1. Apay a nasken a pagtalinaedentayo a natibker ti relasiontayo ken Jehova?

MAYSAKA kadi a dedikado ken bautisado a Saksi ni Jehova? No kasta, adda nagpateg a banag nga ik-ikutam—ti personal a relasionmo iti Dios. Ngem pakpakapuyen dayta ti lubong ni Satanas ken ti mismo a kinaimperpektotayo. Maipaspasango ti amin a Kristiano iti dayta a narigat a kasasaad. No kasta, nasken a pagtalinaedentayo a natibker ti relasiontayo ken Jehova.

2. Kasanotayo a mapatibker ti relasiontayo ken Jehova?

² Kasano kaagpayso ti relasionmo ken Jehova? Kayatmo kadi a pagbalinen a natibtibker dayta? Ibaga ti Santiago 4:8 ti masapul nga aramidem: “Umadanikayo iti Dios, ket isu umadaninto kadakayo.” Bayat nga ikagumaantayo ti umadani iti Dios, umadani met isuna kadatayo. No itultuloytayo nga aramiden dayta, tumibker a tumibker ti relasiontayo ken Jehova. Kas resultana, agbalin a napaypayso kadatayo dayta a relasion. Maaddaantayo met iti panagtalek a kas iti panagtalek ni Jesus idi kinunana:  “Daydiay nangibaon kaniak napudno [wenno, napaypayso], ket . . . Isu am-ammok.” (Juan 7:28, 29) Ngem ania dagiti mabalinmo nga aramiden tapno sumingedka ken Jehova?

3. Kasanotayo a makisarita ken Jehova, ken kasano met a makisarita kadatayo?

³ Nagpateg ti kanayon a pannakisarita ken Jehova tapno sumingedtayo kenkuana. Ngem kasanom a maaramidan dayta? Panunotem daytoy: Kasanoka a makisarita iti gayyemmo nga agnanaed iti adayo? Nalabit kanayon nga agsinnurat wenno agtinnawagkayo. Makisarsaritaka ken Jehova babaen ti kanayon a panagkararagmo kenkuana. (Basaen ti Salmo 142:2.) Ket palpalubosam met a makisarita kenka no regular a basaem ti naisurat a Saona ken utobem dayta. (Basaen ti Isaias 30:20, 21.) Usigentayo ngarud no kasano a mapatibker ti relasiontayo ken Jehova babaen iti daytoy a komunikasion. Iti kasta, agbalin nga ad-adda a napaypayso ti relasiontayo kenkuana.

4, 5. Kasano a makikomkomunikar kenka ni Jehova babaen ti naisurat a Saona? Mangted iti pagarigan.

⁴ Ammotayo a ti Biblia ket mensahe ti Dios para iti amin a tao. Ngem matulongannaka kadi met ti Biblia nga umadani ken Jehova? Wen. Bayat ti regular a panagbasa ken panagadalmo iti Biblia, usigem no ania ti reaksionmo iti basbasaem ken panunotem no kasano a mayaplikarmo dayta. Iti kasta, palpalubosam ni Jehova a makisarita kenka babaen ti Saona. Daytoy ti mangpasinged iti relasionmo kenkuana.—Heb. 4:12; Sant. 1:23-25.

⁵ Kas pagarigan, basaem ken utobem ti kinuna ni Jesus nga “isardengyo ti agurnong maipaay iti bagbagiyo kadagiti gameng iti daga.” No makitam a naipamaysan ti biagmo iti panagserbim ken Jehova, mariknam a maay-ayo kenka. Ngem no mabigbigmo a kasapulan a pasimpliem ti biagmo ken ad-adda pay nga ipamaysam ti panagserbim, kaipapananna a tultulongannaka ni Jehova a mangilasin iti kasapulan a parang-ayem tapno sumingedka kenkuana.—Mat. 6:19, 20.

6, 7. (a) Ania ti epekto ti panagadaltayo iti Biblia iti ayattayo ken Jehova ken iti ayatna kadatayo? (b) Ania koma ti kangrunaan a panggep ti personal a panagadaltayo?

⁶ Ti panagadal iti Kasuratan saanna laeng nga ipakita dagiti masapul a parang-ayentayo iti naespirituan. Paunegenna  met ti apresasiontayo iti kinadungngo ni Jehova, a dayta ti pakatignayantayo nga ad-adda pay a mangayat kenkuana. Ken bayat nga umun-uneg ti ayattayo iti Dios, ad-adda met nga ayatennatayo, iti kasta tumibker ti relasiontayo kenkuana.—Basaen ti 1 Corinto 8:3.

⁷ No kayattayo ti suminged ken Jehova, masapul nga umiso ti panggep ti panagadaltayo iti Saona. Kinuna ni Jesus: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” (Juan 17:3) Adu ti baro ken makapainteres a masursurotayo no basaentayo ti Biblia, ngem ti koma kangrunaan a panggeptayo ket ti ad-adda pay a panangam-ammo ken Jehova kas maysa a Persona.—Basaen ti Exodo 33:13; Sal. 25:4.

8. (a) Ania ti mabalin a mapanunot ti maysa maipapan iti panangdusa ni Jehova ken Ari Azarias a naisalaysay iti 2 Ar-ari 15:1-5? (b) No am-ammotayo a naimbag ni Jehova, apay a ditay agduadua kadagiti pangngeddengna?

⁸ No am-ammotayo a naimbag ni Jehova, saantay a mariribukan no saan a nailawlawag iti Biblia ti makagapu nga inaramidna ti maysa a banag. Kas pagarigan, ania ti reaksionmo iti panangdusa ni Jehova ken Azarias nga ari ti Juda? (2 Ar. 15:1-5) Nupay “agisaksakripisio pay laeng idi dagiti umili ken mangpatpataud[da] iti asuk a sakripisio kadagiti nangato a disso,” “intuloy [ni Azarias] nga aramiden no ania ti nalinteg kadagiti mata ni Jehova.” Nupay kasta, “ni Jehova sinaplitna ti ari, ket nagtalinaed a maysa nga agkukutel agingga iti aldaw ti ipapatayna.” Apay? Saan nga ibaga ti salaysay. Daytoy kadi ti rason a mariribukan wenno kuestionarantayon ti panangdusa ni Jehova ken Azarias? Saan. No am-ammotayo a naimbag ni Jehova, agtalektayo a kanayon a “maiparbeng” ti disiplinana. (Jer. 30:11) Isu nga uray no ditay ammo no apay a dinusa ni Jehova ni Azarias, makapagtalektayo a nalinteg ti panangukomna.

9. Ania dagiti detalye a makatulong kadatayo a mangtarus no apay a pinagkukutel ni Jehova ni Azarias?

⁹ Iti daytoy a kaso, mangipaay ti Biblia iti kanayonan a detalye maipapan ken Ari Azarias, a naawagan met iti Ari Ozias. (2 Ar. 15:7, 32) Iti umasping a salaysay iti 2 Cronicas 26:3-5, 16-21, maammuantayo nga idi damo, inaramid ni Ozias no ania ti umiso kadagiti mata ni Jehova. Ngem idi agangay, “timmangsit ti pusona,” a dayta ti nakaisagmakanna. Sidudursok a ginandatna nga aramiden dagiti annongen a para laeng kadagiti papadi. Imbaga kenkuana ti 81 a papadi a di umiso ti gandatna ken pinadasda a lapdan. Ania ti reaksion ni Ozias? Imbes nga agpakumbaba, “nakapungtot” ketdi kadagiti papadi. Dayta ti gapuna a pinagkukutel ni Jehova!

10. Apay a saantayo a kasapulan nga ammuen ti makagapu iti tunggal pangngeddeng ni Jehova, ken kasano a maaddaantayo iti panagtalek a kanayon a nalinteg ti ar-aramidna?

¹⁰ Ania ti maadaltayo? Adda dagiti kanayonan a detalye a mangilawlawag no apay a dinusa ni Jehova ni Ari Azarias. Ngem kasanon no saan nga ibaga ti Sao ti Dios ti amin a detalye maipapan iti maysa a salaysay? Pagduaduaam kadin ti kinalinteg ti Dios? Wenno panunotem nga umdasen ti impormasion a linaon ti Biblia tapno makapagtalekka a kanayon nga umiso ti ar-aramid ni Jehova? (Deut. 32:4) Bayat a maam-ammotayo a naimbag ni Jehova kas maysa a Persona, dumakkel met ti ayat ken apresasiontayo kenkuana ket saantayon a kasapulan nga ammuen ti makagapu iti tunggal  tignayna. Maaddaantayo iti kasta nga apresasion bayat nga ad-adalen ken ut-utobentayo ti naisurat a Saona. (Sal. 77:12, 13) Daytoy ti mangpatibker iti relasionmo ken Jehova, ket agbalin a napaypayso isuna kenka.

11-13. Kasanotay nga ammo a dengdenggen ni Jehova dagiti kararag? (Kitaen ti ladawan iti rugi ti artikulo.)

¹¹ No agkararagtayo, umad-adanitayo ken Jehova. Idaydayaw, agyamyaman, ken agpapaiwanwantayo kenkuana. (Sal. 32:8) Ngem tapno agbalin a napaypayso ti relasionmo ken Jehova, masapul a kombinsidoka a dengdenggenna dagiti kararag.

¹² Patien ti dadduma a mangpalag-an laeng iti rikna ti panagkararag. Kunada a mariknam a nasungbatan ti kararagmo gapu laeng ta nayebkasmo ti adda iti panunotmo, ammom ti problemam, ken inkagumaam a risuten dayta. Pudno nga adda kasta a maitulong ti panagkararag. Ngem kasano nga ammom a talaga a dengdenggen ni Jehova dagiti napasnek a kararagmo?

¹³ Panunotem daytoy: Sakbay a nagbalin a tao ni Jesus, nakitana a sinungbatan ni Jehova ti kararag dagiti tattao. Sa kabayatan ti ministeriona ditoy daga, inkarkararagna ken Amana idiay langit ti rikriknana. Inaramidna ngata dayta—nga uray la agpatnag a nagkarkararag—no impapanna a saan met a dumdumngeg ni Jehova? (Luc. 6:12; 22:40-46) Sinuruanna ngata dagiti adalanna nga agkararag no impapanna a mangpalag-an laeng dayta iti rikrikna? Nalawag nga ammo ni Jesus a ti panagkararag ket aktual a pannakisarita ken Jehova. Iti maysa a gundaway, kinuna ni Jesus: “Ama, agyamanak kenka ta dinengngegnak. Pudno, ammok a kankanayon a denggennak.” Makapagtalektayo met a ni Jehova ti “Managdengngeg iti kararag.”—Juan 11:41, 42; Sal. 65:2.

14, 15. (a) Ania ti nasayaat a resultana no espesipiko dagiti kararagtayo? (b) Kasano a nakatulong ti panagkarkararag ti maysa a sister tapno tumibker ti relasionna ken Jehova?

¹⁴ Mabalin a saan a kanayon a nakadkadlaw ti sungbat kadagiti kararagmo. Ngem no espesipiko dagiti kararagmo, nalaklakam a makita ti sungbat ni Jehova. Kas  resultana, ad-addanto a napaypayso kenka ni Jehova. Kasta met, no iyebkasmo kenkuana ti amin a pakaseknam, ad-addanto met a suminged kenka.

¹⁵ Kitaentayo ti kapadasan ni Kathy. * Saanna idi a matagtagiragsak ti mangasaba, nupay kanayon met a rummuar. Inlawlawagna: “Diak idi magustuan ti mangasaba. Talaga a saan. Idi nagretiroak iti trabahok, imparegta ti maysa a panglakayen nga ag-regular pioneer-ak; sa nangyawat iti aplikasion. Inkeddengko ti agpayunir, ngem inaldaw met nga ikarkararagko ken Jehova a magustuak koma ti mangasaba.” Sinungbatan kadi ni Jehova ti kararagna? Kinunana: “Tallo a tawen itan a payunirak. Gapu ta ad-adun ti panawenko a mangasaba ken makasursuroak pay iti dadduma a sister, in-inut a naparang-ayko ti panangasabak. Saanko laengen a magusgustuan ti mangasaba—pagay-ayatkon dayta. Ken nasingsingedak itan ken Jehova.” Wen, nakatulong ken Kathy ti panagkarkararagna tapno agbalin a napaypayso ti relasionna ken Jehova.

16, 17. (a) Ania ti masapul nga aramidentayo tapno agtalinaed a natibker ti relasiontayo ken Jehova? (b) Ania ti mausig iti sumaruno nga artikulo?

¹⁶ Ti panangpatanor iti nasinged a relasion ken Jehova ket awan patinggana. Masapul nga ikagumaantayo ti umadani iti Dios no kayattayo nga umadani met isuna kadatayo. Isu nga ikagumaantayo koma ti regular a makikomunikar iti Diostayo babaen ti panagadal iti Biblia ken panagkararag. Kas resultana, tumibker a tumibker ti relasiontayo ken Jehova ket maibturantayo dagiti pakasuotan.

¹⁷ Ngem no dadduma, kasla di agpatpatingga dagiti personal a problematayo uray sipapasnek nga agkarkararagtayo. Kadagita a kasasaad, mabalin a mangrugi a kumapuy ti panagtalektayo ken Jehova. Baka pagduaduaantayon no dengdenggenna met laeng dagiti kararagtayo wenno ibilbilangnatayo pay kas gayyemna. No kasta ti marikriknatayo, ania ti mabalintayo nga aramiden? Makatulong kadatayo ti sumaruno nga artikulo.