Ania ti Pagarian ti Dios?

“Daytoy naimbag a damag ti pagarian . . . ”​—MATEO 24:14.

ITI nalatak a Sermonna iti Bantay, insuro ni Jesus ti modelo a kararag a pakairamanan ti kiddaw iti Dios nga: “Umay koma ti pagariam.” Kabesado ti minilion a tattao dayta a kararag ket masansan nga ulitenda. Kuna ti maysa nga ensiklopedia a dayta “ti ikarkararag ti amin a Kristiano iti panagdaydayawda.” Ngem adu a makaikabesa iti dayta ti saan a makaammo no ania ti Pagarian wenno anianto ti aramiden dayta inton dumteng.​—Mateo 6:9, 10.

Saan a nakaskasdaaw dayta ta agsisimparat, makatikaw, ken komplikado ti panangilawlawag dagiti panguluen ti Kakristianuan no ania ti kaipapanan ti Pagarian. Insurat ti maysa kadakuada a ti Pagarian ti Dios ket “nadibinuan a banag, . . . adda iti kaunggantayo a mangisinggalut kadatayo iti sibibiag a Dios . . . , pannakainaig iti Dios tapno magun-odan dagiti lallaki ken babbai ti pannakaisalakan.” Adda pay nangdepinar iti ebanghelio ti Pagarian kas “pannursuro maipapan iti simbaan.” Kunaen met ti Catechism of the Catholic Church: “Ti pagarian ti Dios [ket] kinalinteg ken talna ken panagrag-o iti Espiritu Santo.”

Masarakam iti panid 2 daytoy a pagiwarnak ti umiso a pannakailawlawag daytoy. Kastoy ti mabasa: “Ti Pagarian ti Dios, a maysa a pudpudno a gobierno idiay langit, asidegen a pagpatinggaenna ti amin a kinadakes ken pagbalinenna a paraiso ti daga.” Kitaentayo no kasano a suportaran ti Biblia dayta a pannakaawat.

Dagiti Agturay iti Intero a Daga iti Masanguanan

Ti pagarian ket maysa a gobierno nga iturturayan ti ari. Ti napagungar a ni Jesu-Kristo ti Ari ti Pagarian ti Dios. Nailadawan ti pannakaitronona idiay langit iti sirmata a naited ken Daniel. Insurat ti mammadto: “Intultuloyko ti kimmita kadagiti sirmata iti rabii, ket, kitaenyo sadiay! buyogen dagiti ulep iti langlangit um-umay ti maysa a kasla anak ti tao [ni Jesus]; ket nakaadani iti Kadaanan iti Al-aldaw [ni Jehova a Dios], ket isu inyasidegda iti mismo a sanguanan Daydiay. Ket kenkuana adda naited a panagturay ken dayaw ken pagarian, tapno dagiti ili, nasional a bungbunggoy ken pagsasao agserbida koma amin kenkuana a mismo. Ti panagturayna ket di nakedngan ti kapautna a panagturay a saanto nga aglabas, ket ti pagarianna maysa a saanto a madadael.”​—Daniel 7:13, 14.

Ipakita met ti libro ti Biblia a Daniel a sititibkerto nga ipasdek ti Dios daytoy a Pagarian. Daytanto ti mangipatingga iti amin a gobierno ti tao, ket dinto pulos maparmek. Deskribiren ti kapitulo 2 ti naipaltiing a tagtagainep ti ari ti Babilonia, a nakakitaanna iti dakkel nga estatua, a mangirepresentar kadagiti agsasaruno a  kabilgan a turay ti lubong. Imbuksilan ni mammadto Daniel ti kaipapanan ti tagtagainep. Iti “kamaudianan a paset dagiti aldaw,” insuratna, “mangipasdekto ti Dios ti langit iti maysa a pagarian a saanto a pulos madadael. Ket ti met laeng pagarian saanto a mayawat iti aniaman a sabali nga ili. Rumekennanto ken pagpatinggaenna amin dagitoy a pagarian, ket dayta agtalinaedto agingga kadagiti tiempo a di nakedngan.”​—Daniel 2:28, 44.

Saan nga agmaymaysa nga agturay ti Ari ti Pagarian ti Dios. Bayat ti ministerio ni Jesus ditoy daga, impanamnamana kadagiti matalek nga apostolna, agraman ti sabsabali pay, a mapagungardanto idiay langit ken agtugawdanto kadagiti trono. (Lucas 22:28-30) Saanna a tuktukoyen dagiti literal a trono ta impamatmat ni Jesus nga addanto idiay langit dayta a Pagarian. Deskribiren ti Biblia dagiti kaduana nga agturay nga aggapuda iti “tunggal tribu ken pagsasao ken ili ken nasion.” Agbalindanto a “pagarian ken papadi iti Diostayo, ket agturayda a kas ar-ari iti daga.”​—Apocalipsis 5:9, 10.

No Apay a Naimbag ti Damag ti Pagarian

Paliiwem ta naited ken Kristo Jesus ti panangituray iti amin nga “ili, nasional a bungbunggoy ken pagsasao” ket dagiti kaduana “agturayda a kas ar-ari iti daga.” Siasino ngarud dagiti iturayan daytoy a Pagarian? Dagidiay mangipangag iti naimbag a damag a maikaskasaba iti kaaldawantayo. Karaman met kadagita a maiturayan dagiti mapagungarto ditoy daga ken addaan iti gundaway nga agbiag nga agnanayon.

Nabatad a deskribiren ti Biblia dagiti bendision a tagiragsakento dagiti tattao nga iturayan ti Pagarian. Adtoy ti sumagmamano kadagita:

“Pagsardengenna dagiti gubat agingga iti ungto ti daga. Rungrungduenna ti bai ket putedputedenna ti pika; dagiti kareson ipuorna iti apuy.”​—Salmo 46:9.

“Pudno unay a mangbangondanto iti balbalay ket agnaedda; ket pudno unay nga agmuladanto kadagiti kaubasan ket kanenda ti bungada. Saandanto a mangbangon ket sabali ti agnaed; saandanto nga agmula ket sabali ti mangan.”​—Isaias 65:21, 22.

“[Ti Dios] punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.”​—Apocalipsis 21:3, 4.

“Iti dayta a tiempo maluktanto ti matmata dagidiay bulsek, ket maluktanto ti mismo a laplapayag dagidiay tuleng. Iti dayta a tiempo kumalay-atto daydiay pilay a kas iti panagkalay-at ti kalakian nga ugsa, ket ti dila daydiay umel umkisto gapu iti ragsak.”​—Isaias 35:5, 6.

“Um-umayen ti oras nga amin dagidiay adda kadagiti pakalaglagipan a tanem mangngegdanto ti timekna [ni Jesus] ket rummuarda, dagidiay nagaramid iti naimbag a bambanag iti panagungar iti biag.”​—Juan 5:28, 29.

“Dagidiay naemma tagikuaendanto ti daga, ket pudno a maragsakandanto iti napalalo iti kinaruay ti talna.”​—Salmo 37:11.

Talaga a naimbag a damag dayta! Ipakita met dagiti natungpalen a padto ti Biblia nga asidegen nga ipasdek ti Pagarian ti nalinteg a turayna iti intero a daga.