Binasayo kadi a naimbag dagiti nabiit pay a ruar Ti Pagwanawanan? Bueno, kitaenyo no masungbatanyo dagiti sumaganad a saludsod:

Inton umay ti panungpalan, ania ti dadduma a bambanag nga agpatingga?

Agpatingganto dagiti saan a naballigi a gobierno ti tao, gubat ken kinaawan hustisia, dagiti relihion a nangpaay iti Dios ken kadagiti tattao, ken dagiti di nadiosan a tattao.—5/1, p. 3-5.

Siasino ti Gog iti Magog a nadakamat iti libro ti Ezequiel?

Imbes a tumukoy ken Satanas, agparang a ti Gog iti Magog ket tumukoy iti aliansa dagiti nasion a manggandat a mangtalipupos iti ili ti Dios kalpasan a mangrugi ti dakkel a rigat.—5/15, p. 29-30.

Ania dagiti innem a banag a makatulong tapno agbalin a naragsak ti maysa uray nataenganen?

Ibalakad ti Biblia nga agbalintayo a (1) napakumbaba, (2) balanse, (3) positibo, (4) naparabur, (5) mannakigayyem, ken (6) managyaman. No ipakitatayo dagita, makatulong tapno agbalintayo a naragsak uray nataengantayon.—6/1, p. 8-10.

Kasano a makitatayo kadagiti milagro ni Jesus ti kinaparaburna?

Iti maysa a kasar idiay Cana, pinagbalin ni Jesus nga arak ti 380 a litro a danum. Iti sabali pay a gundaway, simimilagro a pinakanna ti nasurok a 5,000 a tattao. (Mat. 14:14-21; Juan 2:6-11) Kadagita a gundaway, tultuladen ni Jesus ti kinaparabur ni Amana.—6/15, p. 4-5.

Nupay imperpektotayo, apay a masiguradotayo a posible a maparagsaktayo ti Dios?

Nakaaramid met iti kamali da Job, Lot, ken David. Nupay kasta, kayatda ti agserbi iti Dios, nagbabawyanda dagiti nagkamalianda, ken nagbalbaliwda. Nagun-odda ngarud ti anamong ti Dios. Mabalin met a magun-odtayo dayta.—7/1, p. 12-13.

Ti kadi pannakadadael ti Babilonia a Dakkel agbanagto iti pannakapapatay ti amin a sigud a miembrona?

Saan. Ibaga ti Zacarias 13:4-6 nga uray ti dadduma a lider ti relihion panawandanto ti relihioso a kabibiagda ken ilibakda a sigud a kamengda ti ulbod a relihion.—7/15, p. 15-16.

Apay a kayat laeng ni Barak ti mapan makigubat no kumuyog ni Debora kenkuana?

Nabileg ti pammati ni Barak. Imbes a dumawat ken Jehova iti kanayonan nga armas, kayatna nga adda sadiay ti pannakabagi ti Dios—ni Debora—a mangpabileg kenkuana ken kadagiti soldadona. (Uk. 4:6-8; 5:7)—8/1, p. 13.

Ania ti dadduma a bambanag a mabalin nga utoben ti maysa a Kristiano?

Mabalin nga utobentayo dagiti parsua ni Jehova, ti pateg ti naipaltiing a Saona, ti pribilehiotayo nga agkararag, ken ti subbot a naayat a sagutna.—8/15, p. 10-13.

Ania ti pakainaigan ti panangliklik kadagiti dakes a kakadua iti pannakideyt?

Ipakitatayo ti nasayaat a kababalin uray kadagiti saantayo a kapammatian. Ngem maikontra iti bilin ti Dios no makideyt ti maysa a Kristiano iti saan a dedikado ken saan a matalek kadagiti pagalagadan ti Dios. (1 Cor. 15:33)—8/15, p. 25.

Kasano a kimmapuy ti pammati ni Pedro, ngem bimmileg met laeng idi agangay?

Gapu iti pammati, nagna ni apostol Pedro iti rabaw ti danum a napan ken Jesus. (Mat. 14:24-32) Nagbuteng ni Pedro idi nakitana ti bagyo. Ngem impamaysana manen ti panunotna ken Jesus ket inawatna ti tulongna.—9/15, p. 16-17.

Kuna ti Aramid 28:4 nga impapan dagiti taga-Malta a maysa a mammapatay ni apostol Pablo. Apay a kasta ti impagarupda?

Idi kinagat ti karasaen ni Pablo, impagarup dagiti taga-Malta a dusdusaen ni Dike, ti diosa ti hustisia.—10/1, p. 9.

Ania a leksion ti maadaltayo iti pannakasinga ni Marta kadagiti ar-aramidenna?

Nasinga ni Marta gapu iti panangisaganana iti adu a naimas a taraon. Imbaga ni Jesus a pinili ti kabsatna ti nasaysayaat a banag ta dimngeg iti pannursurona. Masapul a siguraduentayo a saan a masinga dagiti naespirituan nga aktibidadtayo gapu kadagiti saan a napateg a bambanag.—10/15, p. 18-20.