ANIAN a panangigunamgunam ni apostol Pablo iti di maartapan a pateg ti Biblia! Siempre, espesipiko a tuktukoyenna ti paset ti Biblia a magun-odan idi kaaldawanna—dagiti kasuratan a maaw-awagan no dadduma iti Daan a Tulag. Ngem siempre, agaplikar ti sasaona iti amin nga 66 a libro ti Biblia, agraman ti insurat dagiti matalek nga adalan ni Jesus idi umuna a siglo K.P.

Ipatpategmo kadi ti Biblia a kas iti panangipateg ni Pablo? Patiem kadi a talaga a pinaltiingan ti Dios dagiti nangisurat iti Biblia? Patien dayta dagiti Kristiano idi umuna a siglo ken nagtultuloy a kasta uray kadagiti simmaganad a siglo. Kas pagarigan, ti maika-14 a siglo nga Ingles a klerigo a ni John Wycliffe, minatmatanna ti Biblia kas “ti di agbiddut a paglintegan ti kinapudno.” Iti panangkomentona iti sasao ni Pablo a naadaw iti ngato, kuna ti The New Bible Dictionary a “ti paltiing ti [Dios] patalgedanna ngarud ti kinapudno ti amin nga ibagbaga ti Biblia.”

Ngem kadagiti nabiit pay a tiempo, in-inut a napukaw ti panagtalek dagiti tattao iti Biblia. Kuna ti libro a The World’s Religions: “Iti kinapudnona . . . bigbigbigen pay latta ti amin a Kristiano a ti Biblia ti rumbeng a mangiwanwan kadakuada, agpadpada no ania ti aramiden ken  patienda.” Ngem saan a pudno dayta iti panagbiagda. Adu itan ti mangibilang iti Biblia kas “di mapagtalkan a tradision ti tao.” Nupay bigbigenda a nabileg ti pammati dagiti nangisurat iti Biblia, matmatanda dagita a mannurat kas agbiddut a tattao a nangikagumaan a mangilawlawag kadagiti naespirituan a kinapudno ngem awananda iti pannakaammo ken pannakaawat a kas iti adda kadatayo ita.

Iti kinapudnona, manmano a tattao ita ti talaga nga agpapaiwanwan iti Biblia. Kas pagarigan, kasano kasansan a mangngegmo dagiti tattao nga agkuna nga inuugma ken saanen a praktikal dagiti pagalagadan ti Biblia maipapan iti moralidad? Adu itan ti mangtagtagilag-an kadagiti linteg ken prinsipio ti Biblia—wenno naan-anay pay ketdi a laksidenda no marigatanda a mangyaplikar kadagita. Dadduma nga agkunkuna a Kristianoda gagaraenda pay ketdi a salungasingen ti ibagbaga ti Biblia maipapan iti pannakiabig, pannakikamalala, panagkusit, ken panagbartek.—1 Corinto 6:9, 10.

Apay a kasta? Idi rugrugi ti maika-20 a siglo, maysa a rason ti dinakamat ti arkeologo a ni Sir Charles Marston iti librona a The Bible Is True. Kinunana a dagiti tattao dagus nga “inawatda lattan ti adu a pagarup dagiti moderno a mannurat” a mangsupsupiat iti kinamapagtalkan ti Biblia. Pudno kadi dayta agingga ita? Ania ti rumbeng a panangmatmatmo kadagiti opinion ken teoria dagiti iskolar a mangdaddadael iti panagtalek iti Biblia? Kitaem no ania ti kunaen ti sumaganad nga artikulo maipapan iti daytoy.