Unidos. Nagserbi ni Brother Pierce iti Service Department, ket idi 1998 nadutokan kas katulongan ti Personnel Committee ti Bagi a Manarawidwid. Naipakaammo ti pannakadutok ni Brother Pierce kas miembro ti Bagi a Manarawidwid idi Oktubre 2, 1999 iti tinawen a miting ti Watch Tower Bible and Tract Society of Pennsylvania. Iti napalabas a tawtawen, nakipagtrabaho iti Personnel, Writing, Publishing, ken Coordinators’ committee.

Asideg ti rikna dagiti tattao ken Brother Pierce uray nadumaduma ti nalikudan ken kulturada gapu ta naisem ken managpakatawa. Ngem ti nangnangruna a magusgustuanda kenkuana ket ti ayatna, kinapakumbabana, panagraemna kadagiti nalinteg a pagalagadan ken prinsipio, ken ti naan-anay a pammatina ken Jehova. Para ken Guy Pierce, mabalin a saan a sumingising ti init ngem kanayon a matungpal ti kari ni Jehova, ket kayatna nga ipakaammo dayta a kinapudno iti amin a tattao.

Nakagaggaget ni Brother Pierce iti panagserbina ken Jehova. Bumangon a nasapa iti bigat ken masansan a naladawen iti rabii no sumardeng nga agtrabaho. Nakadanon iti nadumaduma a paset ti lubong a mangparparegta kadagiti kakabsat. Iwayaanna met ti makilangen kadagiti miembro ti pamilia ti Bethel ken iti dadduma pay nga agpabalakad ken agpatulong kenkuana. Uray no adun a tawen ti napalabas, malaglagip latta dagiti kakabsat ti kinamanagpadagus, kinadungngo, ken Nainkasuratan a pammaregtana.

Ti kabsattayo ken patpatgentayo a gayyem napanawanna ti asawana ken ti innem nga annakda, kasta met dagiti appoko ken appokona iti tumeng. Nakaad-adu met ti nagbalin a naespirituan nga annakna. Ni Mark Sanderson, a miembro ti Bagi a Manarawidwid, ti nangipaay iti palawag ti pumpon ni Brother Pierce iti Bethel iti Brooklyn idi Sabado, Marso 22, 2014. Maysa kadagiti dinakamatna ket ti nailangitan a namnama ni Brother Pierce ken binasana ti kinuna ni Jesus: “Idiay balay ni Amak adu ti pagyanan. . . . No mapanak ket mangisaganaak iti lugar a maipaay kadakayo, umayak manen ket awatenkayto nga ikuyog kaniak, tapno no sadino ti ayanko addakayo met koma. Ket no sadino ti papanak ammoyo ti dalan.”—Juan 14:2-4.

Pudno a ditayto pulos malipatan ni Brother Pierce. Ngem maragsakantayo ta ‘ammona ti dalan’ nga agturong iti permanente a ‘pagyananna.’