1. Kasano kapateg ken Jesus ti trabaho a panangasaba? Ilawlawagmo.

PAGAY-AYAT idi ni Jesus nga isarita ti maipapan iti Pagarian ti Dios. Sigun iti rekord ti Biblia, ad-adu ti gundaway nga insaritana ti maipapan iti Pagarian ngem iti aniaman a topiko. Nasurok a 100 a daras a dinakamatna dayta bayat ti ministeriona. Talaga nga ipatpategna ti Pagarian.—Basaen ti Mateo 12:34.

2. Mano ti mabalin a nakangngeg idi naited ti bilin a nadakamat iti Mateo 28:19, 20, ken apay a maikunatayo dayta?

² Kalpasan la unay ti panagungar ni Jesus, kinasaritana ti nasurok a 500 nga agbalin a manangiwaragawag iti Pagarian. (1 Cor. 15:6) Nalabit iti dayta a pasamak a binilinna ida nga idanonda ti mensahe ti Pagarian kadagiti “tattao iti amin a nasion”—nagdakkel nga annongen iti daydi a panawen! * Daytoy a dakkel a trabaho nga impakpakauna ni Jesus ket agtultuloy agingga iti “panungpalan ti sistema ti bambanag,” ket mapaspasamaken dayta.  Mabalin nga adda met pasetmo iti pannakaitungpal dayta nga annongen ken padto.—Mat. 28:19, 20.

3. Ania dagiti tallo a banag a nakatulong kadatayo a mangikasaba iti naimbag a damag?

³ Kalpasan nga inted ni Jesus ti bilin a panangasaba, inkarina kadagiti pasurotna: “Addaak kadakayo.” (Mat. 28:20) Gapuna, idadauluanna daytoy nasaknap a trabaho a panangasaba. Ken kinabalannatayo ti Dios “iti tunggal naimbag a banag” tapno maitungpaltayo dayta nga annongen. (Heb. 13:20, 21) Iti daytoy nga artikulo, usigentayo ti tallo kadagitoy a naimbag a bambanag: (1) dagiti alikamen a naited kadatayo, (2) dagiti pamay-an nga inusartayo, ken (3) ti pannakasanay a naawattayo. Umuna, usigentayo ti dadduma kadagiti nausar nga alikamen bayat iti napalabas a 100 a tawen.

4. Apay a nagusartayo iti nadumaduma a kita ti alikamen iti trabahotayo a panangasaba?

⁴ Inyarig ni Jesus “ti sao [wenno mensahe] ti Pagarian” iti bukel a naimula iti nagduduma a kita ti daga. (Mat. 13:18, 19) Mabalin nga agusar ti mannalon iti nagduduma nga alikamen a mangisagana iti talonna sakbay a mulaanna dayta. Umasping iti dayta, iti panaglabas dagiti tawen, nangipaay ti Aritayo kadagiti alikamen nga usarentayo a makatulong a mangisagana iti puso dagiti minilion a tattao nga umawat iti mensahe ti Pagarian. Nakatulong ti dadduma kadagitoy nga alikamen iti nalabit maysa a dekada wenno ad-adu pay, ket dadduma ti maus-usar pay laeng agingga ita. Ngem nakatulong amin dagitoy nga alikamen a mangpasayaat iti abilidadtayo a mangasaba iti nagduduma a pamay-an.

5. Ania ti testimony card, ken kasano a nausar dayta?

⁵ Maysa nga alikamen a nakatulong iti adu a mangirugi iti ministerioda ket ti testimony card, a nangrugi nga inusar dagiti agibumbunannag iti Pagarian idi 1933. Agarup 7.6 a sentimetro ti kaakaba ken 12.7 a sentimetro ti kaatiddog dayta a card. Addaan daytoy iti ababa a mensahe ti Biblia. No dadduma, masukatan dayta iti baro a card a naglaon iti baro a mensahe. Simple laeng ti panangitukon iti dayta! Agarup sangapulo ti tawen ni C. W. Erlenmeyer idi damo a nakipaset iti dayta a pamay-an ti panangasaba. Kinunana: “Ti maus-usar idi nga introduksion ket, ‘Mabalin kadi a basaem daytoy a card?’ No nabasan ti bumalay ti card, ikkanmi iti literatura sakamto pumanaw.”

6. Ania ti naitulong ti testimony card?

⁶ Adu ti naitulong ti testimony card kadagiti agibumbunannag. Uray no kayat dagiti agibumbunannag ti mangasaba, mabain ti dadduma ken dida ammo ti ibagada. Adu met ti maibaga ti dadduma. Maibagada amin nga ammoda iti bumalay iti uneg laeng ti sumagmamano a minuto, ngem saan a kanayon a nataktika ti pamay-anda! Nupay kasta, ti simple ken nalawag a sasao iti testimony card ti nagserbi a “pannakangiwat” dagiti agibumbunannag.

7. Ania dagiti pakarigatan a nakaipasanguan ti dadduma iti panagusarda iti card?

⁷ Siempre, adda met dagiti pakarigatan. Nalagip ti nabayagen a Saksi a ni Grace A. Estep: “No dadduma, isaludsodda kadakami, ‘Ania ti ibagbaga dayta? Mabalin kadi nga ibagam lattan?’” Adda met dagiti bumalay a saan a makabasa iti naisurat iti card. Ipagarup met ti dadduma a kukuadan dayta, isu a no naawatdan manipud iti agibumbunannag irikepdan ti ruangan. No bumusbusor ti bumalay, mabalin a pigisenna ti card. Nupay kasta, nasursuron dagiti kakabsat ti makisarita iti publiko ken mangipakaammo iti bagbagida kas pannakabagi ti Pagarian.

8. Kasano a nausar ti maaw-awit a ponograpo? (Kitaen ti ladawan iti rugi ti artikulo.)

⁸ Ti maysa pay nga alikamen a nausar idi  dekada 1930 ken idi rugi ti dekada 1940 ket ti maaw-awit a ponograpo, nga inawagan pay ti dadduma a kakabsat iti Aaron gapu ta masansan a dayta ti agsao para kadakuada. (Basaen ti Exodo 4:14-16.) No ipalubos ti bumalay, ipangngeg ti agibumbunannag ti uppat ket kagudua a minuto a palawag a naibatay iti Biblia, ket kalpasanna mangitukon iti sumagmamano a literatura. No dadduma, maurnong ti intero a pamilia a dumngeg iti nairekord a mensahe ti Biblia. Idi 1934, nagaramid ti Watch Tower Society iti maaw-awit a ponograpo a nairanta a mausar iti ministerio. Idi agangay, nakairekorddan iti 92 a nagduduma ti temana a palawag.

9. Kasano kaepektibo ti panangusar iti ponograpo?

⁹ Idi nangngeg ni Hillary Goslin ti maysa kadagita a palawag, binulodna ti ponograpo iti agibumbunannag iti makalawas tapno iranudna kadagiti kaarrubana ti mensahe ti Pagarian. Idi nagsubli ti agibumbunannag, nakitana nga agur-uray kenkuana ti sumagmamano a baro nga interesado. Kas resultana, adu kadakuada ti nagdedikar ken Jehova, ken idi agangay nagadal iti Gilead School ti dua a babbai nga annak ni Hillary ket naibaonda nga agserbi iti sabali a pagilian. Kas iti testimony card, nakatulong ti ponograpo iti adu a mangrugi a mangasaba. Idi agangay, babaen iti Teokratiko nga Eskuelaan ti Panagministro, nakasursuro dagiti agibumbunannag a mangasaba.

10, 11. Kasano a nausar dagiti pagiwarnak ken radio a mangisaknap iti kinapudno iti Biblia, ken apay a nagsayaat dagitoy a pamay-an?

¹⁰ Iti panangiwanwan ti Ari, nagusar dagiti adipen ti Dios iti nagduduma a pamay-an tapno maidanon ti naimbag a damag iti adu a tattao agingga a mabalin. Nangnangruna a napateg daytoy idi “bassit dagiti trabahador.” (Basaen ti Mateo 9:37.) Idi rugrugi ti maika-20 a siglo, nausar dagiti pagiwarnak a mangdanon iti adu a tattao kadagiti lugar a manmano idi dagiti adipen ni Jehova. Linawas nga agipatulod ni Charles Taze Russell iti sermonna iti sumagmamano nga agiwarwarnak. Kalpasanna, ipatulod met dagita nga agiwarwarnak ti sermon kadagiti pagiwarnak idiay United States, Canada, ken Europe. Idi 1913, mapattapatta a 15,000,000 ti nakabasa kadagiti sermon ni Brother Russell iti 2,000 a pagiwarnak.

¹¹ Kalpasan ti ipapatay ni Brother Russell, nangrugi a mausar ti sabali pay nga epektibo a pamay-an a mangisaknap iti naimbag a damag. Idi Abril 16, 1922, ti maysa kadagiti damo a naibrodkas iti radio a palawag ni Joseph F. Rutherford ket nangngegan ti mapattapatta a 50,000 a tattao. Kalpasanna, idi Pebrero 24, 1924, nangrugi nga agibrodkas ti WBBR nga umuna nga estasion ti radio ti organisasion. Maipapan iti daytoy a baro a pamay-an a mangdanon kadagiti tattao, kastoy ti komento ti Disiembre 1, 1924 a The Watch Tower: “Kadagiti amin a nausaren, patienmi a ti radio ti kaekonomiaan ken kaepektibuan a pamay-an ti panangisaknap iti mensahe ti kinapudno.” Kas iti pagiwarnak, nakatulong ti radio a mangdanon iti adu a tattao kadagiti lugar a manmano dagiti agibumbunannag iti Pagarian.

12. (a) Ania a pamay-an ti panangasaba iti publiko ti magustuam unay? (b) Ania ti makatulong tapno maparmektayo ti aniaman a panagnerbios no makipasettayo iti panangasaba iti publiko?

¹² Maipagpaganetget met ita ti panangasaba iti publiko: kadagiti estasion ti bus ken tren, pagparkingan, plasa, ken tiendaan. No agnerbioska a makipaset iti aniaman kadagitoy, agkararagka ken utobem ti komento ni Angelo Manera Jr. a nabayagen nga agdaldaliasat a manangaywan: “Minatmatanmi ti tunggal baro a pamay-an kas sabali pay a panagserbi ken Jehova, kas sabali a pamay-an  a maipakitami a matalekkami kenkuana, kas sabali a pangsubok iti kinatarnawmi, ket magagarankami a mangpaneknek a nakasaganakami nga agserbi kenkuana iti aniaman a pamay-an a kiddawenna.” No makipasettayo iti baro a pamay-an ti panangasaba, mabalin nga uray no saantayo a nakairuaman dayta, makatulong dayta kadatayo nga agtalek ken Jehova ken tumibker ti pammatitayo kenkuana, ket bumileg ti espiritualidadtayo.—Basaen ti 2 Corinto 12:9, 10.

13. Ania ti naaramidan ti website a jw.org, ken ania dagiti kapadasam iti panangipakaammom kadagiti tattao iti dayta a website?

¹³ Adu nga agibumbunannag ti maragragsakan a mangipakaammo kadagiti tattao iti website-tayo a jw.org. Mabalinda ti agbasa ken agi-download ditoy kadagiti naibatay-Biblia a literatura iti nasurok a 700 a lengguahe. Inaldaw a nasurok a 1.6 a milion ti mangluklukat iti website-tayo. Kas iti radio idi, maidandanon itan ti naimbag a damag kadagiti tattao gapu iti dayta a website, uray kadagiti nasulinek a lugar.

14. Ania a pannakasanay ti kasapulan dagiti agibumbunannag iti Pagarian, ken ania nga eskuelaan ti nakatulong kadakuada nga agbalin a nalaing a mannursuro?

¹⁴ Nausigtayon ti dadduma nga alikamen ken pamay-an a nausar tapno maisaknap ti naimbag a damag. Nupay kasta, ania a pannakasanay ti inawattayon? Kasano ngay no saan nga umanamong ti bumalay iti nangngegna a nairekord iti ponograpo, wenno mangipakita iti interes iti nabasana iti testimony card? Masapul a masursuro dagiti agibumbunannag no kasano ti sitataktika a panangsungbat kadagiti sumupiat ken no kasano ti epektibo a panangisuro kadagiti naemma a tattao. Awan duadua a gapu iti panangiturong ti espiritu ti Dios, nakita ni Nathan H. Knorr a masapul a masanay dagiti agibumbunannag a mangusar iti sagut a pannakisao iti ministerio. Ti solusion? Ti Teokratiko nga Eskuelaan ti Panagministro, a damo a naorganisar kadagiti kongregasion idi 1943. Nakatulong kadatayo daytoy nga eskuelaan tapno agbalintayo a nalaing a mannursuro.

15. (a) Ania ti napadasan ti dadduma a nangiparang iti pasetda iti Teokratiko nga Eskuelaan ti Panagministro? (b) Kasano a napaneknekam nga agpayso ti kari ni Jehova a nailanad iti Salmo 32:8?

¹⁵ Para iti adu, mabayag sakbay a mairuamda nga agsao iti sanguanan dagiti tattao. Nalagip ni Julio S. Ramu ti damo a palawagna iti eskuelaan idi 1944. Ti topikona? Ni Doeg, ti lalaki a nadakamat laeng iti lima a bersikulo iti Biblia! Kinuna ni Julio: “Agtintinnim-og dagiti tumengko, agpigpigerger dagiti imak,  ken agngaretnget dagiti ngipenko.” Imbagana pay a masapul a buklenna ti palawagna kadagita a lima a teksto. Kinunana: “Imparangko ti palawagko iti tallo a minuto. Dayta ti damo a palawagko iti entablado, ngem diak simmardeng.” Nakipaset met dagiti ubbing iti dayta nga eskuelaan, nupay saan a nalaka para iti dadduma ti mangiparang iti paset iti kongregasion. Malagip ni Angelo Manera, a nadakamat itay, ti napasamak idi damo a nagpaset ti maysa nga ubing a karugrugina pay laeng nga ageskuela. “Kasta unay ti nerbiosna nga idi inrugina ti pasetna, nangrugi nga agsangit. Ngem gapu ta kayatna nga ileppas dayta, inleppasna ti pasetna uray agsangsangit.” Adda kadi panawen a saanmo a kayat no dadduma ti agkomento wenno makipaset kadagiti gimong gapu ta mabainka wenno pampanunotem a saanmo a kabaelan? Agpatulongka ken Jehova tapno maparmekmo ti butengmo. Tulongannaka a kas iti panangtulongna kadagiti immun-una nga estudiante iti Teokratiko nga Eskuelaan ti Panagministro.—Basaen ti Salmo 32:8.

16. Ania ti panggep ti Gilead School (a) iti napalabas ken (b) manipud idi 2011?

¹⁶ Saan laeng a ti Teokratiko nga Eskuelaan ti Panagministro ti pakasansanayan dagiti adipen ni Jehova. Nagunggonaan dagiti misionero ken ti dadduma iti itatabunoda iti Gilead School. Sigun iti maysa nga instruktor, panggep ti eskuelaan nga “ipaganetget kadagiti estudiante ti ad-adda pay a pannakiramanda iti trabaho a panagebanghelio.” Nangrugi ti Gilead idi 1943, ket manipud idin, adda nasanayen a nasurok a 8,500. Agserserbin dagiti misionero a nasanay iti Gilead iti agarup 170 a pagilian. Manipud idi 2011, dagiti laengen adda iti espesial nga amin-tiempo a panagserbi ti mabalin nga ageskuela—dagiti special pioneer, agdaldaliasat a manangaywan, Bethelite, wenno dagiti misionero a saan pay a nageskuela iti Gilead.

17. Apay a napaneknekan a nagsayaat ti pannakasanay iti Gilead?

¹⁷ Epektibo kadi daytoy a kanayonan a panangsanay? Usigentayo ti maysa a pagarigan. Idi Agosto 1949, awan pay sangapulo nga agibumbunannag idiay Japan. Iti maudi a paset dayta a tawen, 13 a misionero a nasanay iti Gilead ti okupadon a mangaskasaba sadiay. Ita, addan agarup 216,000 nga agibumbunannag idiay Japan, ken dandani 42 a porsiento kadakuada ti agserserbi kas payunir!

18. Ania dagiti eskuelaan a nakatulong kadagiti Saksi a rumang-ay iti naespirituan?

¹⁸ Dadduma nga eskuelaan, kas iti Teokratiko nga Eskuelaan ti Panagministro, Pioneer Service School, School for Kingdom Evangelizers, School for Circuit Overseers and Their Wives, ken ti School for Branch Committee Members and Their Wives, ket dakkel ti naitulongda a nangpabileg iti espiritualidad ken kinaepektibo dagiti adipen ni Jehova. Awan duadua nga itultuloy ti Ari a sanayen dagiti iturayanna!

19. Ania ti komento ni Charles Taze Russell maipapan iti trabaho a panangasaba, ken apay nga agpayso dayta?

¹⁹ Nasurok a 100 a tawenen ti napalabas manipud idi naipasdek ti Pagarian ti Dios. Agtultuloy a sansanayennatayo ti Aritayo a ni Jesu-Kristo. Sakbay ti ipapatay ni Charles Taze Russell idi 1916, nakitana a mapasamak ti nasaknap a trabaho a panangasaba iti masanguanan. Imbagana iti maysa a gayyemna: “Ti trabaho ket sipapartak a rumangrang-ay, ket agtultuloyto daytoy a rumang-ay, ta adda sangalubongan a trabaho a maaramid iti panangikasaba ti ‘ebanghelio ti pagarian iti isuamin a lubong.’” (Faith on the March, ni A. H. Macmillan, p. 69) Agpayso ti imbagana! Agyamantayo ta ti Dios ti talna agtultuloy a mangipapaay iti kasapulantayo iti daytoy kararagsakan a trabaho! Talaga nga ipapaayna kadatayo ti “tunggal naimbag a banag” a kasapulantayo a mangaramid iti pagayatanna!