KAS ipakita dagiti komento da John ken Carol, ti pannakapadakkelyo ket mabalin a dakkel ti epektona iti wagas ti panangdisiplinayo kadagiti annakyo. No agduma ti kasasaad ti pamilia a dimmakkelan dagiti agassawa, mabalin nga agduma unay ti panangsanayda kadagiti annakda. No dadduma, daytoy ti pakaigapuan dagiti parikut ti agassawa.

Ti pannakapaksuy mabalin a pakaruenna ti parikut. Dagiti agdadamo a nagannak mariknada inton agangay a makabannog ken agkalikagum iti panawen ti panangdisiplina iti annak. Ni Joan, a kadua ni lakayna a Darren a nangpadakkel kadagiti dua a babbalasangda, kinunana: “Ay-ayatek dagiti annakko, ngem manmanodak nga ipangag no ibagak a maturogdan. Agriingda uray oras ti pannaturog. Sumampitawda uray   agsasaoak pay laeng. Iwarada lattan dagiti sapatos, kawes, ken ay-ayamda ken dida ammo nga isubli iti repridyeretor ti inusarda a mantekilia.”

Idi nagpasar ni baketna iti postpartum depression kalpasan a naipasngay ti maikadua nga anakda, kuna ni Jack: “Masansan nga agawidak a nabannog manipud trabahok ken agpuyatak pay agingga iti tengnga ti rabii a mangasikaso iti maladagami. Daytoy ti nangparigat iti panangdisiplinami iti in-inauna nga anakmi. Agimon no asikasuenmi ti adingna.”

No agsupiat dagiti nabannog a nagannak gapu iti panangsanayda iti anakda, mabalin nga agbanag iti nakaro a panagsubang uray dagiti bassit laeng a di pagkinnaawatan. No saan a marisut dayta, bumaaw ti relasion ti agassawa ken mabalin a gundawayan dayta ti anakda tapno maalana ti kayatna babaen ti pananggun-odna iti simpatia ti maysa kadakuada. Ania dagiti prinsipio ti Biblia a makatulong iti agassawa a mangtaginayon iti kinasingedda bayat a sansanayenda a sieepektibo dagiti annakda?

Masapul a naikumit dagiti agassawa iti maysa ken maysa sakbay a maaddaanda iti annak ken nairanta nga agtalinaed dayta uray pumanawton dagiti annakda iti pagtaengan. Mainaig iti relasion ti agassawa, kuna ti Biblia: “Ti pinagsinnangol ti Dios saan koma a pagsinaen ti tao.” (Mateo 19:6) Iti sabali a bangir, ipakita daytoy a teksto a panggep ti Dios nga inton agangay, ti anak “panawannanto ti amana ken ti inana.” (Mateo 19:5) Kinapudnona, ti panangpadakkel kadagiti annak ket saan a pundasion ti panagasawa no di ket pasetna laeng dayta. Pudno, masapul a mangbusbos dagiti nagannak iti adu a tiempo a mangsanay kadagiti annakda, ngem laglagipenda a maaramidda laeng dayta no nalagda ti relasionda nga agassawa.

Ania ti maysa a pamay-an a mapalagda ti agassawa ti relasionda bayat a dumakdakkel dagiti annakda? Agingga a mabalin, regular a mangbusboskayo iti tiempo a dakdakayo a dua. Mangted dayta iti gundaway tapno mapagsaritaanyo dagiti napateg a pakaseknan ti pamiliayo ken tapno matagiragsakyo ti panagkaduayo nga awan dagiti annakyo. Ngem bigbigentayo a maysa dayta a karit. Kuna ni Alison, ti ina a nadakamat itay: “Kadagiti gundaway a mabalinmi koman ti aglangen ken lakayko, ringgorennakam ti buridekmi wenno agalboroto ti innem ti tawenna nga anakmi, kas pagarigan no dina mabirokan ti krayolana.”

Da Joan ken Darren, a nadakamat itay, ket naaddaan iti panawen iti maysa ken maysa babaen ti panangipatungpalda iti masnup nga oras a pannaturog dagiti annakda. Kinuna ni Joan: “Adda naikeddeng nga oras a masapul a maturogen dagiti annakmi. Dayta ti nangted kadakami ken Darren iti panawen nga agrelaks ken agsarita.”

No adda masnup nga oras ti pannaturog dagiti ubbing, saan laeng a maaddaan dagiti agassawa iti ad-adu a panawen para iti bagida no di pay ket masursuruan ti ubing tapno “saanna a panunoten nga ad-adda ti bagina ngem iti rebbengna a panangpanunot.” (Roma 12:3) Inton agangay, dagiti ubbing a nasanay nga agtulnog kadagiti pagalagadan mainaig iti pannaturog maamirisdanto a saan laeng nga isuda ti napateg a kameng ti pamilia. Masapul nga agtulnogda iti pagannurotan ti pamilia imbes a dayta ti maisakripisio tapno laeng mapagustuan ti kayatda.

Kuna ti nainsiriban a proverbio: “Umimdengka, anakko, iti disiplina ni amam, ket saanmo a baybay-an ti linteg ni inam.” (Proverbio 1:8)  Ipakita daytoy a bersikulo ti Biblia nga agpada nga adda kalintegan ti ama ken ina a mangipakat iti autoridadda kadagiti annakda. Nupay kasta, uray agpada ti kasasaad ti pamilia a dimmakkelan ti agassawa, mabalin nga agdumada no iti panangsanay kadagiti annak ken no ania a pagalagadan ti pamilia ti ipakat iti partikular a kasasaad. Kasano a mapagballigian dagiti nagannak daytoy a karit?

Kuna ni John, a nadakamat itay, “Naamirisko a nasken a liklikanmi ti agsubang iti imatang dagiti annakmi.” Nupay kasta, inaminna a narigat nga aramiden dayta. Intuloy ni John: “Nalaka a makadlaw dagiti ubbing. Uray saankami a berbal nga agsubang, marikna latta dayta ti balasangmi.”

Kasano a tinaming da John ken Alison dayta a karit? Kuna ni Alison: “No diak umanamong iti pamay-an ni lakayko a mangdisiplina iti balasangmi, urayek a makaadayo ti anakmi sakbay nga ilawlawagko ti kapanunotak iti asawak. Diak kayat a gundawayanna ti nagduma a panangmatmatmi ken lakayko tapno maalana ti kayatna. No madlawna nga adda dimi pagtunosan ken tatangna, ibagak iti balasangko a masapul nga agtulnog ti tunggal kameng ti pamilia iti urnos ni Jehova isu a masapul nga agpasakupak iti kinaulo ni tatangna. Iti kasta, isu ket masapul met nga agpasakup iti autoridadmi kas nagannakna.” (1 Corinto 11:3; Efeso 6:1-3) Kuna ni John: “No addakami amin a sangapamiliaan, gagangay a siak ti mangdisiplina kadagiti babbalasangmi. Ngem no ad-adda a pamiliar ni Alison iti kasasaad, ipalubosko nga isu ti mangdisiplina ket suportarak. No adda dimi pagtunosan mainaig iti disiplina, pagsaritaanminto dayta kalpasanna.”

Kasanoyo a maliklikan nga agresulta iti sakit ti nakem ti diyo panagtunos iti wagas ti panangdisiplinayo iti anakyo—a mabalin mangikkat iti panagraem dagiti annakyo kadakayo?

Awan duadua a kasapulan ti kinapinget iti panangsanay kadagiti annak. No dadduma, mabalin a makabannog. Ngem inton agangay, pumanaw dagiti annakyo iti poderyo, ket mariknayonto a kasla nasingsingedkayo manen kas agassawa. Ti kadi panangpadakkelyo kadagiti annak palagdaenna wenno pakapuyenna ti relasionyo nga agassawa? Agpannuray dayta iti panangyaplikaryo a naimbag iti prinsipio a masarakan iti Eclesiastes 4:9, 10: “Ti dua nasaysayaat ngem iti maysa, agsipud ta addaanda ti naimbag a gunggona gapu iti napinget a panagtrabahoda. Ta no ti maysa kadakuada matuang, daydiay sabali mabalinna a bangonen ti kaduana.”

No agtinnulong dagiti agassawa, mabalin a makapnek unay ti resultana. Ni Carol, a nadakamat itay, inyebkasna ti riknana: “Ammok nga adu ti makaay-ayo a galad ni lakayko, ngem naammuak ti dadduma pay a naimbag a galadna bayat ti panagtinnulongmi a nangpadakkel kadagiti annakmi. Immuneg ti panagraem ken panagayatko kenkuana bayat a naimatangak ti naayat a panangasikasona kadagiti babbalasangmi.” Maipapan ken Alison, kuna ni John: “Immuneg ti panagayat ken panagraemko ken baketko bayat a naimatangak ti panagbalinna a nadungngo nga ina.”

No mangiwayakayo iti panawen para iti asawayo ken no agtinnulongkayo a mangpadakkel kadagiti annakyo, lumagda ti panagasawayo bayat nga agmataengan dagiti annakyo. Adda pay kadi nasaysayaat nga ulidan a maipakitayo kadagiti annakyo?