Saludsod Dagiti Agbasbasa

Amin Kadi a Matalek a Kristiano Mapanda Idiay Langit?

▪ Adun ti nakabasa iti daytoy a makaliwliwa a sasao ni Jesus: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.” (Juan 3:16) Ibagbaga kadi ni Jesus nga amin a matalek nga agdaydayaw ken Amana, ni Jehova a Dios, ket mapan idiay langit a mangtagiragsak iti biag nga agnanayon?

Usigem ti mamagpanunot a sasao ni Jesus: “Awan ti tao nga immuli sadi langit no di daydiay bimmaba manipud langit, ti Anak ti tao.” (Juan 3:13) Ipasimudaag daytoy a saan a napan idiay langit dagidi nagkauna a matalek nga agdaydayaw iti Dios a kas kada Noe, Abraham, Moises, ken David. (Aramid 2:34) Napananda ngarud? Iti ababa a pannao: Addada idiay tanem dagitoy a matalek a tattao, matmaturogda ken patay, awan ti puotda, ken ur-urayenda ti panagungar.​—Eclesiastes 9:5, 6; Aramid 24:15.

Iti Biblia, ni Jesus met ti immuna a nangdakamat maipapan iti biag idiay langit kalpasan ti ipapatay. Imbagana kadagiti apostolna nga isaganaanna ida iti pagyanan idiay langit. (Juan 14:2, 3) Baro daytoy a banag kadagiti adipen ti Dios. Inlawlawag ni apostol Pablo idi agangay a kalpasan ti ipapatay ni Jesus ken ti panagungarna nga agturong idiay langit, ‘inaguraran [wenno, linuktan] ni Jesus maipaay kadatayo ti maysa a baro ken nabiag a dalan’​—dalan a saan pay a nagnaan ti asinoman a tao.​—Hebreo 10:19, 20.

Kayat kadi a sawen daytoy a sipud idin mapan metten idiay langit ti amin a matalek a tattao? Saan, ta ti nailangitan a panagungar ket mainaig iti annongen a naited iti sumagmamano laeng a tao. Iti naudi a rabii a pannakikadua ni Jesus kadagiti apostolna, kinunana nga iti nailangitan a Pagarianna, ‘agtugawda kadagiti trono tapno mangukomda.’ Ti ngarud annongenda isu ti panagturay idiay langit a kadua ni Jesus.​—Lucas 22:28-30.

Malaksid kadagiti apostol, adda met dadduma a tao nga addaan iti kastoy a nadayag nga annongen. Iti maysa a sirmata, nakita ni apostol Juan a kadua ni Jesus idiay langit ti maysa a grupo dagiti napagungar a nailadawan kas ‘pagarian ken papadi nga agturay iti daga.’ (Apocalipsis 3:21; 5:10) Mano ti bilangda? No kasano a sumagmamano laeng ti agturay iti tunggal gobierno, sumagmamano met laeng nga indibidual ti agturay iti nailangitan a Pagarian. Ni Jesus, ti Kordero ti Dios, kaduana nga agturay ti 144,000 a ‘nagatang manipud iti sangatauan.’​—Apocalipsis 14:1, 4, 5.

No idilig iti ti amin a matalek idi ken ita, pudno a bassit laeng ti 144,000 a bilang dagiti mapagungar a mapan idiay langit. Ngem maikanatad dayta ta napilida para iti espesipiko ken sagrado nga annongen. Ipapantayon a mangbangonka iti balay, ayabam kadi amin a nalaing a karpintero a kalugaram? Saan. Sumagmamano laeng ti kasapulam nga agtrabaho. Umasping iti dayta, saan a pinili ti Dios ti amin a matalek a tao para iti naisangsangayan a pribilehio a makipagturay ken Kristo idiay langit.

Daytoy a nailangitan a gobierno ti mangibanag iti orihinal a panggep ti Dios iti sangatauan. Ni Jesus ken ti 144,000 a kakaduana nga agturay imatonanda ti panagbalin a paraiso ti intero a daga. Siraragsak nga agbiag nga agnanayon sadiay ti nakaad-adu a matalek a tattao. (Isaias 45:18; Apocalipsis 21:3, 4) Karaman ditoy dagiti adda iti lagip ti Dios a mapagungarto.​—Juan 5:28, 29.

Amin a matalek nga agdaydayaw ken Jehova​—idi ken ita​—umawatdanto iti nadayag a sagut a biag nga agnanayon. (Roma 6:23) Sumagmamano laeng ti mapan idiay langit para iti naisangsangayan nga annongen. Agbiagto iti paraiso a daga ti kaaduan.