“AGALUADKAYO,” insurat ni apostol Pablo kadagiti Kristiano idi maudi a kagudua ti umuna a siglo K.P. (Kadawyan a Panawen wenno Common Era). Apay? “Amangan no adda asinoman a mangkayawto kadakayo kas naanupanna babaen iti pilosopia ken ubbaw a panangallilaw maitunos iti tradision dagiti tattao.”—Colosas 2:8.

Iti laksid ti pakdaar ni Pablo, adda dagiti Kristiano sipud idi ngalay ti maikadua a siglo K.P. a nangilawlawag iti patpatienda babaen ti panangtuladda kadagiti kapanunotan nga intandudo dagiti nagkauna a pilosopo. Apay nga inaramidda dayta? Tapno akseptaren ida dagiti de adal iti Imperio ti Roma ket ad-adu ti makomberteda.

Ni Justin Martyr ti maysa a kalatakan kadagita a Kristiano. Patienna a ni Jesus a Pannakangiwat ti Dios nagparang kadagiti pilosopo a Griego nabayag pay sakbay a dimteng ditoy daga. Sigun ken Justin ken kadagiti mannursuro a kasta met la ti kapanunotanda, nakatulong ti pilosopia ken mitolohia tapno agbalin a makaay-ayo ti Kristianidad iti isuamin a tattao.

Nagadu ti nakomberte ni Justin Martyr iti kita ti Kristianidad nga insurona. Nupay kasta, ti panangawatda iti di umiso a sursuro mangpataud iti dadduma pay a di umiso a sursuro a dayta itan ti maaw-awagan a Nakristianuan a doktrina. Tapno maibutaktak dagita a sursuro, idiligyo ti kunaen dagiti sumaganad a reperensia iti talaga nga isursuro ti Biblia.