Posible Kadi a Maam-ammom ti Dios?

Maysa a pakaidayawantayo no ipalubos ti natan-ok a tao a kablaawan ken awagantayo iti naganna. Masansan a maawagan dagiti natan-ok a tattao babaen kadagiti titulo nga “Apo Presidente” wenno “Madaydayaw.” Isu a mariknam la ketdi a pakaidayawam no ibaga kenka ti maysa a natan-ok a tao, “Awagannak lattan iti naganko.”

ITI Biblia a naisurat a Saona, kinuna ti pudno a Dios: “Siak ni Jehova. Dayta ti naganko.” (Isaias 42:8) Nupay addaan met iti adu a titulo, kas iti “Namarsua,” “Mannakabalin-amin,” ken “Soberano nga Apo,” kanayon a pinadayawanna dagiti nasungdo nga adipenna babaen ti panangipalubosna nga awaganda iti personal a naganna.

Kas pagarigan, ni propeta Moises impakaasina idi iti Dios: “Dispensarennak, Jehova.” (Exodo 4:10) Idi maidedikar ti templo iti Jerusalem, kinuna ni Ari Solomon iti rugrugi ti kararagna: “O Jehova.” (1 Ar-ari 8:22, 23) Kasta met, idi indauluan ni propeta Isaias ti ili ti Israel iti maysa a kararag, kinunana: “Sika, O Jehova, ti Amami.” (Isaias 63:16) Nabatad nga aw-awisennatayo ti nailangitan nga Amatayo nga awagantayo iti naganna.

Nupay napateg ti panangawag ken Jehova iti naganna, ad-adu pay ti ramanen ti talaga a panangam-ammo kenkuana. Maipapan iti tao a mangay-ayat ken agtalek kenkuana, inkari ni Jehova: “Salaknibakto agsipud ta naammuanna ti naganko.” (Salmo 91:14) Nalawag nga adu ti ramanen ti panangammo iti nagan ti Dios yantangay nasken dayta tapno salaknibannatayo. Ania ngarud ti rumbeng nga aramidem tapno maam-ammom ni Jehova?