MALADLADINGITAN ita ti adu a tattao; pagarupenda nga awan ti asinoman a maseknan kadakuada. Masansan a kastoy ti marikrikna dagiti nataenganen. Ngem adu met nga ubbing ita ti malmalday ken mabutbuteng, uray dagiti agserserbi iti Dios. Ammom kadi no apay?​— a

Adu ti mabalin a rason. Usigenta ti ehemplo ti maysa a lalaki a nagbiag idi un-unana​—agarup sangaribu a tawen sakbay ti pannakayanak ni Jesus. Elias ti naganna. Nagbiag idi binaybay-an ti nasion ti Israel ti pudno a Dios, ni Jehova. Adu kadakuada ti nangrugi nga agdayaw iti palso a dios a ni Baal. Kinuna ni Elias: “Siak laeng ti natedda.” Iti panagkunam, ni Elias laeng idin ti agserserbi ken Jehova?​—

Nupay saan nga ammo ni Elias, adda pay nabatbati nga Israelita nga agdaydayaw iti pudno a Dios. Aglemlemmengda laeng ta mabutengda. Ammom kadi no apay?​—

Ti ari ti Israel a ni Acab ket saan nga agserserbi ken Jehova; agdaydayaw ken Baal, ti palso a dios ni Jezebel a baketna. Gapuna, birbiroken da Jezebel ken Acab dagidiay agserserbi ken Jehova tapno mapapatayda, nangnangruna ni Elias. Dayta ti rason a nagtalaw. Nagnagna iti gistay 483 a kilometro, ket nagturong idiay desierto ti Horeb, a naawagan met Sinai iti Biblia. Ginasgasut a tawen sakbay ti panawen ni Elias, iti dayta a lugar nga inted ni Jehova iti ilina ti Sangapulo a Bilin ken ti dadduma pay a Lintegna. Agmaymaysa a naglemmeng ni Elias iti maysa a  kueba idiay Horeb. Rumbeng ngata nga agbuteng ni Elias?​—

Ipakita ti Biblia a sakbay dayta a pasamak, ni Jehova inaramatna ni Elias nga agaramid kadagiti nakaskasdaaw a milagro. Naminsan, sinungbatan ni Jehova ti kararag ni Elias ket pinagtinnagna ti apuy manipud langit tapno dayta ti mangibus iti datonna. Iti kasta a pamay-an, pinaneknekan ni Jehova nga Isu ti pudno a Dios, saan a ni Baal. Ket ita nga adda ni Elias iti kueba, nagsao kenkuana ni Jehova.

“Ania ti ar-aramidem ditoy, Elias?” insaludsod ni Jehova. Dayta ti gundaway nga insungbat ni Elias, ‘Siak laengen ti natedda nga agdaydayaw kenka.’ Ni Jehova siaanus a kinorehirna ni Elias, ket kinunana, ‘Adda pay laeng pito ribu nga agserserbi kaniak.’ Imbaga ni Jehova nga agsubli ni Elias, ken inlawlawagna nga adu pay ti ipaaramidna.

Ania ngata a leksion ti maadaltayo ken Elias?​— No dadduma, agbuteng met uray dagidiay agserserbi ken Jehova. Amintayo ngarud, ubing man wenno nataengan, laglagipentayo koma ti agpatulong ken Jehova. Ikari ti Biblia: “Ni Jehova asideg kadagidiay amin nga umaw-awag kenkuana.”

Daytoy ti sabali pay a leksion: Adda dagiti kakabsattayo iti nagduduma a lugar a mangay-ayat ken Jehova ken kadatayo. Kuna ti Biblia: “Ti isu met laeng a bambanag a sagsagabaen maitungtungpalda iti intero a timpuyog ti kakabsat[tayo] ditoy lubong.” Dika kadi maragsakan ta saantayo a talaga nga agmaymaysa?​—