Tuladenyo ti Pammatida

Pinarmekna ti Panagbuteng ken Panagduadua

BAYAT nga aggagaud ni Pedro iti rabii, palpaliiwenna ti aglawlaw. Lawag kadi ti makitkitana iti daya, a pagilasinan nga agbannawagen? Naktangen ti bukot ken abagana gapu iti adu nga oras a panaggaudna. Pumigpigsan ti angin isu a dimmawel ti Baybay ti Galilea. Nabasan gapu ta masapsaprian kadagiti umab-ablat a dalluyon iti sungo ti bangkana. Intultuloyna ti naggaud.

Idi adda pay da Pedro ken dagiti kakaduana iti takdang, imbatida nga agmaymaysa ni Jesus. Iti dayta nga aldaw, naimatanganda ti panangpakan ni Jesus kadagiti mabisin a rinibu a tattao babaen ti sumagmamano laeng a tinapay ken ikan. Gapuna, kayat dagiti tattao a ni Jesus ti agbalin nga arida ngem dina kayat ti makipaset iti politika. Kayatna met a kasta ti aramiden dagiti pasurotna. Iti panangliklik ni Jesus iti bunggoy, imbilinna kadagiti adalanna nga agluganda iti bangka ket mapanda iti bangir a takdang bayat nga isu ket napan iti bantay tapno agkararag a maymaysa.​—Marcos 6:35-45; Juan 6:14, 15.

Nakatangkayagen ti dandani kabus a bulan idi nagpabaybay dagiti adalan, ngem ita lumlumneken iti laud. Kaskasdi, sumagmamano pay laeng a kilometro ti nadaliasatda. Napigsa ti angin ken dalluyon isu a saanda a makapagsasarita. Isu a nalabit a nauneg ti pampanunoten ni Pedro.

Adu a talaga ti mabalinna a panunoten! Nasuroken a dua a nakallalagip a tawen a kumuykuyog ken Jesus. Adun ti nasursurona ngem adu pay ti masapul a sursuruenna. Ti kinatulokna a makasursuro​—a mangdaer kadagiti lapped a kas iti panagduadua ken panagbuteng​—ti namagbalin kenkuana a nagsayaat a pagwadantayo. Kitaentayo no kasano.

“Nasarakanmi ti Mesias”!

Pulos a di malipatan ni Pedro ti aldaw a naam-ammona ni Jesus a taga-Nazaret. Ti kabsatna a ni Andres ti damo a nangidanon kenkuana iti makapainteres a damag: “Nasarakanmi ti Mesias.” Babaen kadagita a sasao, nangrugi ti dakkel a panagbalbaliw iti biag ni Pedro.​—Juan 1:41.

Agnanaed idi ni Pedro idiay Capernaum, maysa a siudad iti asideg ti dan-aw a maawagan iti Baybay ti Galilea. Kaduada ken Andres dagiti annak ni Zebedeo a da Santiago ken Juan iti negosio a panagkalap. Masapul idi a suportaran ni Pedro ti baketna, ti babai a katuganganna, ken ni Andres a makipagnanaed kadakuada. Sigurado nga agkalikagum dayta iti kinagaget, pigsa, ken iti panagbalin a manangipamuspusan. Mailadawantayo ti di mabilang a panagpuyatda tapno agkalap​—iwayatda ti iket, iguyod dayta ti dua a bangka, sa iyaonda dagiti nakalapda. Mailadawantayo met ti makabannog nga agmalem, bayat a paglalasinenda dagiti ikan, ilakoda, sa tarimaanen ken dalusanda dagiti iket.

Ibaga ti Biblia a ni Andres ket adalan ni Juan a Mammautisar. Sigurado a sigagagar nga immimdeng ni Pedro iti impadamag ti kabsatna maipapan iti mensahe ni Juan. Naminsan, nangngeg ni Andres ti kinuna ni Juan bayat nga intudona ni Jesus a taga-Nazaret: “Kitaenyo, Ti Kordero ti Dios!” Dagus a nagbalin ni Andres a pasurot ni Jesus ken sigagagar nga imbagana ken Pedro daytoy a makapikapik a damag: Dimtengen ti Mesias! (Juan 1:35-40) Kalpasan ti  iyaalsa idiay Eden agarup 4,000 a tawen sakbayna, inkari ni Jehova a Dios nga addanto umay a naisangsangayan nga indibidual a mangipaay iti pudno a namnama iti sangatauan. (Genesis 3:15) Naam-ammo a mismo ni Andres daytoy a Manangispal, ti mismo a Mesias! Nagdardaras ni Pedro a simmabat ken Jesus.

Sakbayna, ni Pedro ket pagaammo iti nagan a Simon, wenno Simeon. Ngem kinuna kenkuana ni Jesus: “‘Sika ni Simon nga anak ni Juan; maawagankanto iti Cefas’ (a naipatarus a Pedro).” (Juan 1:42) Ti “Cefas” ket gagangay a sao a kaipapananna “bato.” Nalawag a naimpadtuan dayta a sinao ni Jesus. Nasirmatana nga agbalinto ni Pedro a kas iti bato​—natibker, nasungdo, ken nasayaat nga impluensia kadagiti pasurot ni Kristo. Kasta kadi ti panangmatmat ni Pedro iti bagina? Kasla saan. Uray ti dadduma nga agbasbasa ita kadagiti salaysay ti Ebanghelio awan ti makitada ken Pedro a kas iti kalidad ti bato. Adda dagiti mangibaga a nalaka nga agbaliw ti panunotna.

Adda met dagiti pagkapuyan ni Pedro. Ammo dagita ni Jesus. Ngem kas ken Amana a ni Jehova, kanayon a ti naimbag ti kitkitaenna kadagiti tattao. Nakita ni Jesus ti nasayaat a pagbalinanto ni Pedro, isu a tinulonganna a mangpatanor kadagiti agkakaimbag a galad. Uray ita, dagiti naimbag a galadtayo ti kitkitaen ni Jehova ken ti Anakna. Nalabit a narigattayo a patien nga adu ti nasayaat a makitada kadatayo. Ngem masapul nga agtalektayo iti panangmatmatda ken paneknekantayo a sidadaantayo nga agpaisuro ken agpasukog kas ken Pedro.​—1 Juan 3:19, 20.

“Isardengmo ti Agbuteng”

Nalabit a nakikadua ni Pedro kadagiti simmaruno a panangasaba ni Jesus. Gapuna, mabalin a nakitana ti umuna a milagro nga inaramid ni Jesus idi pinagbalinna nga arak ti danum iti maysa a paboda idiay Cana. Kangrunaanna, nangngegna ti naimbag ken mangted iti namnama a mensahe maipapan iti Pagarian ti Dios. Kaskasdi, pinanawanna ni Jesus ket nagsubli iti negosiona a panagkalap. Ngem kalpasan ti sumagmamano a bulan, nagkitada manen. Iti dayta a gundaway, ni Jesus inawisna ni Pedro tapno naan-anay a sumurot kenkuana.

Kalkalpas laeng ti makaupay nga agpatnag a panagkalap da Pedro. Maulit-ulit nga inwayatda ti iketda ngem awan ti nakalapanda. Sigurado nga inusar ni Pedro ti amin a pannakaammo ken kapadasanna tapno adda makalapanda, a napanda iti nagduduma a paset ti dan-aw nga ammoda a pangpanganan dagiti ikan. Kas iti adu a mangngalap, sigurado nga adda dagiti tiempo a pampanunotenna a makitana la koma ti uneg ti nalibeg a danum tapno makitana ti pangen dagiti ikan wenno dumawida kadagiti iketna. Ngem ad-adda la a naupay gapu kadagita a pampanunotenna. Para ken Pedro, saan a paglinglingayan ti panagkalap yantangay agpannuray kenkuana dagiti tattao. Ngem iti laksid dagita, timmakdang nga awan ti nakalapanna. Kaskasdi a masapul a dalusanna dagiti iket. Gapuna, okupado idi inasitgan ni Jesus.

Dagiti tattao inaribungbonganda ni Jesus, a sigagagar nga immimdengda iti amin nga ibagana. Gapuna, naglugan ni Jesus iti bangka ni Pedro ket kiniddawna nga iyadayona bassit manipud iti takdang. Iti kasta a kasasaad, silalawag a nangngeg ti bunggoy ti insuro ni Jesus. Nagimdeng a naimbag ni Pedro ken uray dagiti adda iti takdang. Saan a nauma nga immimdeng bayat nga impalawag ni Jesus ti kangrunaan a tema ti ikaskasabana​—ti Pagarian ti Dios. Anian a pribilehio ti tumulong ken Kristo a mangisaknap iti dayta a mensahe ti namnama iti  intero a daga! Ngem praktikal kadi dayta? Pangalaanda ngay iti pagbiagda? Nalabit a nalagip manen ni Pedro ti nagpatnag nga awan ti nakalapanda.​—Lucas 5:1-3.

Idi nalpas ni Jesus a nagpalawag, kinunana ken Pedro: “Ipanmo iti adalem, ket iwayatyo dagiti iketyo tapno makakalap.” Nagduadua ni Pedro. Kinunana: “Mannursuro, iti agpatpatnag nagbannogkami ket awan ti naalami, ngem gapu iti panangibagam ibabak dagiti iket.” Sigurado a saan koman a kayat ni Pedro nga iwayat manen dagiti iket​—nangruna iti dayta a gundaway a saan a panawen ti pannangan dagiti ikan! Kaskasdi, nagtulnog ni Pedro ken nalabit a sineniasanna dagiti kakaduana iti sabali a bangka a sumurotda kenkuana.​—Lucas 5:4, 5.

Nasdaaw ni Pedro ta nadagsen ti iket idi iyaonna. Inkarigatanna nga iguyod ket dagus a nakitana dagiti nakaad-adu nga aggugulagol nga ikan! Dina ammo ti aramidenna. Nagpatulong kadagiti adda iti sabali a bangka. Bayat a tultulonganda, nakitada a saan a malaon ti maysa a bangka ti amin a nakalapanda. Pinunnoda ti dua a bangka ngem adu latta​—ken mangrugin a lumned dagiti bangka. Saan a makappapati ni Pedro. Nakitana idin ti pannakabalin ni Kristo, ngem iti dayta a gundaway, isu a mismo ti nakapadas! Kabaelan ni Jesus nga iturong dagiti ikan kadagiti iket! Nalapunos iti buteng ni Pedro. Nagparintumeng ket kinunana: “Adaywannak Apo, agsipud ta maysaak a managbasol a tao.” Kasano a mapaneknekanna nga isu ket maikari a makikadua iti Daydiay nangiparangarang iti mismo a pannakabalin ti Dios kadagiti kasta a pamay-an?​—Lucas 5:6-9.

Siaasi a kinuna ni Jesus: “Isardengmo ti agbuteng. Manipud ita agkalapkan iti tattao a sibibiag.” (Lucas 5:10, 11) Saan a panawen idi ti panagduadua wenno panagbuteng. Saan a rumbeng a pagdanagan ni Pedro dagiti gagangay a bambanag a kas iti panagkalap; ken saanna met a rumbeng a pagdanagan dagiti pagkapuyan ken pagkuranganna. Adu ti masapul nga aramiden ni Jesus, maysa a ministerio a mangbalbaliw iti historia. Agserserbi iti Dios a ‘dakkel ti pammakawanna.’ (Isaias 55:7) Sigurado nga ipaay ni Jehova agpadpada dagiti pisikal ken naespirituan a kasapulanda.​—Mateo 6:33.

Dagus a nagtignay ni Pedro, kas iti inaramid da Santiago ken Juan. “Insublida dagiti barangay iti daga, ket binaybay-anda ti amin a banag ket simmurotda kenkuana.” (Lucas 5:11) Impakita ni Pedro ti pammatina ken Jesus ken iti Daydiay nangibaon kenkuana. Dayta ti kasayaatan a desision nga inaramidna. Mangipakpakita met iti kasta a pammati dagiti Kristiano ita a  mangdadaer iti panagduadua ken panagbuteng tapno makapagserbida iti Dios. Saandanto a pulos a pagbabawyan ti kasta a panagtalekda ken Jehova.​—Salmo 22:4, 5.

“Apay a Nagduaduaka?”

Agarup dua a tawen kalpasan a naam-ammona ni Jesus, aggagaud idi ni Pedro iti naangin a rabii iti Baybay ti Galilea kas nadakamat iti rugi. Siempre, ditay ammo no ania ti pampanunotenna. Adu ti posible nga agtartaray iti panunotna! Pinaimbag ni Jesus ti katugangan a babai ni Pedro. Impalawag ni Jesus ti Sermon iti Bantay. Babaen ti pannursuro ken milagro nga inaramidna, maulit-ulit a pinaneknekan ni Jesus nga isu ti Mesias, Daydiay Pinili ni Jehova. Iti panaglabas dagiti bulan, sigurado a naksayanen ti pagannayasan ni Pedro a tumulok iti panagbuteng ken panagduadua ken kadagiti dadduma pay a pagkapuyanna. Isu ket pinili pay ketdi ni Jesus kas maysa kadagiti 12 nga apostolna! Kaskasdi, mabiiten a makitana a saanna pay a naan-anay a naparmek ti panagbuteng ken panagduaduana.

Bayat ti maikapat a panagbantay iti dayta a rabii, wenno iti nagbaetan ti 3:00 ti parbangon ken isisingising ti init, pagammuan ta nagsardeng ni Pedro nga aggaud ket naklaat iti nakitana. Adda aggargaraw kadagiti dalluyon! Sapri kadi dayta dagiti dalluyon a nasilnagan iti bulan? Saan, ta nakatakder ken di met agpukaw. Maysa dayta a tao, ken magmagna iti rabaw ti danum! Bayat nga umas-asideg, kasla labsanna ni Pedro ken dagiti kakaduana. Gapu iti buteng, impagarupda nga agam-amangawda laeng. Ngem nagsao: “Bumilegkayo, siak daytoy; dikay agbuteng.” Isu ni Jesus!​—Mateo 14:25-28.

Simmungbat ni Pedro: “Apo, no sika dayta, bilinennak nga umay kenka iti rabaw dagiti danum.” Dayta a reaksionna ket panangipakita iti kinatured. Gapu ta magagaran iti dayta a naisangsangayan a milagro, kayat ni Pedro nga ad-adda pay a masubok ti pammatina. Kayatna met a mapasaran dayta a milagro. Siaayat nga inayaban ni Jesus. Manipud iti bangka, nagna ni Pedro iti rabaw ti nadawel a baybay. Panunotenyo ti gagar ni Pedro idi isu ket saan a lumned iti danum. Napalalo la ketdi ti siddaawna bayat nga agturturong ken Jesus. Ngem adda sumaruno a pakasingaanna.​—Mateo 14:29.

Masapul nga ipamaysa ni Pedro ti atensionna ken Jesus. Babaen ti pannakabalin ni Jehova, nabaelan ni Jesus a papagnaen ni Pedro iti rabaw dagiti dalluyon. Ken inaramid dayta ni Jesus gapu iti pammati kenkuana ni Pedro. Ngem nasinga ni Pedro. Mabasatayo: “Idi kitkitaenna ti allawig, nagbuteng.” Gapu ta nakita ni Pedro dagiti dalluyon nga umab-ablat iti bangkada,  a nangpataud kadagiti sapri ken burek, isu ket nagbuteng. Nalabit a napanunotna ti bagina a malmalmes iti dayta a dan-aw. Bayat a kumarkaro ti panagbutengna, kumapkapuy met ti pammatina. Ti tao a naawagan a kas Bato gapu iti potensialna nga agbalin a natibker ket mangrugin a lumned a kasla bato gapu iti kumapkapuy a pammatina. Lumalangoy ni Pedro, ngem saan a nagpannuray iti dayta nga abilidadna. Impukkawna: “Apo, isalakannak!” Tinengngel ni Jesus ti imana ket inyaonna. Kalpasanna, bayat nga addada pay la iti rabaw ti baybay, impaganetget ni Jesus daytoy a napateg a leksion ken Pedro: “Sika a bassitan pammati, apay a nagduaduaka?”​—Mateo 14:30, 31.

“Nagduaduaka”​—anian a maitutop nga ebkas! Makadadael unay ti panagduadua. No tumuloktayo iti dayta, pakapuyenna ti pammatitayo ken pabaawenna ti espiritualidadtayo. Masapul a sipipinget a parmekentayo dayta! Kasano? Babaen ti panangtaginayon iti atensiontayo kadagiti umiso a bambanag. No pampanunotentayo dagiti bambanag a pagbutngan, pakaupayan, ken pakasingaantayo iti panagserbitayo ken Jehova ken iti Anakna, ad-adda a kumaro ti panagduaduatayo. Ngem no ipamaysatayo ti atensiontayo ken Jehova ken iti Anakna, iti naaramidanda, iti ar-aramidenda, ken iti aramidendanto kadagiti mangay-ayat kadakuada, maparmektayo ti makadadael a panagduadua.

Bayat a ni Pedro sarsarunuenna ni Jesus nga agturong iti bangka, nakitana a nagsardeng ti bagyo. Limminak ti Baybay ti Galilea. Ni Pedro ken dagiti padana nga adalan kinunada, “Pudno a sika ti Anak ti Dios.” (Mateo 14:33) Bayat nga agbannawag iti dan-aw, sigurado a napno ti puso ni Pedro iti panagyaman. Nasursurona a parmeken ti panagduadua ken panagbuteng. Pudno, adu pay ti masapul a sursuruenna sakbay nga agbalin nga arig bato a Kristiano kas namnamaen kenkuana ni Jesus. Ngem determinado nga agporsegi ken rumang-ay. Addaanka kadi iti kasta a determinasion? Sigurado a makasursuroka iti mapagwadan a pammati ni Pedro.

[Ladawan iti panid 22, 23]

Nakita ni Jesus a dakkel ti potensial daytoy a napakumbaba a mangngalap

[Ladawan iti panid 23]

“Apo, . . . maysaak a managbasol”

[Ladawan iti panid 24, 25]

“Idi kitkitaenna ti allawig, nagbuteng”