Ti Panagturpos ti Maika-129 a Klase ti Gilead

“Agpaay Kadakayo Daytoy nga Aldaw”

IDI Setiembre 11, 2010, dandani 8,000 ti nagtataripnong para iti maysa a naisangsangayan nga okasion​—ti panagturpos ti maika-129 a klase ti Watchtower Bible School of Gilead. Kadagiti estudiante, kinuna ni Samuel Herd a kameng ti Bagi a Manarawidwid dagiti Saksi ni Jehova: “Agpaay kadakayo daytoy nga aldaw. Addakami ditoy tapno makipagrag-okami kadakayo!”

“Ti Dumdumngeg a Lapayag”

Rinugian ni Kabsat Herd ti programa babaen ti panangilawlawagna nga amin a Kristiano nga addaan iti “dumdumngeg a lapayag” mangipaayda koma iti atension iti Sao ti Dios. (Proverbio 20:12) “Inimdenganyo ni Jehova iti naglabas a sumagmamano a bulan,” kinuna ni Kabsat Herd iti klase, “ken agnanayon nga aramidenyo dayta.”

Kasano a dagiti baro a misionero nainsiriban nga usarenda dagiti lapayagda? “Babaen ti panangipaayda iti atension iti Sao ti Dios,” kinuna ni Kabsat Herd. Innayonna: “Adu ti mangngeganyo iti programa ita nga aldaw a mangisagana kadakayo iti trabahoyo kas misionero kadagiti masungad a tawtawen.”

“Agtalekkayo ken Jehova iti Amin a Pusoyo”

Dayta a mamagpanunot a tema ti impalawag ni Gerrit Lösch, maysa a kameng ti Bagi a Manarawidwid. Insalaysayna no kasano a nagtalek ken Jehova ti nagkauna ken moderno nga ilina iti sidong ti nadumaduma a kasasaad.

Iti umasping a pamay-an, “nasken nga ipakita dagiti misionero ti panagtalek no mainaig iti pakaibaonanda,” impaganetget ni Kabsat Lösch. “Kas pagarigan,” kinunana, “mabalin a maisaludsodyo: ‘Kabaelakto ngata nga adalen ti sabali a pagsasao? Kabaelakto ngata ti makibagay iti sabali a kultura? Madaerakto ngata ti iliwko?’” Ti sungbat? “Agtalekkayo ken Jehova,” imbalakad ni Kabsat Lösch iti klase.

Binasa pay ni Kabsat Lösch ti Proverbio 14:26, nga agkuna: “Iti panagbuteng ken Jehova adda napigsa a panagtalek.” Dumakkel ti panagtalektayo ken Jehova no utobentayo ti adu a pamay-an a binendisionannatayo.

Kunaen ti Biblia a ti tao nga agtalek ken Jehova “pudno unay nga agbalinto a kas maysa a kayo a naimula iti igid ti dandanum, a mangparuar kadagiti ramutna iti mismo nga igid ti pagay-ayusan ti danum; ket saannanto a makita no umay ti pudot, no di ket ti bulbulongna pudno nga agbalinto a nabaludbod.”​—Jeremias 17:7, 8.

Nalawag ti leksion. “Aniaman ti mapasamak iti masanguanan, masapul nga agtalekkayo ken Jehova,” kinuna ni Kabsat Lösch.

“Tuladenyo Dagiti Matalek nga Anghel”

Dayta ti tema ti palawag ni Stephen Lett, a kameng ti Bagi a Manarawidwid. Nangipaay dagiti anghel iti nagsayaat nga ulidan kadatayo. “Amin nga ipalgak ti Biblia maipapan kadakuada ket nasayaat a tuladen,” kinuna ni Kabsat Lett. Kalpasanna, imbinsabinsana ti uppat a galad dagiti matalek nga anghel a nasayaat a tuladentayo​—ti panagibtur, kinapakumbaba, kinamasindadaanda a tumulong, ken kinatarnawda.

Salaysayen ti Biblia ti maysa nga anghel a 21 nga aldaw a nakidangadang iti ‘prinsipe ti Persia’​—maysa a nabileg a demonio. (Daniel 10:13) Impakita dayta nga anghel ti panagibtur. ‘Makigubgubal’ met dagiti Kristiano “maibusor kadagiti  nadangkes nga espiritu a puersa,” impaganetget ni Kabsat Lett. (Efeso 6:12) “Sipipinget a makidangadangkayo tapno agtultuloy a maitungpalyo ti naipabaklay nga annongenyo,” kinunana kadagiti estudiante.

Idi sinaludsod ni Manoa, nga ama ni Samson, no ania ti nagan ti maysa nga anghel, nagkedked ti anghel a mangibaga. Impakita dayta nga anghel ti kinapakumbaba. (Uk-ukom 13:17, 18) Kinuna ni Kabsat Lett kadagiti estudiante: “No adda mangitan-ok kadakayo wenno mangpadayaw iti abilidadyo, sipapakumbaba nga iturongyo ti atension ken Jehova ken iti organisasionna, imbes nga iti bagiyo.”​—1 Corinto 4:7.

Idi adda ni Jesus iti minuyongan ti Getsemani sakbay unay ti ipapatayna, “nagparang kenkuana ti maysa nga anghel manipud langit ket isu pinabilegna.” (Lucas 22:43) Impakita dayta nga anghel ti kinamasindadaan a tumulong. “Buyogen ti kararag, usigenyo no ania a talaga dagiti kasapulan iti lugar a nakaibaonanyo kas misionero,” kinuna ni Kabsat Lett, “kalpasanna, babaen ti tulong ni Jehova, ikagumaanyo nga ipaay ti kasapulan dagiti tattao.”

Yantangay basbassit ti bilang dagiti anghel a kimmappon ken Satanas iti panagrebeldena, maibagatayo a kaaduan kadagiti nailangitan a parsua ket naisangsangayan nga ulidan ti kinatarnaw.​—Apocalipsis 12:4.

“Kas kadagita a matalek nga anghel, sarangtenyo ti Diablo,” indagadag ni Kabsat Lett kadagiti estudiante. “Busorenyo, ket isu agtalawto.”​—Santiago 4:7.

Tallo a Sabali Pay a Tampok ti Programa

“Pagtalinaedenyo ni Jehova kas Bato ti Pusoyo.” Iti panangipalawagna iti dayta a makapainteres a topiko, a naibatay iti Salmo 73:26, ni Gary Breaux, a kameng ti United States Branch Committee, tinulonganna dagiti estudiante a mangamiris iti kinapateg ti panagpannuray ken Jehova. Iti ania nga anag a maysa a bato ni Jehova? “No adda allawig, saan a maitayab ti maysa a papel no napandagan dayta iti bato,” kinuna ni Kabsat Breaux. “Umasping iti dayta, ni Jehova ket kasla maysa a bato a kabaelanna a saluadan ti pusoyo.” Siempre, ti pusotayo mabalin nga allilawennatayo no maipasangotayo iti kasasaad a mangsubok ti panagibturtayo. (Jeremias 17:9) Mabalin a mapanunot ti maysa ti sumukon gapu iti baro a klima, naiduma a taraon, wenno baro a kakadua iti pagtaengan dagiti misionero. “Maipasangokayonto kadagiti kasasaad a mamagpanunot kadakayo no ania ti pilienyo ken aramidenyo a desision,” kinuna ni Kabsat Breaux. “Pilienyonto ngata no ania ti makaay-ayo ken Jehova? No aramidenyo dayta, agbalin ni Jehova kas ‘bato ti pusoyo.’ Iturongnanto dagiti addangyo.”

“Addaankayo Kadi iti Umdas a Pammati Tapno Maisaadyo Dagiti Saksakayo iti Dandanum?” Dayta a tema, a naibatay iti Josue kapitulo 3, ti impalawag ti instruktor iti Gilead a ni Sam Roberson. Kasano koma a maballasiw ti minilion nga Israelita ti Karayan Jordan idinto ta agliplipias? Kinuna ni Jehova ken ni Josue nga ibilinna kadagiti papadi nga ‘agintekda iti Jordan.’ Inkari ti Dios: “Iti kanito a dagiti dapan ti saksaka ti papadi . . . agsaad iti dandanum ti Jordan, magessatto ti dandanum ti Jordan, . . . ket agintekdanto kas maysa a puttot.” (Josue 3:8, 13) Kinuna ni Kabsat Roberson kadagiti estudiante: “Addanto dagiti ‘Jordan’ iti biagyo a mabalin a manglapped kadakayo a manggun-od kadagiti bendision no ipalubosyo.” Kas pagarigan, mabalin nga adda dagiti karit iti pannakilangen kadagiti pada a misionero. Ania ti solusion? “Saan a dagiti trabahador ti kitaenyo no di ket ti trabahoda.” Imbalakad ni Kabsat Roberson iti klase: “No addaankayo iti pammati a mangisaad kadagiti saksakayo iti dandanum, tulongannakayo ni Jehova a mangballasiw kadagita a ‘Jordan’ iti biagyo kas misionero.”

“Ipasdekyo a Sititibker Dagiti Planoyo.” Dayta ti topiko nga impalawag ti instruktor iti Gilead  a ni William Samuelson. Naibatay ti palawagna iti Proverbio 16:3, nga agkuna: “Iyadanim dagiti aramidmo ken Jehova a mismo ket dagiti gakatmo maipasdekto a sititibker.” Insaludsod ni Kabsat Samuelson kadagiti estudiante: “Kayat kadi a sawen daytoy a bersikulo nga awanen ti pasetyo iti pannakaipasdek dagiti planoyo kalpasan a ‘nayadaniyo dagiti aramidyo’ ken Jehova?” Saan, kinunana, yantangay kuna ti Proverbio 16:1: “Dagiti panangigakat ti puso kukua ti naindagaan a tao.” Kinuna ni Kabsat Samuelson: “Saan a simimilagro nga iturong ni Jehova ti pusoyo. Imbes ketdi, nasken a siguraduenyo nga umiso ti motiboyo. Babaen ti panagadal, panagkararag, ken nasinged a pannakitunos iti sanga nga opisina, agtultuloy a maaddaankayo iti puso a makatulong kadakayo, ket ni Jehova a mismo sititibker nga ipasdekna dagiti planoyo.”

Kapkapadasan ken Interbiu

Kas paset ti panagsanayda, dagiti estudiante iti Gilead nakikaduada kadagiti lokal a kongregasion dagiti Saksi ni Jehova iti trabaho a panangasaba. Ni Mark Noumair, sabali pay nga instruktor iti Gilead, ininterbiuna ti sumagmamano nga estudiante mainaig kadagiti kapadasanda. Nangnangruna a naitampok kadagita a kapadasan ti pateg ti kararag iti panangsapul kadagiti napudno ti panagpuspusoda a tattao iti teritoria.

Kas pagarigan, iti maysa a restawran, nadlaw ti maysa nga empleado ti naulimek a panagkararag ti maysa a pagassawaan. Immasideg kadakuada ket dinamagna no Saksida. Idi naammuanna a Saksida, inlawlawag ti empleado nga isu ket napadakkel kas Saksi ngem limmamiis ti pammatina. Nakaaramid pay ketdi iti krimen ket naibalud idi. Ita, kayat daytoy nga agkabannuag a lalaki ti agserbi manen ken Jehova. Kinunana pay a sakbay a simrek ti agassawa iti restawran, inkararagna iti Dios a kayatna ti matulongan tapno mailintegna ti biagna. Nasungbatan ti kararagna!

Iti pasetna a natemaan iti “Nanamenyo ken Kitaenyo a ni Jehova Naimbag,” ni Rudi Hartl ti Writing Correspondence Department ininterbiuna da Wayne Wridgway manipud Mozambique, Jason Reed manipud Chile, ken ni Kenji Chichii manipud Nepal. Dagitoy ket bin-ig a misionero a nasanay iti Gilead. Dinakamat dagitoy a kakabsat ti sumagmamano a karit a nakaipasanguanda idi damdamoda iti kinamisionero​—iti man panagsursuro iti baro a lenguahe, pannakibagay iti baro a kultura, wenno iti panangdaer iti iliwda. “Ti maysa a nakatulong kadakami ket ti dagus a pannakigayyemmi kadagiti kakongregasionmi,” kinuna ni Kabsat Chichii. “Bayat a sumingsingedkami iti kongregasion, nalaklakami a nadaeran ti iliwmi.”

Kalpasan a naawat ti amin a 56 nga estudiante dagiti diplomada, maysa kadakuada ti nangbasa iti makatukay-rikna a surat ti panagyamanda. Kastoy ti paset ti linaon dayta a surat para iti Bagi a Manarawidwid: “Kas maysa a klase, nakitami a mismo ti kinamanagayat ken kinaanepyo a nangisagana iti kurikulum, nangbisita iti klase, ken nangipaay iti nagsayaat a naespirituan nga instruksion. Nagunggonaankami iti ayatyo, isu nga inton addakamin iti teritoriami, ikagumaanmi a tuladen dagiti agkakasayaat nga ulidan ti ayat, kinaanus, kinapakumbaba, ken personal nga interes nga impakitayo.”

[Blurb iti panid 28]

“No adda mangitan-ok kadakayo, saanyo nga iturong ti atension iti bagiyo”

[Blurb iti panid 29]

“Addanto dagiti ‘Jordan’ iti biagyo”

 [Tsart/Mapa iti panid 31]

ESTADISTIKA TI KLASE

9 pagilian a nairepresentar

56 estudiante

28 pagassawaan

33.0 promedio nga edad

17.9 promedio a tawen sipud bautismo

13.3 promedio a tawen iti amin-tiempo a ministerio

[Mapa]

(Para iti aktual a pannakaurnosna, kitaem ti publikasion)

Maibaon dagiti naggraduar iti 25 a pagilian a nailanad ditoy baba

PAKAIDESTINUAN DAGITI MISIONERO

BOLIVIA

BOTSWANA

BULGARIA

CONGO (KINSHASA)

CÔTE D’IVOIRE

GAMBIA

GERMANY

INDIA

INDONESIA

KENYA

LIBERIA

MACEDONIA

MADAGASCAR

MALAYSIA

MOZAMBIQUE

PANAMA

PERU

POLAND

ROMANIA

SERBIA

SIERRA LEONE

SWAZILAND

TANZANIA

UGANDA

ZIMBABWE

[Ladawan iti panid 30]

Indemostra dagiti estudiante iti Gilead ti maysa kadagiti kapadasanda iti panangasaba

[Ladawan iti panid 31]

Ti Maika-129 a Klase a Nagturpos iti Watchtower Bible School of Gilead

Iti listaan ditoy baba, nanumeruan dagiti intar manipud iti sango nga agpalikud, ken nailista dagiti nagan manipud iti kannigid nga agpakannawan iti kada intar.

(1) Munaretto, R.; Olofsson, Y.; Budden, K.; Najdzion, L.; Moya, G.; Treviño, G.; Dion, A.; Fleegle, A.

(2) Smith, J.; Michael Raj, J.; Smith, S.; Paramo, A.; McDonald, J.; Deans, M.; Joyal, S.; Watson, L.

(3) Joyal, C.; Crawley, T.; Hacker, D.; Shynkarenko, J.; Knapp, T.; Ayling, J.; Highley, C.; Olofsson, B.

(4) Fitzpatrick, M.; Najdzion, B.; Skallerud, L.; Harris, A.; Harris, S.; Budden, R.; Paramo, Y.; Skallerud, K.

(5) Crawley, B.; Michael Raj, J.; Lodge, A.; Lodge, R.; Herms, N.; Fitzpatrick, J.; Moya, R.; Munaretto, P.

(6) Watson, S.; Deans, M.; Hacker, J.; McDonald, J.; Treviño, J.; Harris, S.; Herms, C.; Harris, P.

(7) Shynkarenko, V.; Highley, T.; Smith, A.; Dion, J.; Ayling, R.; Smith, B.; Knapp, T.; Fleegle, B.