Ania ti Rumbeng a Masursuro Dagiti Ubbing?

“Amin a Kasuratan impaltiing ti Dios ken makagunggona iti panangisuro, iti panangtubngar, iti panangpalinteg iti bambanag, iti panangdisiplina iti kinalinteg.”​—2 TIMOTEO 3:16.

MASAPUL a maisuro kadagiti ubbing ti kinapudno maipapan iti Dios. Pakasursuruanda ngata iti dayta? Manipud iti mapagraraeman unay a narelihiosuan a libro iti lubong, ti Biblia.

Mayarig ti Biblia iti maysa a surat manipud iti Dios. Iti dayta a surat, impalgak ti Dios ti personalidadna ken nangipaay kadagiti moral a pagalagadan para kadagiti annakna, ubbing man wenno nataengan. Adtoy ti sumagmamano a pannursuro ken adal a linaon ti Biblia a mabalin a masursuro uray dagiti ubbing.

Ania ti kayat ti Dios a maammuantayo maipapan kenkuana?

◼ Pannursuro ti Biblia: “Tapno maammuan koma dagiti tattao a sika, nga agnagan Jehova, Sika laeng ti Kangatuan iti intero a daga.”​—Salmo 83:18.

Maadal: Ti Dios ket saan a maysa a puersa, no di ket pudno a Persona nga addaan personal a nagan.

◼ Pannursuro ti Biblia: “Amin a puspuso sukimaten ni Jehova, ket tunggal pagannayasan ti pampanunot mailasinna. No birokem, ipalubosnanto nga isu masarakam.”​—1 Cronicas 28:9.

Maadal: Maseknan ni Jehova kadatayo amin, agraman ti babassit nga ubbing. (Salmo 10:14; 146:9) Kayatna a maaddaantayo iti pannakaammo maipapan kenkuana.

◼ Pannursuro ti Biblia: “Dikay parigaten ti asinoman . . . [nga] awan amana nga ubing. No parigatem latta, ngarud no umkis latta kaniak, di bumurong a denggek ti ikkisna.”​—Exodo 22:22-24.

Maadal: Denggen ni Jehova uray ti kararag ti babassit nga ubbing. Mabalintayo ti regular a makisarita iti Dios ken mayebkastayo kenkuana ti pampanunot ken rikriknatayo.

◼ Pannursuro ti Biblia: “Maulit-ulit a subokenda ti Dios, ket pinasakitanda uray Daydiay Santo ti Israel.”​—Salmo 78:41.

Maadal: Maapektaran ti rikna ni Jehova iti panagsasao ken tigtignaytayo, isu a panunotentayo a naimbag no ania ti sawen ken aramidentayo.

 Ania ti rumbeng a panangtratotayo kadagidiay naiduma kadatayo?

◼ Pannursuro ti Biblia: “Ti Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.”​—Aramid 10:34, 35.

Maadal: No akseptaren ti Dios dagiti tattao aniaman ti nalikudanda, saan ngarud a rumbeng nga idumdumatayo ti sabsabali gapu iti kolor wenno itsurada.

◼ Pannursuro ti Biblia: “Kankanayon a sisasagana nga agikalintegan iti sanguanan ti tunggal maysa nga agkalikagum kadakayo iti rason maipaay iti namnama nga adda kadakayo, ngem aramidenyo ti kasta buyogen ti naalumamay a kababalin ken nauneg a panagraem.”​—1 Pedro 3:15.

Maadal: Sigaganetget nga ilawlawagtayo dagiti narelihiosuan a patpatientayo ngem iti naalumamay a pamay-an. Raementayo met koma dagidiay naiduma ti pammatida.

Ania ti rumbeng a panangtratotayo kadagiti kameng ti pamiliatayo?

◼ Pannursuro ti Biblia: “Dakayo nga annak, agtulnogkayo kadagiti nagannakyo iti amin a banag, ta daytoy ket makaay-ayo unay iti Apo.”​—Colosas 3:20.

Maadal: No natulnog dagiti annak, ipakpakitada nga ay-ayatenda dagiti nagannakda ken kayatda a paragsaken ti Dios.

◼ Pannursuro ti Biblia: “Itultuloyyo nga anusan ti maysa ken maysa ken sibubulos a pakawanen ti maysa ken maysa no ti asinoman adda pakaigapuan ti reklamona maibusor iti sabali. Kas iti sibubulos a panangpakawan kadakayo ni Jehova, kasta met ti aramidenyo.”​—Colosas 3:13.

Maadal: Mabalin a nasakit ti nakemtayo no dadduma iti sabsabali, uray kadagiti kameng ti pamiliatayo. Ngem nasken a sursuruentayo ti mangpakawan no kayattayo a pakawanennatayo ti Dios.​—Mateo 6:14, 15.

 Apay a masapul nga agbalintayo a napudno ken nasingpet?

◼ Pannursuro ti Biblia: “[Iwaksiyo] ti kinaulbod, [ken] sawenyo ti kinapudno tunggal maysa kadakayo iti padana a tao.”​—Efeso 4:25.

Maadal: No sawentayo ti pudno, tultuladen ken parparagsakentayo ti Dios. No iruamtayo ti agulbod, tultuladentayo ti Diablo a kabusor ti Dios ken “ama ti kinaulbod.”​—Juan 8:44; Tito 1:2.

◼ Pannursuro ti Biblia: “Tratuenyo ti sabsabali iti kayatyo a panangtratoda kadakayo.”​—Mateo 7:12, “Contemporary English Version.”

Maadal: Agbalintayo koma a mannakaawat iti rikrikna, kapanunotan, ken kasapulan dagiti kameng ti pamiliatayo ken dagiti kaarrubatayo. No mannakipagriknatayo, nasaysayaat met ti panangtrato ti dadduma kadatayo.​—1 Pedro 3:8; Lucas 6:38.

Dagitoy a pannursuro a linaon ti Biblia ipakpakitana a makatulong dagitoy kadagiti ubbing tapno agbalinda a manangapresiar, managraem, ken mannakipagrikna nga adulto. Ngem siasino ti rumbeng a mangisuro kadagitoy kadagiti ubbing?