Ania ti Naimbag a Damag?

“Daytoy naimbag a damag . . . ”​—MATEO 24:14.

MASAPUL nga ikasaba dagiti Kristiano ti “naimbag a damag ti pagarian” babaen ti panangisaritada iti dayta iti sabsabali, nga ilawlawagda a ti Pagarian ket masanguanan a sangalubongan a gobierno a mangiturayto iti daga buyogen ti kinalinteg. Ngem adda sabali pay a pannakaaramat ti sasao a “naimbag a damag” iti Biblia. Kas pagarigan, mabasatayo a nadakamat ti ‘naimbag a damag ti pannakaisalakan’ (Salmo 96:2); ti “naimbag a damag ti Dios” (Roma 15:16); ken “ti naimbag a damag maipapan ken Jesu-Kristo.”​—Marcos 1:1.

Ti naimbag a damag saklawenna ngarud ti amin a kinapudno nga imbaga ni Jesus ken insurat dagiti adalanna. Kinuna ni Jesus kadagiti pasurotna sakbay nga immuli sadi langit: “Inkayo ngarud ket mangaramidkayo iti ad-adalan kadagiti tattao iti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu, nga isuroyo kadakuada a tungpalenda ti amin a bambanag nga imbilinko kadakayo.” (Mateo 28:19, 20) Isu a saan laeng a ti panangipakaammo iti Pagarian ti trabaho dagiti pudno a Kristiano; ikagumaanda met ti agaramid iti ad-adalan.

Tungtungpalen kadi dagiti relihion iti Kakristianuan daytoy a bilin? Ti adu a saan a makatarus no ania ti Pagarian saanda a siuumiso a maisuro dayta iti dadduma. Dagiti laeng topiko a mainaig iti pannakapakawan dagiti basol ken ti panamati ken Jesus ti masansan a dakamatenda kadagiti sermonda. Agibangonda met kadagiti ospital, eskuelaan, ken pagtaengan agpaay kadagiti nakurapay tapno umadu dagiti miembroda. Nupay adu ti maallukoyda, saanda a makapataud kadagiti pudno a Kristiano a sipapasnek a mangitunos ti panagbiagda iti pannursuro ni Jesus.

Insurat ti maysa a teologo: “Manmano laeng nga eskolar ken panguluen dagiti Kristiano ti saan a mangbigbig a masapul a pagbalinen dagiti tattao nga adalan wenno pasurot ni Jesus ken suruan ida a mangaramid iti amin nga imbaga ni Jesus. . . . Nakalawlawag dagiti bilin ni Jesus mainaig iti daytoy a banag. Saanmi laeng ngamin nga ar-aramiden ti imbagana. Saanmi nga ikagkagumaan nga aramiden dayta. Saanmi pay nga impaypayso a tungpalen dayta. Ken nalawag a saanmi nga ammo no kasano nga aramiden dayta.”

Umasping iti dayta, ipakita ti maysa a surbey kadagiti Katoliko iti Estados Unidos a 95 a porsiento ti immanamong a rumbeng nga ikasabada ti naimbag a damag. Ngem gistay amin kunaenda a ti kasayaatan a panangibanag iti dayta ket saan a ti panangisarita iti dayta no di ket ti mapagulidanan a panagbiag. Kinuna ti maysa a napagsaludsodan: “Ti panagebanghelio ket naiduma iti basta panangibaga laeng iti dayta iti sabsabali. Masapul a datayo ti agbalin a Naimbag a Damag.” Ti magasin a U.S. Catholic a nangaramid iti daytoy a surbey kunaenna nga adu ti agkedked a mangiranud iti pammatida gapu iti “dakes a pakasarsaritaan ti simbaan mainaig iti agdama a kaso ti panangabuso iti sekso ken ti makatikaw a sursuro ti simbaan.”

Naladingitan met ti maysa nga obispo a Metodista ta nabingbingay ken matiktikaw dagiti miembroda, nakapuy ti pakinakemda a mangitungpal iti misionda, ken awan ti nakaidumaanda iti moralidad ti kaaduan a tattao. Maup-upay nga insaludsodna: “Siasino dagiti mapagtalkan a mangipakaammo iti ebanghelio ti Pagarian?”

Awan sungbat nga impaay dayta nga obispo. Ngem adda sungbat iti daytoy a saludsod. Maammuam dayta iti sumaganad nga artikulo.

[Blurb iti panid 6]

Ti naimbag a damag ket maipapan iti Pagarian ti Dios ken iti pannakaisalakan babaen ti panamati ken Jesu-Kristo