Surat Manipud Mexico

“Ay-ayatennakami Kadi ni Jehova Uray Indian-kami?”

NI Melesio, nga O’dam ti lenguahena, ket sagpaminsan a sumalog manipud iti kabambantayan tapno agbirok iti trabaho. Tumabuno kadagiti Nakristianuan a gimong ken mangyawid kadagiti literatura a naibatay iti Biblia tapno iwarasna kadagiti kailianna. Kidkiddawenna nga adda koma sumarungkar ken mangisuro kadakuada iti ad-adu pay maipapan iti Biblia.

Dagiti O’dam ket maysa a naiputputong a grupo dagiti katutubo nga agnanaed iti kabambantayan iti makin-amianan a tengnga ti Mexico, agarup 240 a kilometro (150 mi) manipud iti kaasitgan a kongregasion dagiti Saksi ni Jehova. Inkeddeng ti sumagmamano kadakami ti bumisita kadagitoy a tattao.

Manipud siudad ti Durango, nangalakami iti pickup a lugan, tolda, pagturogan a bag, ken umdas a suplay ti taraon ken gasolina para iti tallo nga aldaw. Alas kuatro ti parbangon idi nagrubuatkami ket nagbiahekami iti walo nga oras a simmang-at iti natapok a kalsada iti bantay agingga a naungpotmi. Daytoy ti pagserkan iti lugar nga ayan dagiti O’dam. Masungadmi ti nauneg a rangkis ken maysa pay a bantay.

Imbatimi ti pickup iti maysa a ranchito [naiputputong a purok], sa nagnagnakami iti tallo nga oras a simmalog iti sakaanan ti rangkis nga awit-awitmi dagiti garetmi. Sadiay ti nagkampuanmi, nagurnongkami iti umdas a kayo a puoranmi tapno mabugaw dagiti atap nga animal sa nagsisinnublatkami a naturog tapno adda mabati a mangsungrod iti apuy.

Kabigatanna, sinapsapami ti simmang-at iti bantay. Namin-ano a nayaw-awankami gapu ta agsasanga dagiti dalan. Adda kaduami nga ammona bassit ti agsao iti O’dam, isu nga inranudmi ti ababa a mensahe a linaon ti Biblia kadagiti malabsanmi a pagtaengan. Nasdaawkami ta imbaga dagiti tattao nga adda dagiti agkunkuna a Saksi ni Jehova ken aggigimong iti lugar a pagturonganmi, ti Los Arenales. Nakaskasdaaw daytoy ngem makaparegta.

Nagkapuyon dagiti sakami idi nakadanonkami idiay Los Arenales. Ti komunidad ket buklen dagiti naipattopattok a balbalay a naaramid iti ladrilio ken naatepan iti karton​—awan eskuelaan ken awan koriente. Nakakurkurapay dagiti agindeg sadiay, a naan-anay a naisina iti sabali a tattao ken gistay tortilia a mais laeng ti taraonda. Nasarakanmi ni Melesio,  maysa a narapis nga agkabannuag a lalaki a maragragsakan a makakita kadakami. Inawisnakami iti simple a balayna ket imbagana nga inaldaw nga ikarkararagna nga ibaon koma ni Jehova dagiti Saksina tapno isuroda ti Biblia iti pamiliana ken kadagiti padana nga O’dam. Ammona a saanna a masungbatan amin a saludsod dagiti kailianna.

An-annuroten dagiti O’dam ti shamanismo, wenno relihion a kontrolado dagiti espiritu. Agusarda kadagiti anting-anting a kas iti dutdot ken tulang ti agila, agdayawda kadagiti puersa ti nakaparsuaan, ket kabutengda dagiti shaman (baglan), a manggungundaway kadakuada. Inestoria ni Melesio nga idi naammuanna a ni Jehova ti pudno a Dios bayat dagiti ipapanna iti siudad, dinadaelna aminen dagiti pagdaydayawanna a didiosen. Gapu iti dayta, ekspektaren dagiti pumurok a matay ni Melesio kas pannusa kenkuana dagiti didios. Idi awan ti napasamak, nabigbigda a nabilbileg ni Jehova ngem kadagiti didiosda. Nagbanaganna, rinugiandan ti tumabuno iti panagadal iti Biblia nga ikonkondukta ni Melesio para iti pamiliana babaen ti panangusarna kadagiti literaturatayo.

“Imbagak a masapul nga umuna pay a puoranda amin dagiti anting-anting ken imahenda,” kinuna ni Melesio. Adu kadakuada ti saanen a mabuteng iti an-anito, ket immabut iti nasurok a 80 ti bilang dagiti tumabtabuno. Nasdaawkami iti daytoy a nangngeganmi, isu nga inkeddengmi ti mangangay iti gimong iti dayta a malem. Kiniddawmi kadagiti pumurok nga agkabalioda a mangipadamag iti dayta kadagiti kanayon a tumabuno iti balay ni Melesio. Nupay katengngaan idin ti lawas ken kadamdamagda laeng dayta, adda 25 a timmabuno a nagnagna ti dadduma ken adda met nagsakay iti babassit nga asno.

Sinungbatanmi dagiti saludsodda maipapan iti Biblia babaen iti panangipatarus ni Melesio. Dagitoy ti sumagmamano nga insaludsodda: “Ay-ayatennakami kadi ni Jehova uray Indian-kami?” “Imdenganna ngata dagiti kararagmi iti lenguahemi?” “Inton dumteng ti Armagedon, maseknan kadi ni Jehova kadakami uray nakaad-adayokami iti siudad?” Babaen iti Biblia, siraragsak nga impanamnamami kadagitoy napakumbaba a tattao a maseknan ni Jehova kadagiti naemma, aniaman ti lenguaheda wenno uray naiputputong a lugar ti ayanda. Impakaasida a mangibaonkami iti mangisuro kadakuada iti ad-adu pay.

Kalpasan ti gimong, inranudmi ti taraonmi kadagitoy a kabbaro a gagayyem. Rumabii idin ket nakalamlamiis iti dayta a nangato a lugar, isu a nagyamankami idi inyawisda nga umyankami iti maysa a kuarto a di pay nalpas. Kabigatanna, kinuyogdakami a sumalog iti ayan ti pickup babaen iti panglintegan a dalan, sa nagbiahekami a nagsubli idiay Durango. Nabannogkami, ngem nakaragragsakkami.

Maragsakankami a makaam-ammo kadagitoy a naemma a tattao, a kaaduan kadakuada ti saan a makaammo nga agbasa ken agsurat wenno agsao iti Espaniol ngem kayatda a maam-ammo ken pagdayawan ti pudno a Dios! Sipud idi bimmisitakami, innem a Saksi ti nakadanonen iti daytoy a komunidad, ken nagtalinaedda sadiay iti tallo a lawas. Nakaipaayda iti naespirituan a tulong iti agarup 45 a tattao a sipapasnek nga agtarigagay nga agserbi ken Jehova. Regularen a tumabtabunoda kadagiti gimong.

Makapainteres met a maammuan a saanen nga aglaklako iti sigarilio ti kakaisuna a bassit a tianggi iti Los Arenales. Adu ngamin kadagiti lumugar ti agad-adalen iti Biblia ken simmardengdan nga agsigarilio. Pinagbalinda met a legal ti panagasawada.

[Ladawan iti panid 24]

Ni Melesio a kaduana ni baketna, ti uppat nga annakda, ken ti katuganganna

[Dagiti Ladawan iti panid 25]

Panangyadal iti Biblia ken Nakristianuan a gimong idiay Los Arenales

[Picture Credit Line iti panid 25]

Servicio Postal Mexicano, Correos de Mexico