1-3. Kasano a napabileg ti panagtalek ni Pablo ken Jehova? (Kitaen ti ladawan iti rugi ti artikulo.)

NAPEGGAD ti kasasaad dagiti Kristiano idiay Roma idi umuna a siglo. Nakaro ti pannakagurada ta napabasolda a nangpuor iti dayta a siudad idi 64 C.E. ken kagurgurada kano dagiti tattao. No maysaka a Kristiano idi a tiempo, mabalin nga inaldaw a madandanaganka ta posible a maaresto ken maparparigatka. Dadduma a padam a Kristiano ket mabalin a rinangrangkayen dagiti animal wenno nailansadan iti kayo sa napuoranda a sibibiag kas silaw iti rabii.

² Kastoy idi ti kasasaad iti maikadua a pannakaibalud ni apostol Pablo idiay Roma. Adda ngata Kristiano a tumulong kenkuana? Mabalin a madanagan ni Pablo idi damo ta insuratna ken Timoteo: “Iti immuna a depensak awan ti dimmasig kaniak, no di ket isuda amin binaybay-andak—saan koma a maisingir dayta kadakuada.” Ngem imbaga ni Pablo a saan met a naan-anay a nabaybay-an. Insuratna: “Ngem ti Apo nagtakder iti sibayko ket nangipastrek kaniak iti pannakabalin.” Wen, impaay ni Apo Jesus ti bileg a kasapulan ni Pablo. Ania ti naitulong dayta? Kinunana:  “Naispalak iti ngiwat ti leon.”—2 Tim. 4:16, 17. *

³ Napabileg la ketdi ni Pablo iti pananglagipna iti dayta a kapadasanna, ket nagtalek a pabilgen ni Jehova a mangibtur kadagiti rigat a sagsagabaenna ken iti aniaman a suot a mapasaranna. Kinapudnona, intuloyna a kinuna: “Ti Apo ispalennakto iti tunggal nadangkes nga aramid.” (2 Tim. 4:18) Wen, nasursuro ni Pablo nga uray limitado ti tulong a maipaay ti tao, makapagtalek a tulongan ni Jehova ken ti Anakna!

4, 5. (a) Siasino ti kanayon a makaipaay iti kasapulam a tulong? (b) Kasanom a mapatibker ti relasionmo ken Jehova?

⁴ No dadduma, mariknam kadi nga agmaymaysaka a mangsangsango iti maysa a narigat a kasasaad—nalabit kaawan ti trabaho, parikut iti eskuelaan, panagsakit, wenno sabali pay a narigat a situasion? Nalabit nagkiddawka iti tulong iti sabsabali, ngem napaayka ta saanda a naited ti kasapulam. Wen, adda dagiti parikut a saan a kabaelan a risuten ti tao. Ania ti aramidem iti kasta a kasasaad? Balakadannatayo ti Biblia nga ‘agtalektayo ken Jehova.’ (Prov. 3:5, 6) Ngem manamnamam kadi ti tulongna? Wen! Adu a salaysay iti Biblia ti mangpaneknek a tultulongan ni Jehova dagiti adipenna.

⁵ Saan koma ngarud nga agsakit ti nakemmo no saan a maipaay ti tao ti tulong a kasapulam. Imbes ketdi, kas ken Pablo, ibilangmo dagita a situasion kas gundaway a naan-anay nga agpannurayka ken Jehova ken makitam ti naayat a pannakaseknanna. Daytoy ti ad-adda a mangpatibker iti relasion ken panagtalekmo kenkuana.

6. Apay a mabalin a saan a nalaka ti agtalek ken Jehova no adda nadagsen a problemam?

⁶ Mabalinmo kadi nga ikararag ken Jehova ti nadagsen a problemam sa kalpasanna dimon pakariribukan, ta ammom nga inaramidmon ti amin a kabaelam ken agtalekka a tulongannaka? Wen, mabalin! (Basaen ti Salmo 62:8; 1 Pedro 5:7.) Masapul a sursuruem ti agtalek ken Jehova tapno maaddaanka iti nasayaat a relasion kenkuana. Ngem saan a kanayon a nalaka dayta. Apay? Ti maysa a makagapu ket mabalin a saan a kanayon a sungbatan a dagus ni Jehova ti kararagmo.—Sal. 13:1, 2; 74:10; 89:46; 90:13; Hab. 1:2.

7. Apay a saan a kanayon a sungbatan a dagus ni Jehova dagiti kararagtayo?

⁷ Apay a saan a sungbatan a dagus ni Jehova ti tunggal kiddawtayo? Laglagipentayo a ti relasiontayo kenkuana ket inyarigna iti relasion ti agama. (Sal. 103:13) Saan a mainanama ti anak a patgan ti amana ti amin a kiddawna wenno ipaayna a dagus dagita. Ammo ti ama nga adda kayat ti ubing ita a saannan a kayat inton madamdama. Ammona met ti kasayaatan para iti anakna, ken no ania ti mabalin nga epekto dayta iti sabsabali. Adda met dagiti kiddaw ti anakna a dina pay rumbeng a patgan. No dagus nga ited ti ama ti amin a kiddawen ti anakna, agbalinen ti ama kas adipen ket ti anakna isun ti apo. Umasping iti dayta, ay-ayatennatayo met ni Jehova. Kas masirib a Namarsua, naayat nga Apo, ken nailangitan nga Amatayo, ammona ti kasapulantayo ken no kaano ti kasayaatan a panangsungbatna kadagiti kararagtayo. No dagus a patganna ti amin a kiddawtayo, agsinnukat no kuan ti akemtayo.—Idilig ti Isaias 29:16; 45:9.

8. Ania ti ikarkari ni Jehova no maipapan kadagiti limitasiontayo?

⁸ Ti sabali pay a makagapu ket naan-anay  nga ammo ni Jehova dagiti limitasiontayo. (Sal. 103:14) Saanna ngarud a namnamaen a makapagibturtayo iti bukodtayo a pigsa no di ket ipaayannatayo iti tulong a kasapulantayo. Siempre, mabalin a mariknatayo no dadduma a kasla saantayon a kabaelan ti agibtur. Ngem ipasigurado kadatayo ni Jehova a saannanto a pulos ipalubos nga agsagaba dagiti adipenna iti labes ti kabaelanda. Wen, mangaramidto iti “dalan a pagruaran.” (Basaen ti 1 Corinto 10:13.) Gapuna, makaliwliwa a maammuan nga ammo ni Jehova ti kabaelantayo nga ibturan.

9. Ania ti rumbeng nga aramidentayo no saan a dagus a masungbatan ti kiddawtayo?

⁹ No saan a dagus a sungbatan ni Jehova ti kiddawtayo, agan-anustayo koma. Laglagipentayo a magagaran unay a tumulong kadatayo, ngem agan-anus met ken agur-uray iti kasayaatan a tiempo a panangsungbatna iti kiddawtayo. “Ni Jehova mangin-inanamanto a maipaayannakayo iti parabur, ket ngarud isu tumakderto tapno ipakitaannakayo iti asi. Ta ni Jehova maysa a Dios ti panangukom. Naragsak amin dagidiay mangin-inanama kenkuana.”—Isa. 30:18.

10-12. (a) Aniada a kasasaad ti nalabit mangparigat iti panangaywan ti maysa a Kristiano iti masaksakit a miembro ti pamiliana? (b) No agtalekka ken Jehova iti narigat a kasasaad, ania ti epekto dayta iti relasionmo kenkuana? Mangted iti pagarigan.

¹⁰ No addaka iti nakarigrigat a kasasaad, mabalin a mariknam ti kas iti narikna ni Pablo—nga arigna addaka iti “ngiwat ti leon.” Kadagitoy a gundaway, kasla narigat ti agtalek ken Jehova, ngem dayta ti kapatgan nga aramidem. Kas pagarigan, mabalin nga agay-aywanka iti maysa a miembro ti pamiliam nga agsagsagaba iti nakaro a sakit. Nalabit nga inkararagmon a maaddaanka koma iti sirib ken bileg. * Gapu ta inaramidmon ti amin a kabaelam, saan kadi a makapabang-ar a maammuan a kitkitaennaka ni Jehova ken ipaayna ti kasapulam tapno makapagibturka?—Sal. 32:8.

¹¹ Ngem baka adda dagiti kasasaad a kasla saanmo a marikna ti tulong ni Jehova. Mabalin nga agduduma ti opinion dagiti doktor. Wenno dagiti kabagiam a namnamaem a mangsuporta kenka ket isuda met ti ad-adda a mangparigat iti situasionmo. Itultuloymo ti mangnamnama nga ipaayannaka ni Jehova iti pigsa. Itultuloymo ti umadani kenkuana. (Basaen ti 1 Samuel 30:3, 6.) Bayat a makitkitam a tultulongannaka ni Jehova, ad-adda a tumibker ti relasionmo kenkuana.

¹² Nabigbig ni Linda * a pudno daytoy kalpasan ti sumagmamano a tawen a panangaywanna kadagiti masaksakit a nagannakna sakbay ti ipapatayda. “Saanmi idi nga ammo ken lakayko ken ti adingko a lalaki no ania ti aramidenmi. No dadduma, kasla kayatmin ti sumuko. Ngem no lagipenmi ti napalabas, makitami a talaga a sinaranaynakami ni Jehova. Pinabilegnakami ken impaayna ti mismo a tulong a kasapulanmi, uray no kasla awan idin ti mapanunotmi a remedio.”

13. Kasano a ti panagtalek ken Jehova natulonganna ti maysa a sister a mangdaer iti agsasaruno a trahedia iti biagna?

¹³ Makatulong met kadatayo ti naan-anay a panagtalek ken Jehova no maipasangotayo iti agsasaruno a trahedia. Usigentayo ti kapadasan ni Rhonda. Madama nga ipilpila ti saan a Saksi a lakayna ti panagdiborsioda idi nadayagnos nga adda lupus (maysa a makapapatay a sakit) ti adingna a lalaki. Sumagmamano  laeng a bulan kalpasanna, natay ti asawa ni adingna. Idi mailiwliwagen ni Rhonda dagitoy a nasaem a kapadasanna, nangrugi nga ag-regular pioneer. Di nagbayag, natay met ni nanangna. Kasano a nadaeran ni Rhonda dagitoy a trahedia? Kinunana: “Inaldaw a makisaritaak ken Jehova, nga ibagak uray dagiti babassit a desision nga aramidek. Gapu iti dayta, nagbalin a napaypayso kaniak ni Jehova. Nasursurok ti agpannuray kenkuana imbes nga iti bagik wenno iti sabali a tao. Ket agpayso a tinulongannak—impaayna ti amin a kasapulak. Kas resultana, nariknak nga adda ni Jehova iti sibayko.”

14. Ania ti mainanama ti maysa a matalek a Kristiano nga adda nailaksid a miembro ti pamiliana?

¹⁴ Usigentayo ti sabali pay a situasion. Ipapanmon a nailaksid ti maysa a miembro ti pamiliam. Ammom ti ibagbaga ti Biblia a rumbeng a panangtrato kadagiti nailaksid. (1 Cor. 5:11; 2 Juan 10) Ngem no dadduma, mabalin a kasla nakarigrigat wenno imposible pay ketdi ti panagtulnog iti dayta a bilin ti Biblia. * Makapagtalekka kadi iti nailangitan nga Amatayo nga ipaayna ti kasapulam a bileg tapno masurotmo ti bilin ti Biblia a di makilangen kadagiti nailaksid? Ibilangmo kadi daytoy a situasion kas gundaway a mapatibkermo ti relasionmo ken Jehova?

15. Apay a sinukir ni Adan ti bilin ni Jehova?

¹⁵ Mainaig iti daytoy, usigentayo ti kasasaad ti umuna a tao a ni Adan. Pinanunotna kadi a mabalinna ti agsukir ken Jehova sa agtultuloy nga agbiag? Saan, ta ibaga kadatayo ti Biblia a “saan a naallilaw” ni Adan. (1 Tim. 2:14) Apay ngarud a  nagsukir? Kinnan ni Adan ti bunga nga inyawat ni Eva gapu ta ad-adda nga ay-ayatenna ti asawana ngem ti Dios. Dimngeg iti asawana imbes nga iti Diosna, ni Jehova.—Gen. 3:6, 17.

16. Siasino koma ti kangrunaan nga ayatentayo, ken apay?

¹⁶ Ibagbaga kadi daytoy a saantay a rumbeng a maaddaan iti nasged nga ayat kadagiti kabagiantayo? Siempre saan! Ngem ti kangrunaan koma nga ayatentayo ket ni Jehova. (Basaen ti Mateo 22:37, 38.) Kinapudnona, pagsayaatan dayta dagiti kabagiantayo, agserserbida man ken Jehova wenno saan. Isu nga itultuloymo a pabilgen ti ayat ken panagtalekmo ken Jehova. Ket no pakaburiboram ti maipapan iti nailaksid a kabagiam, iyebkasmo ti riknam ken Jehova iti kararag. * (Roma 12:12; Fil. 4:6, 7) Usarem daytoy a situasion a mangpatibker iti relasionmo ken Jehova. Makitamto a pagsayaatam ti panagtalek ken panagtulnogmo kenkuana.

17. No okupadotayo iti trabaho a panangasaba, ania ti masiguradotayo nga aramiden ni Jehova?

¹⁷ Apay a naispal ni Pablo iti “ngiwat ti leon”? Kinunana: “Tapno babaen kaniak naan-anay a maitungpal ti panangaskasaba ket amin dagiti nasion mangngegda koma dayta.” (2 Tim. 4:17) Kas ken Pablo, bayat nga okupadotayo iti trabaho a panangasaba, agtalektayo nga ‘inayonto’ ni Jehova ti amin a kasapulantayo. (Mat. 6:33) Kas manangaskasaba iti Pagarian, ‘naitalek [kadatayo] ti naimbag a damag,’ ken ibilbilangnatayo ni Jehova kas ‘katrabahuanna.’ (1 Tes. 2:4; 1 Cor. 3:9) No okupadotayo iti trabaho a panangasaba, saantayo a matuokan nga aguray iti sungbat ni Jehova kadagiti kararagtayo.

18. Kadagiti ania a pamay-an a makapagtalektayo ken Jehova ken mapatibkertayo ti relasiontayo kenkuana?

¹⁸ Usarentayo ngarud ti agdama a tiempo a mangpatibker iti relasiontayo iti Dios. No adda situasion a pakariribukantayo, usarentayo dayta a gundaway tapno ad-adda a sumingedtayo ken Jehova. Adalentayo a naimbag ti Sao ti Dios, agkararagtayo a kanayon, ken agbalintayo nga okupado kadagiti naespirituan nga aktibidad. No aramidentayo dagita, makapagtalektayo a tulongannatayo ni Jehova a mangibtur kadagiti agdama a parikuttayo ken iti aniaman a pakarigatan iti masanguanan.