1, 2. Apay nga impatpateg ni Jesus ni Marta, ngem ania ti mangipakita nga imperpekto ni Marta?

ANIA ti mapanunotmo no malagipmo ti karakter ti Biblia a ni Marta? Nupay isu laeng ti babai a nainaganan kas maysa kadagiti adalan nga impatpateg ni Jesus, impatpategna met ti dadduma a babbai a natulnog iti Dios, kas ken Maria a dungdungnguenna nga ina ken ti kabsat ni Marta a ni Maria. (Juan 11:5; 19:25-27) Apay a nadakamat iti salaysay ti Ebanghelio nga impatpateg ni Jesus ni Marta?

² Impatpateg ni Jesus ni Marta saan laeng a gapu ta managpadagus ken nagaget no di ket gapu iti espiritualidadna. Ni Marta ket maysa a babai a talaga a mamati kadagiti pannursuro ni Jesus. Nabileg met ti pammatina a ni Jesus ti naikari a Mesias. (Juan 11:21-27) Nupay kasta, imperpekto met a kas kadatayo. Idi bimmisita ni Jesus iti balay da Marta, imbagana ken Jesus nga ilintegna ti maysa a banag a para kenkuana ket saan nga umiso. Kinunana: “Apo, saanmo kadi a pakaseknan a ti kabsatko binaybay-annak nga agmaymaysa a mangasikaso iti bambanag? Ngarud,  ibagam kenkuana a tumulong kaniak.” (Basaen ti Lucas 10:38-42.) Ania ti maadaltayo iti daytoy a salaysay?

3, 4. Ania ti mangipakita a pinili ni Maria ti “naimbag a bingay,” ket ania a leksion ti sigurado nga impateg ni Marta? (Kitaen ti ladawan iti rugi ti artikulo.)

³ Sinubadan ni Jesus ti kinamanagpadagus da Marta ken Maria iti naespirituan a sagut. Ginundawayan ni Maria ti manggun-od iti pannakaammo manipud iti Naindaklan a Mannursuro. Nagtugaw “iti sakaanan ti Apo . . . , ket nagim-imdeng iti saona.” No kasta koma ti inaramid ni Marta, sigurado a kinomendaran ni Jesus gapu iti panagimdengna.

⁴ Nupay kasta, nagbalin nga okupado ni Marta nga agisagana iti naimas a kanenda ken adu pay a bambanag tapno komportable ni Jesus. Dagita ti makagapu a naringgoran ni Marta isu a marurod ken Maria. Napaliiw ni Jesus nga adu unay ti ar-aramiden ni Marta, isu a siaalumamay a kinunana: “Marta, Marta, maringgoran ken mariribukanka maipapan iti adu a banag.” Kalpasanna, imbagana nga umanayen ti maysa a putahe. Kinomendaranna met ni Maria gapu iti panagimdengna. Kinunana: “Iti biangna, pinili ni Maria ti naimbag a bingay, ket saanto a maikkat kenkuana dayta.” Mabalin a malipatan ni Maria ti kinnanna iti daydi nga espesial nga okasion, ngem saanna a malipatan ti komendasion ken dagiti naespirituan a taraon a naawatna gapu ta impamaysana ti dimngeg ken Jesus. Nasurok nga 60 a tawen kalpasanna, insurat ni apostol Juan: “Ni Jesus inayatna ni Marta ken ti kabsatna a babai.” (Juan 11:5) Ipakita dagitoy a naipaltiing a sasao a sigurado nga impateg ni Marta ti naayat a balakad ni Jesus ket inkagumaanna ti nagserbi a simamatalek ken Jehova iti intero a panagbiagna.

5. Ania ti nakaidumaan ti biag ita iti biag idi panawen ti Biblia, ket ania a saludsod ti tumaud?

⁵ No maipapan iti pakasingaan, ania ti nakaidumaan ti biag ita iti biag idi panawen ti Biblia? “Iti pakasaritaan ti tao, ita laeng nga adda dagiti nagsayaat a pamay-an ti komunikasion, napapartak a pagimprentaan, aduan ladawan a magasin, radio, pelikula, ken telebision. . . . Inaldaw a mangmangted dagitoy kadatayo kadagiti baro a pakasingaan . . . Iti saan pay a nabayag, naipagarup a ti panawentayo ket maawagan iti ‘Panawen ti Pannakalawlawag.’ Ngem ad-adda met a nagbalin a ‘Panawen ti Pannakasinga.’” Naibaga dagitoy iti grupo dagiti estudiante idiay United States, nasurok nga 60 a tawen ti napalabasen. Kinuna ti The Watchtower a Septiembre 15, 1958 a ti “pakasingaan ket umadu bayat nga umas-asideg ti panungpalan daytoy a lubong.” Pudno la unay dayta! Gapuna, mangpataud daytoy iti nagpateg a saludsod: Ania ti mabalintayo nga aramiden tapno saantayo a masinga ket agbalintayo a kas ken Maria a nangipamaysa kadagiti naespirituan a bambanag?

6. Kasano nga us-usaren dagiti adipen ni Jehova ti teknolohia ti lubong?

⁶ Tapno ad-adda a maikasaba ti Pagarian, us-usaren a naimbag ti organisasion ni Jehova ditoy daga ti teknolohia ti lubong. Alaentayo a pagarigan ti “Photo-Drama of Creation.” Maysa daytoy a pannakaipabuya dagiti slide ken motion picture nga addaan iti kompleto a kolor ken uni. Sakbay ken bayat ti Gubat Sangalubongan I, naragsakan ti minilion a tattao iti intero a lubong iti pannakaipabuya daytoy. Iti maudi a paset, nailadawan iti pabuya ti iyaay ti natalna a Sangaribu a Tawen a Panagturay ni Jesu-Kristo. Idi agangay, naibrodkas iti radio ti mensahe ti Pagarian ket nangngeg dayta ti  minilmilion pay a tattao iti intero a lubong. Ita, maus-usaren ti kompiuter ken Internet tapno maisaknap ti naimbag a damag iti intero a lubong ken uray kadagiti naiputputong nga isla.

7. (a) Apay a napeggad ti naan-anay a panangusar iti lubong? (b) Ania koma ti ad-adda a pagannadantayo? (Kitaen ti footnote.)

⁷ Mamakdaar ti Biblia a napeggad ti naan-anay a panangusar kadagiti bambanag nga ituktukon ti lubong. (Basaen ti 1 Corinto 7:29-31.) Mabalin a mangibus ti maysa a Kristiano iti adu a tiempo kadagiti bambanag a saan met a dakes, kas iti panagbasa, panagbuya, panagpasiar, panag-shopping, ken panangammo iti kabaruan nga elektroniko a gadget wenno nangingina nga alikamen. Mabalin met a mangibus iti tiempotayo ti pannaki-chat wenno panaglukat iti social networking site iti Internet, panagteks, panag-email, ken kanayon a panangammo iti kabaruan a damag wenno pasamak iti isports ken mabalin a makaadikto pay dagita. * (Ecl. 3:1, 6) No saantayo a limitaran ti tiempotayo kadagiti saan a napateg a bambanag, mabalin a maliwayantayo ti kapatgan iti amin—ti panagdayawtayo ken Jehova.—Basaen ti Efeso 5:15-17.

8. Apay a nakapatpateg ti balakad a saantayo nga ayaten dagiti bambanag iti lubong?

⁸ Inaramid ni Satanas ti lubongna a mangatrakar ken mangsinga kadatayo. Pudno dayta idi umuna a siglo, ket nakarkaro a kasta ita. (2 Tim. 4:10) Ngarud, masapul nga ipangagtayo daytoy a balakad: “Dikay ayaten . . . ti bambanag nga adda iti lubong.” No kanayon nga agbiagtayo maitunos iti dayta a balakad, saantayo a masinga ket ad-adda nga ‘ayatentayo ti Ama.’ Makatulong dayta tapno nalaklaka a maaramidtayo ti pagayatan ti Dios ket magun-odtayo ti anamongna iti agnanayon.—1 Juan 2:15-17.

9. Ania ti imparegta ni Jesus kadagiti adalanna nga ipamaysada, ken kasano a nangipaay iti ulidan?

⁹ Ti naasi a balakad ni Jesus ken Marta ket naan-anay a maitunos iti isursurona ken iti ulidanna. Imparegtana kadagiti adalanna nga ipamaysada ti agserbi ken Jehova ken iti Pagarianna nga awan ti pakasingaanda. (Basaen ti Mateo 6:22, 33.) Saan a pakaringgoran ni Jesus dagiti material a bambanag; awan ti balay wenno dagana.—Luc. 9:58; 19:33-35.

10. Ania nga ulidan ti impaay ni Jesus iti rugi ti ministeriona?

 ¹⁰ Adu ti napasamak kabayatan ti ministerio ni Jesus a mabalin a makasinga koma kenkuana, ngem di pulos nagpasinga kadagitoy. Iti rugi ti ministeriona, kalpasan nga insurona dagiti tattao ken nangaramid iti milagro idiay Capernaum, kiniddaw dagiti tattao a saanna koma a panawan ti siudadda. Ngem ania ti inaramid ni Jesus iti makaallukoy a kiddawda? Imbagana: “Kasta met nga iti sabsabali a siudad masapul nga ideklarak ti naimbag a damag ti pagarian ti Dios, agsipud ta naibaonak maigapu iti daytoy.” (Luc. 4:42-44) Sinursor ni Jesus ti intero a Palestina, a nangasaba ken nangisuro. Nupay perpekto ni Jesus, nabannog met gapu iti napinget a panagserbina iti Dios, isu a kinasapulanna ti aginana.—Luc. 8:23; Juan 4:6.

11. Ania ti imbaga ni Jesus iti lalaki nga adda saanda a pagkinnaawatan iti kabsatna, ket ania ti impakdaar ni Jesus?

¹¹ Iti sabali a pasamak, idi isursuro ni Jesus dagiti pasurotna no kasano a sanguenda ti ibubusor, kinuna ti maysa a lalaki: “Mannursuro, ibagam iti kabsatko nga ibingayannak iti tawid.” Ngem saan a nakibiang ni Jesus iti ririda. Imbes ketdi, kinunana: “Asino ti nangdutok kaniak nga ukom . . . maipaay kadakayo?” Kalpasanna, intuloy ni Jesus ti nangisuro a pinakdaaranna dagiti dumdumngeg a napeggad ti masinga iti panagserbi iti Dios gapu iti panagtarigagay kadagiti material a bambanag.—Luc. 12:13-15.

12, 13. (a) Sakbay la unay a mapapatay ni Jesus, apay a kayat ti dadduma a proselita a Griego a makita ni Jesus? (b) Ania ti inaramid ni Jesus iti mabalin koma a pakasingaanna?

¹² Narigat ti maudi a lawas ti panagbiag ni Jesus ditoy daga. (Mat. 26:38; Juan 12:27) Adu ti inaramidna. Naipasango pay iti nakababain a pannakabista ken naranggas nga ipapatay. Kas pagarigan, panunotenyo ti napasamak idi Domingo, Nisan 9, 33 C.E. Kas naipadto, napan ni Jesus idiay Jerusalem a nakasakay iti urbon nga asno, ket indaydayaw ti bunggoy kas daydiay “um-umay kas Ari iti nagan ni Jehova.” (Luc. 19:38) Iti simmaruno nga aldaw, simrek ni Jesus iti templo ket situtured a pinapanawna dagiti agnegnegosio iti balay ti Dios ta kuarkuartaanda dagiti padada a Judio.—Luc. 19:45, 46.

¹³ Dadduma kadagiti tattao iti Jerusalem ket dagiti proselita a Griego a nagsiddaaw kadagiti inaramid ni Jesus isu a kiniddawda ken apostol Felipe a kayatda a makita ni Jesus. Ngem saan nga impalubos ni Jesus a masinga isuna kadagiti napatpateg a bambanag a mapasamak. Saanna a kayat ti agbalin a nalatak tapno adda mangisakit kenkuana ket saan a papatayen dagiti kabusor ti Dios. Gapuna, kalpasan nga inlawlawagna a dandanin matay, kinunana kada Andres ken Felipe: “Ti agayat iti kararuana madadaelna dayta, ngem ti manggura iti kararuana iti daytoy a lubong masaluadannanto dayta a maipaay iti agnanayon a biag.” Imbes a pagustuanna dagidiay a Griego, imbagana a tuladenda ti kinamanagsakripisiona ken inkarina: “No ti asinoman agserbi kaniak, isu padayawanto ti Ama.” Sigurado nga imbaga ni Felipe daytoy a sungbatna kadagiti nagsaludsod.—Juan 12:20-26.

14. Nupay inyun-una ni Jesus ti panangasabana, ania ti mangipakita nga isu ket balanse?

¹⁴ Saan nga impalubos ni Jesus a masinga ti kangrunaan a panggepna a mangikasaba iti naimbag a damag, ngem saan met la a dayta ti kanayon nga inaramidna. Pinatganna ti awis iti maysa a kasar ket naparagsakna pay ti okasion ta pinagbalinna nga arak ti danum. (Juan 2:2, 6-10) Pinatganna met dagiti awis a pangrabii a kaduana dagiti gagayyemna ken dagiti agbalinto nga  adalanna. (Luc. 5:29; Juan 12:2) Ngem kangrunaanna, kanayon a nangipaay ni Jesus iti panawen nga agkararag, agutob, ken aginana.—Mat. 14:23; Mar. 1:35; 6:31, 32.

15. Ania ti imbalakad ni apostol Pablo, ken kasano a nangipaay iti nagsayaat nga ulidan?

¹⁵ “Ikkatentayo met ti tunggal dadagsen,” insurat ni apostol Pablo, a nangyasping iti biag ti dedikado a Kristiano iti maysa a lumba. (Basaen ti Hebreo 12:1.) Inaramid ni Pablo ti inkasabana. Binaybay-anna ti napintas a posisionna iti Judaismo a mabalin a nangpabaknang ken nangpalatak koma pay kenkuana. Impamaysana “ti napatpateg a bambanag.” Sireregta a nagserbi iti Dios ket nagdaliasat iti adu a lugar a pakairamanan ti Siria, Asia Menor, Macedonia, ken Judea. Idi insuratna ti maipapan iti namnamana a biag nga agnanayon idiay langit, kinunana: “Iti pananglipat kadagiti banag a nalikudan ken panangragpat kadagiti banag nga adda iti masanguanan, agregreggetak nga agturong iti kalat maipaay iti gunggona.” (Fil. 1:10; 3:8, 13, 14) Gapu ta awan asawa ni Pablo, dayta ti nakatulong kenkuana a ‘naynay nga agserbi iti Apo nga awan ti makasinga.’—1 Cor. 7:32-35.

16, 17. Naasawaan man wenno saan, kasano a matuladtayo ti ulidan ni Pablo kas adalan ni Kristo? Mangisalaysay iti kapadasan.

¹⁶ Kas ken Pablo, pinili ti dadduma nga adipen ti Dios ti agtalinaed nga awanan asawa tapno bassit laeng ti rebbengenda iti pamilia ket maipamaysada ti agserbi para iti Pagarian. (Mat. 19:11, 12) Masansan nga ad-adu ti responsabilidad dagiti naasawaan nga agserserbi iti Dios. Ngem naasawaantayo man wenno saan, mabalintayo amin nga ‘ikkaten ti tunggal dadagsen’ a mabalin a mangsinga kadatayo iti panagserbitayo iti Dios. Nalabit agkasapulan dayta iti panangikkat kadagiti aramid a mangagaw iti tiempotayo ken panangikeddeng kadagiti kalat tapno ad-adu ti tiempotayo nga agserbi iti Dios.

¹⁷ Alaentayo a pagarigan ti agassawa a Welsh a da Mark ken Claire. Nagpayunirda kalpasan ti panageskuelada ken intuloyda ti nagpayunir kalpasan a nagkasarda. Kinuna ni Mark: “Ad-adda a napasimplemi ti biagmi idi inlakomi ti tallo ti kuartona a balaymi ken nagikkatkami iti part-time a trabahomi tapno makapagboluntariokami iti trabaho a panagibangon iti intero a lubong.” Iti napalabas a 20 a tawen, nakapanda iti nagduduma a lugar iti Africa a timmulongda a nagibangon kadagiti Kingdom Hall. Adda pay tiempo a 15 laengen a doliar ti kuartada, ngem impaay ni Jehova ti kasapulanda. Kuna ni Claire: “Makaparagsak kadakami ti inaldaw nga agserbi ken Jehova. Immadu ti gagayyemmi, ket saankami a nagkurang iti aniaman. Nagbassit laeng ti insakripisiomi no idilig iti ragsak ti amin-tiempo a panagserbimi ken Jehova.” Kasta met laeng ti kapadasan ti adu a kakabsat nga agserserbi iti amin-tiempo. *

18. Ania dagiti saludsod a masapul nga usigentayo?

¹⁸ Sika ngay? Ania ti aramidem no madlawmo a saanen a kas iti dati ti reggetmo a mangyun-una iti Pagarian gapu kadagiti pakasingaan? Mabalin a masapul a parang-ayem ti panagbasam iti Biblia ken ti panagadalmo. Kasano a maaramidmo dayta? Mailawlawag dayta iti sumaruno nga artikulo.