Maysa a libro dagiti estudiante iti haiskul a naipablaak idi 2007, a napauluan iti World Religions in Denmark, ti nangdeskribir kadagiti Saksi ni Jehova kas minoridad a Kristiano a mangan-annurot a naimbag iti Biblia. Kinapudnona, dagiti Saksi ni Jehova ti maikatlo a kadakkelan a relihion dagiti Kristiano idiay Denmark.

Nupay kasta, nakaro ti panangbabalaw ti maysa nga obispo iti Danish National Church iti desision ti autor a mangiraman kadagiti Saksi iti libro. Apay? “Masapul a kasaritak pay ti maysa a teologo no ibilangna dagiti [Saksi ni Jehova] a Kristiano,” kinuna ti obispo. “Saanda a patien ti Trinidad, ket dayta ti kangrunaan a pannursuro ti Kristiano a relihion.”

Ti autor ti libro a ni Annika Hvithamar, a maysa a sosiologo mainaig iti relihion, inlawlawagna a no mayimtuod kadagiti tattao no apay a bigbigenda a Kristianoda, manmano ti mangisungbat a gapu ta patienda a ti Dios ket maysa a Trinidad. Maysa pay, adda paset ti libro a napauluan iti “Are You a Christian?” a kunkunana: “Ti doktrina a Trinidad ti maysa kadagiti kadakkelan a parikut iti Kristiano a teolohia.” Kunana pay: “Masansan a narigat nga ilawlawag kadagiti di nakaeskuela a Kristiano no apay a ti Dios dagiti Kristiano ket maymaysa a dios, ket nikaanoman saan a nagbalin a tallo.”

Nalawag ken simple laeng ti isursuro ti Biblia maipapan iti Dios. Saan met a masarakan iti Biblia ti kapanunotan wenno ti sao a “Trinidad.” Nakalawlawag nga ibaga ti Biblia a ni Jesus ti inauna nga Anak ti Dios. (Colosas 1:15) Ipabigbigna met ni Jesus kas ti “mangibabaet iti Dios ken kadagiti tattao.” (1 Timoteo 2:5) Kuna ti Biblia maipapan iti Ama: “Sika, nga agnagan Jehova, sika laeng ti Kangatuan iti intero a daga.”—Salmo 83:18.

Patien dagiti Saksi ni Jehova a napateg ti panamati ken Jesus. (Juan 3:16) Gapuna, an-annurotenda ti bilin ni Jesus nga: “Adda a naisurat, ‘Ni Jehova a Diosmo ti masapul a daydayawem, ket kenkuana laeng ti masapul a pangipaayam ti sagrado a panagserbi.’” (Mateo 4:10) Ti sigurado, mabalin a maawagan a Kristiano ti asinoman a mangikagkagumaan a mangtungpal iti bilin ni Jesus.