NI Sem nga anak ni Noe nalasatanna ti pannakadadael ti maysa a lubong, ken nagtultuloy a nagbiag iti simmaruno a lubong. Ammom kadi no apay a nadadael ti umuna a lubong ken no kasano a nakapagtultuloyda a nagbiag a sangapamiliaan iti simmaruno a lubong?​— a Pagsaritaanta ti maipapan iti dayta.

Idi ubing pay ni Sem, napalalo “ti kinadakes ti tao,” kuna ti Biblia. Ti amin a panunot ti tao ket ‘dakes iti amin a tiempo.’ Ammom kadi no ania ti inaramid ti Dios?​— Nangyeg iti layus a nangtalipupos iti dakes a lubong. Insurat ni apostol Pedro: “Nagpasar iti pannakadadael ti lubong iti daydi a tiempo idi nalayus iti danum.”​—Genesis 6:5; 2 Pedro 3:6.

Ammom kadi no apay a dinadael ti Dios dayta a lubong?​— Dakes dagiti tattao, ken amin a panunotda ket ‘dakes iti amin a tiempo.’ Dinakamat dayta ni Jesus. “Kasakbayan ti layus,” kinunana, dagiti tattao “mangmangan ken umin-inumda” kasta met a ‘mangas-asawa ken mayas-asawada.’ Innayonna pay: “Saanda a nangikankano agingga nga immay ti layus ket inyanudna amin ida.”​—Mateo 24:37-39.

Ania ti saan nga inkankano wenno saan a nabigbig dagidi a tattao?​— Ni Noe nga ama ni Sem ket “maysa a manangaskasaba iti kinalinteg,” ngem di inkankano dagiti tattao ti mensahena. Impangagna ti Dios ket nagibangon iti daong, a sitatalged a nagyananda a sangapamiliaan bayat ti Layus. Ni laeng Noe, ti asawana, dagiti annakda​—da Sem, Cam, ken Jafet​—ken dagiti assawada ti nangtungpal iti imbilin ti Dios nga aramidenda. Dagiti dadduma inaramidda ti kaykayatda isu a natalipuposda amin iti Layus.​—2 Pedro 2:5; 1 Pedro 3:20.

Makatawen kalpasan ti Layus, rimmuar ni Sem ken ti pamiliana manipud iti daong iti namaga a daga. Awanen ti amin a dakes a tattao, ngem di nagbayag dayta. Ni Canaan, nga anak ni Cam a kabsat ni Sem, adda nagdakes nga inaramidna isu a kinuna ni Noe: “Mailunod koma ni Canaan.” Dakes met uray ni Nimrod nga apo ni Cam. Binusorna ti pudno a Dios a ni Jehova ket binilinna dagiti tattao a  mangbangonda iti nangato a torre a maawagan iti Babel a pakaitan-okanda. Ania ngata ti narikna ni Sem ken ti amana?​—Genesis 9:25; 10:6-10; 11:4, 5.

Naladingitanda, kasta met ni Jehova. Ammom kadi no ania ti inaramid ni Jehova?​— Pinagdudumana ti lenguahe dagiti tattao tapno saanda nga agkikinnaawatan. Gapuna, nagsardeng ti panagibangon dagiti tattao. Nagsisinada ket nagkakadua dagiti agpapada ti lenguahena. (Genesis 11:6-9) Ngem saan a binaliwan ti Dios ti lenguahe ni Sem ken ti pamiliana. Gapuna, nagtalinaedda a sangapamiliaan ket nagtitinnulongda nga agserbi iti Dios. Napanunotmo kadin no kasano kapaut ti panagserbi ni Sem ken ni Jehova?​—

Nagbiag ni Sem iti 600 a tawen. Sakbay ti Layus, nagbiag iti 98 a tawen. Kalpasanna, nagbiag iti kanayonan a 502 a tawen. Masiguradotayo a tinulonganna ni Noe a nangibangon iti daong ken nangpakdaar kadagiti tattao iti umad-adani idi a Layus. Ngem ania ngata ti inaramid ni Sem iti uneg ti nasurok a 500 a tawen kalpasan ti Layus?​— Ni Noe tinukoyna ni Jehova kas “Dios ni Sem.” Nagtultuloy la ketdi ni Sem a nagserbi ken Jehova ken timmulong kadagiti miembro ti pamiliada nga aramidenda met ti kasta. Idi agangay, karaman kadagiti nagbalin a kaputotan ni Sem da Abraham, Sara, ken Isaac.​—Genesis 9:26; 11:10-31; 21:1-3.

Usigem ita ti agdama a kasasaad ti lubong, a lumanlanlan iti kinadakes sipud idi kaaldawan ni Sem. Anianto ti mapasamak?​— Kuna ti Biblia nga ‘aglabasto’ dayta. Imutektekam daytoy a kari: “Ti agaramid iti pagayatan ti Dios agtalinaed iti agnanayon.” Gapuna, no aramidentayo ti pagayatan ti Dios, nalabit a maysatayto kadagiti makalasat nga agturong iti baro a lubong ti Dios. Kalpasanna, iti tulong ti Dios siraragsak nga agbiagtayto nga agnanayon ditoy daga!​—1 Juan 2:17; Salmo 37:29; Isaias 65:17.