Panagrag-o iti Laksid Dagiti Sakitko

Kas Insalaysay ni Paulette Gaspar

Nupay tallo a kilo ti timbangko idi naipasngayak, ammo ti doktor nga adda nakaro a sakitko. Kabayatan ti pannakayanakko, natukkol ti dadduma a tulangko. Addaanak iti natawid a sakit nga “osteogenesis imperfecta” wenno narasi a tultulang. Dagus nga inoperaandak ngem saan a nangnamnama dagiti doktor a malasatak dayta. Ekspektarenda a matayak iti uneg ti 24 nga oras.

NAIPASNGAYAK idi Hunio 14, 1972 idiay Canberra, siudad a kabesera ti Australia. Maikontra iti amin a pagarupda, nalasatak dayta nga aldaw. Ngem naaddaanak iti pulmonia. Gapu ta impapan dagiti doktor a dandaniak met laengen matay, didakon inikkan iti aniaman nga agas ngem kaskasdi a nakalasatak.

Nakarigrigat la ketdi dayta a tiempo para kadagiti nagannakko. Gapu ta nagbassit ti tsansak a makalasat, kinuna dagiti maseknan a doktor ken nars kadagiti nagannakko a dida unay isingsinged ti riknada kaniak. Kinapudnona, iti immuna a tallo a bulan a pannakaospitalko, di man la napalubosan dagiti nagannakko a mangsagid kaniak amangan ta matukkol dagiti narasi a tulangko. Idi nabataden a makalasatak, insingasing dagiti doktor kadagiti nagannakko nga iyakardak iti pagtaengan a pakaasikasuan dagiti baldado nga ubbing.

Nupay kasta, inkeddeng dagiti nagannakko nga iyawiddak idiay balaymi. Ngamin, ni nanangko ket makipagad-adalen iti Biblia kadagiti Saksi ni Jehova. Gapu kadagiti maad-adalna, ad-adda a nariknana ti obligasionna a mangaywan kaniak. Ngem narigatan la ketdi a makisinninged kaniak, yantangay makapaupay ken makapaksuy ti kasapulak a kasta unay a panangasikaso. Masansan a mayospitalak. Uray no digusendak wenno agbaenak laeng, mabalinen a matukkol dagiti tulangko.

Naldaangak

Bayat a dumakdakkelak, kanayonak a naka-wheelchair. Diak pulos nasursuro ti magna. Nupay narigatan dagiti nagannakko, nagsayaat ti panangasikasoda kaniak.

Inkagumaan met ni nanangko nga isuro kaniak ti makaliwliwa a mensahe ti Biblia. Kas pagarigan, insurona nga iti masanguanan, pagbalinen ti Dios a paraiso ti daga a pagnaedan ti amin a tattao a perpekton ti naespirituan, mental, ken pisikal a salun-atda. (Salmo 37:10, 11; Isaias 33:24) Nupay kasta, sipaprangka nga inamin ni nanangko a kasla imposiblen a sumayaat ti kasasaadko malaksid no dumteng dayta a tiempo.

 Idi damo, nagadalak iti eskuelaan dagiti baldado. Dagiti mannursuro didak pinaregta a mangragpat kadagiti kalat, isu nga awan ti aniaman a kalatko para iti bagik. Kinapudnona, ti laengen panageskuela ket maysan a dakkel a karit. Naulpit kaniak ti adu a kaeskuelaak. Idi agangay, nagadalak iti gagangay nga eskuelaan. Nadlawko a makabannog, makapaupay, ken makariribuk ti panagsursurok a makilangen iti sabsabaIi. Kaskasdi nga inkarigatak a tinurpos ti 12 a tawen a panageskuelak.

Nangruna idi addaakon iti haiskul, pinampanunotko ti kinaawan namnama ken ti kinaawan direksion ti biag dagiti kaeskuelaak. Pinampanunotko met ti mensahe ti Biblia nga insuro kaniak ni nanangko. Ammok a pudno dagiti insurona. Ngem diak pay la idi naipapuso dagiti sursuro ti Biblia. Inkeddengko a paragsaken ti biagko a diak man la pinampanunot ti masanguanan.

Idi agtawenak iti 18, pimmanawak iti poder ti dadakkelko ket nakipagnaedak iti maysa a grupo dagiti padak a baldado. Naragsakanak iti dayta nga iyaakarko ngem adda met panagdanagko. Makaay-ayo unay ti kabbaro a wayawayak, ti kaadda ti gagayyemko, ken ti pannakikadkaduak kadakuada. Adu a gagayyemko ti nakiasawa. Kayatko met koma ti maaddaan iti asawa ken katakunaynay ngem gapu iti kasasaad ti salun-atko, saan a praktikal a makiasawaak. Naldaangak gapu iti dayta.

Nupay kasta, diak pulos impabasol iti Dios ti kasasaadko. Adun ti naammuak maipapan iti Dios isu nga ammok a di pulos agaramid iti aniaman a di nainkalintegan. (Job 34:10) Inkagumaak nga akseptaren ti kasasaadko ngem nakaro latta ti panagleddaangko.

In-inut a Simmayaat ti Riknak

Naimbag laengen ta naammuan ni nanangko ti sasaadek isu a kinasaritana ti maysa kadagiti panglakayen iti kongregasion nga agnanaed iti asideg ti pagnanaedak. Dayta a panglakayen tineleponuan ken inawisnak a makigimong iti Kingdom Hall dagiti Saksi ni Jehova iti dayta a lugar. Kasta met nga adda maysa a Saksi a linawas a nangyadal kaniak iti Biblia.

Yantangay naipalagip kaniak dagiti kinapudno iti Biblia nga insuro ni nanangko idi ubingak pay, simmayaat ti panangmatmatko iti biag. Naragsakanak iti pannakikaduak kadagiti padak a Kristiano. Ngem inkeddengko a diak makisinninged iti asinoman tapno saanak a masair. Panagkunak, dayta ti makagapu a diak unay narikna ti nauneg a panagayatko iti Dios. Nupay kasta, ammok a rumbeng laeng nga idedikarko ti biagko kenkuana isu nga idi Disiembre 1991, nabautisaranak kas simbolo ti dedikasionko.

Pinanawak ti pagnanaedak nga ayan dagiti padak a baldado ket nagnaedak a bukbukodko iti maysa nga apartment. Adu ti nagsayaatan dayta ngem adda met dagiti problema. Kas pagarigan, malidlidayak idi. Mabutengak met di la ket ta addada lallaki a mangserrek iti pagnanaedak. Di nagbayag, simken manen ti nakaro a panagleddaangko. Nupay diak ipadpadlaw dayta ken masansan a nakaisemak, ti kinaagpaysona ket nakalidlidayak. Il-iliwek ti maaddaan iti nasayaat ken mapangnamnamaan a gayyem.

Nariknak nga impaayannak ni Jehova a Dios iti kasta a gayyem. Dagiti panglakayen iti kongregasionmi siaasi nga inyurnosda ti agtultuloy a panagadalko iti Biblia a kadua ni Suzie, a maysa a naasawaan a kabsat. Saannak la a sinuruan ni Suzie no di ket nagbalin pay a nasinged a gayyemko a dungdungnguek unay.

Sinanaynak ni Suzie a mangiranud kadagiti maad-adalko​—babaen iti panangasaba iti binalaybalay ken iti nadumaduma pay a pamay-an. Ad-adda itan nga apresiarek dagiti galad ti Dios. Ngem nupay bautisadoakon, saan pay a nauneg ti panagayatko iti Dios. Naminsan, pinampanunotko payen nga isardeng ti panagserbik kenkuana. Impudnok dayta ken Suzie,  ket tinulongannak a mapagballigiak dayta a pakarigatan.

Impaamiris met kaniak ni Suzie a ti kaaduan a makagapu iti panagleddaangko ket ti pannakikadkaduak kadagiti saan a nauneg ti panagayatda ken Jehova. Gapuna, nakigayyemak kadagiti nabileg ti pammatida iti Dios, nangruna kadagiti natataengan. Adda met dimi nagkinnaawatan idi ken nanangko isu nga inkagumaak a maisubli ti nasayaat a relasionko kenkuana ken iti manongko. Diak ninamnama a makariknaak iti napalaus a ragsak a diak pay pulos idi a narikna. Dagiti kapammatiak, kapamiliak, ken nangnangruna ni Jehova ti nagbalin a gubuayan ti rag-o ken pigsak.​—Salmo 28:7.

Baro a Karera

Iti maysa kadagiti palawag iti kombension a natabunuak, naipaganetget dagiti rag-o a sagsagrapen ti adu nga agserserbi iti amin-tiempo a Nakristianuan a ministerio. Ammok a kabaelak met ti kasta a panagserbi. Siempre, napampanunotko a marigatanak. Ngem kalpasan nga inusigko dayta buyogen ti kararag, inkeddengko nga isumite ti aplikasionko nga agbalin a payunir, kas pangawag kadagiti amin-tiempo a mannursuro iti Biblia. Idi Abril 1998, rinugiakon dayta a karerak.

Kasanoak a makapangasaba idinto ta kastoyak? Nairuamak a di unay agpannuray iti sabsabali no adda aramidek ken papanak, ket diak kayat ti agbalin a dadagsen iti dadduma. Gapuna, insingasing ti agassawa a da Suzie ken Michael a gumatangak iti motorsiklok. Ngem kasano koma a makapagmotorsikloak? Kas makita iti retrato, espesial a nadisenio ken naaramid ti motorsiklok a para laeng kaniak. Diak pay ketdin kasapulan ti dumsaag iti wheelchair-ko tapno laeng maisaltak iti dayta ti bagik a 19 a kilo!

Gapu iti dayta, masarungkarak dagiti tattao ken mayadalak ida iti Biblia kadagiti oras a kombiniente kadakuada ken kasta met kaniak. Maay-ayatanak nga agmotorsiklo ken mangrikna iti pul-oy ti angin!

Magusgustuak a kasarita dagiti tattao iti kalsada a kaaduanna ket nadayaw ken managraem kaniak. Maragsakanak a tumultulong iti sabsabali a mangammo maipapan iti Biblia. Malagipko pay ti naminsan a panangasabak iti binalaybalay a kaduak ti maysa a natayag a kapammatian. Kinablaawanna ti bumalay. Masmasdaaw ti bumalay a nangmingming kaniak sana dinamag iti kaduak no makapagsaoak. Uraykam la a nakakatawa. Idi nakasabaakon dayta a babai, masiertonan a talaga a kabaelak ti agsao!

Naragsak itan ti biagko ken nasursurokon nga ayaten ni Jehova a Dios. Agyamanak unay ken nanangko gapu iti panangisurona kaniak kadagiti kinapudno ti Biblia. Buyogen ti panagtalek, segseggaak ti asidegen a masanguanan inton ti Dios ‘pagbalinenna a baro ti amin a bambanag,’ agraman ti bassit a bagik.​—Apocalipsis 21:4, 5.

[Blurb iti panid 30]

“Inkagumaak nga akseptaren ti kasasaadko ngem nakaro latta ti panagleddaangko”