4 Iwaksim Dagiti Panagduaduam

“Sika a bassitan pammati, apay a nagduaduaka?”​—Mateo 14:31.

ANIA TI LAPPED? Adda idi dagiti gundaway a nagduadua uray dagiti adalan ni Jesus. (Mateo 14:30; Lucas 24:36-39; Juan 20:24, 25) Kinapudnona, ti Biblia deskribirenna ti kinakurang ti pammati kas “ti basol a silalaka a mangsagud kadatayo.” (Hebreo 12:1) Insurat ni apostol Pablo: “Ti pammati saan nga ik-ikutan dagiti amin a tattao.” (2 Tesalonica 3:2) Di kaipapanan dayta a saan a kabaelan ti dadduma nga iparangarang dayta a galad. Imbes ketdi, adu ti saan nga agregget a mangpatanor iti dayta. Bendisionan ti Dios dagidiay mangikagkagumaan a mangpatanor iti pammatida.

KASANOM A MAPAGBALLIGIAN TI LAPPED? Ammuem dagiti makagapu no apay nga agduaduaka. Kas pagarigan, pinagduaduaan ni adalan a Tomas ti panagungar ni Jesus, nupay imbagan ti dadduma nga adalan nga isu ket nakitadan. Kayat ni Tomas a mapaneknekan dayta. Ania ti resultana? Isu  ket impaayan ni Jesus iti pammaneknek a kasapulanna tapno bumileg ti pammatina.​—Juan 20:24-29.

Babaen iti Biblia, mangipapaay ni Jehova a Dios kadagiti pammaneknek a kasapulantayo tapno maiwaksi dagiti panagduaduatayo. Kas pagarigan, adu ti saanen a mamati iti Dios. Ngamin, isu ti direkta wenno saan a direkta a pabasolenda kadagiti gubat, kinaranggas, ken panagsagaba a mapaspasaran ti sangatauan. Ania ti ibaga ti Biblia maipapan iti dayta?

Saan nga agturay ti Dios babaen kadagiti gobierno ti tao. Ni Jesus tinukoyna ti di makita nga espiritu nga agnagan iti Satanas kas “ti agturay iti lubong.” (Juan 14:30) Intukon ni Satanas ken Jesus ti autoridad a mangituray kadagiti amin a pagarian ditoy daga no la ket ta mangaramid iti maysa a tignay a panagdayaw kenkuana, a kunkunana: “Itedkonto kenka amin daytoy nga autoridad ken ti dayagda, agsipud ta nayawat kaniak, ket iti asinoman a kayatko itedko dayta.” Ammo ni Jesus a pudno nga adda ti kasta nga autoridad ni Satanas ta kinunana: “Adda a naisurat, ‘Ni Jehova a Diosmo ti masapul a daydayawem, ket kenkuana laeng ti masapul a pangipaayam ti sagrado a panagserbi.’” (Lucas 4:5-8) Saan a ti Dios no di ket ni Satanas ken dagiti gobierno ti tao ti mapabasol iti panagsagaba ti sangatauan.​—Apocalipsis 12:9, 12.

Asidegen nga ikkaten ni Jehova a Dios ti amin a makagapu iti panagsagaba. Nangyurnosen iti maysa a Pagarian, wenno gobierno, nga idauluan ti Anakna a ni Kristo Jesus, a mangituray iti sangatauan. (Mateo 6:9, 10; 1 Corinto 15:20-28) Kas kaitungpalan ti padto ti Biblia, ti naimbag a damag maipapan iti dayta a Pagarian ket maikaskasaban iti intero a daga. (Mateo 24:14) Asidegen nga ikkaten dayta a Pagarian ti amin a bumusbusor iti dayta ken pagpatinggaenna dagiti makagapu iti panagsagaba ti tao.​—Daniel 2:44; Mateo 25:31-33, 46; Apocalipsis 21:3, 4.

ANIA TI GUNGGONA? Dagidiay agduadua ket umasping kadagiti dalluyon nga iyallo-allon ti “tunggal angin ti sursuro babaen ti panangallilaw dagiti tattao, babaen ti kinasikap iti panangparnuay iti biddut.” (Efeso 4:14; 2 Pedro 2:1) Iti sabali a bangir, dagidiay mangbirok kadagiti makapnek a sungbat kadagiti saludsodda ket kabaelanda ti ‘agtakder a sititibker iti pammati.’​—1 Corinto 16:13.

Dagiti Saksi ni Jehova a mangipabpablaak iti daytoy a magasin, kayatdaka a tulongan a mangbirok kadagiti sungbat iti salsaludsod a mabalin a manglapped iti itatanor ti nabileg a pammatim. Aw-awisendaka a makikadua kadakuada tapno masukimatmo a mismo dagiti pannursuroda. No aramidem dayta, ad-addanto a bumileg ti pammatim iti Dios.

Para iti ad-adu pay nga impormasion, kitaem ti kapitulo 8 nga “Ania ti Pagarian ti Dios?” ken kapitulo 11 nga “Apay nga Ipalubos ti Dios ti Panagsagaba?” iti libro nga Ania a Talaga ti Isursuro ti Biblia? *

[Footnote]

[Ladawan iti panid 9]

Dagidiay mangbirok kadagiti makapnek a sungbat iti salsaludsodda ket maaddaan iti natibker a pakaibasaran ti pammatida