Ti Masursurotayo ken Jesus

Maipapan iti “Panungpalan”

Ania ti manungpal?

Dagiti adalan ni Jesus nagdamagda kenkuana: “Anianto ti pagilasinan ti kaaddam ken ti panungpalan ti sistema ti bambanag?” (Mateo 24:3) Idi sinungbatanna dayta a saludsod, saan a kinuna ni Jesus nga agpatingga ti literal a daga. Kasakbayan dayta, dinakdakamatnan “ti sistema ti bambanag” ken inusarna dayta a tumukoy iti intero a napolitikaan, nakomersialan, ken narelihiosuan a sistema a konkontrolen ni Satanas. (Mateo 13:22, 40, 49) Dayta ngarud ti sistema a pampanunotenna idi kinunana: “Umayton ti panungpalan.”​—Mateo 24:14.

Kasano a dineskribir ni Jesus ti panungpalan?

Ti panungpalan daytoy nakillo a sistema ket “naimbag a damag.” Kinuna ni Jesus: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.” Kastoy ti panangdeskribir ni Jesus iti panungpalan daytoy agdama a sistema ti bambanag: “Addanto dakkel a rigat a dayta ket saan pay a napasamak nanipud idi pangrugian ti lubong agingga ita, saan, saanto met a mapasamak manen. Iti kinapudnona, malaksid no napaababa dagidiay nga aldaw, awan ti lasag a maisalakan.”​—Mateo 24:14, 21, 22.

Siasinonto dagiti madadael?

Dagidiay laeng saan a mangay-ayat ken saan nga agserserbi kada Jehova ken Jesus ti madadael. Dagita a tattao dida agtultulnog iti Dios. Kinuna ni Jesus: “Kas idi kaaldawan ni Noe, kastanto ti kaadda ti Anak ti tao. Ta kas kadakuada kadagidi nga aldaw kasakbayan ti layus, . . . saanda a nangikankano agingga nga immay ti layus ket inyanudna amin ida.” (Mateo 24:36-39) Sigun ken Jesus, adu ti adda iti dalan  nga agturong iti pannakadadael. Nupay kasta, impatalgedna nga adda ‘nailet a dalan nga agturong iti biag.’​—Mateo 7:13, 14.

Kaano nga agpatingga daytoy a sistema ti bambanag?

Idi dinamagda kenkuana ti pagilasinan ti kaaddana “ken ti panungpalan ti sistema ti bambanag,” insungbat ni Jesus: “Ti nasion tumakderto a bumusor iti nasion ken ti pagarian a bumusor iti pagarian, ket addanto dagiti kinakirang ti taraon ken dagiti ginggined . . . ket gapu iti iyaadu ti kinakillo, ti ayat ti ad-adu lumamiisto.” (Mateo 24:3-12) Gapuna, adda makaparegta a kaipapanan ti amin a nakalkaldaang a padamag ita​—dandanin ipaay ti Pagarian ti Dios ti talna iti natulnog a sangatauan. Kinuna ni Jesus: “Inton makitayo a mapaspasamak dagitoy a banag, ammuenyo a ti pagarian ti Dios asidegen.”​—Lucas 21:31.

Ania ti rumbeng nga aramidem?

Kinuna ni Jesus a ti Dios “intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.” (Juan 3:16) Tapno maaddaanka iti pammati iti Dios ken iti Anakna, nasken nga am-ammuem ida a naimbag. Gapuna, imbaga ni Jesus: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.”​—Juan 17:3.

Agannadka tapno dagiti pakaringgoran ken parparikut didaka lapdan a mangammo no kasano a maipakitam ti panagayatmo iti Dios. Kinuna ni Jesus: “Asikasuenyo ti bagbagiyo tapno dagiti pusoyo saanda a pulos madagsenan . . . kadagiti pakaringgoran iti biag, ket giddato a dayta nga aldaw kellaat nga umay kadakayo kas maysa a silo. Ta dumtengto dayta.” No ipangagmo ti pakdaar ni Jesus, ‘makapagballigika iti pananglisi kadagitoy amin a banag a naikeddeng a mapasamak.’​—Lucas 21:34-36.

Para iti ad-adu pay nga impormasion, kitaem ti kapitulo 9 nga “Agbibiagtayo Kadin Kadagiti ‘Maudi nga Aldaw’?” iti libro nga Ania a Talaga ti Isursuro ti Biblia? *

[Footnote]