Siasino ti Rumbeng a Mangisuro Kadagiti Ubbing Maipapan iti Dios?

“Ti agad-adal saan a nangatngato ngem iti mannursurona, ngem tunggal maysa a naan-anay a nasursuruan agbalinto a kas iti mannursurona.”​—LUCAS 6:40.

IPAGARUP ti dadduma a nagannak a saanda a kualipikado a mangisuro kadagiti annakda maipapan iti Dios. Mabalin nga ipapanda a saanda a nalaing a mangisuro ta nababa ti adalda wenno bassit ti ammoda maipapan iti relihion. Gapuna, mabalin nga ipabiangda lattan dayta iti maysa a kabagian wenno lider ti relihion.

Ngem asino ti kasayaatan a mangisuro iti ubbing kadagiti kinapudno a linaon ti Biblia ken kadagiti moral a prinsipio? Usigem ti kunaen ti Biblia maipapan iti daytoy a topiko, sa idiligmo dagita kadagiti natakuatan dagiti managsirarak.

Ania ti Akem ti Ama?

Pannursuro ti Biblia: “Dacayo nga amma, dicay ruroden dagiti annacyo, no di ket idalanyo ida iti alagaden ken pammagbaga ti Apo.”​—Efeso 6:4, “Ti Biblia.”

Natakuatan dagiti managsirarak: Kasano a magunggonaan dagiti amma no agbalinda a relihioso? Kuna ti artikulo a Fathers’ Religious Involvement and Early Childhood Behavior, a naipablaak idi 2009: “Agbalin a nasaysayaat nga  amma dagiti lallaki no kamengda iti maysa a relihion. Mangipaay ti relihion iti suporta ken iti al-alagaden ken nasasayaat a prinsipio iti umiso a panagbiag.”

Ipaganetget ti Biblia a nagpateg ti akem ti ama iti panangpadakkel ken panangsanay kadagiti annak. (Proverbio 4:1; Colosas 3:21; Hebreo 12:9) Ngem agaplikar kadi ita dayta a balakad? Idi 2009, nangipablaak ti University of Florida iti artikulo a mangilawlawag iti impluensia dagiti amma kadagiti annakda. Sigun kadagiti managsirarak, dagiti amma a makiramraman iti panangpadakkel kadagiti annakda agbalinda nga ad-adda a mannakipagrikna ken adda panagraemda iti bagida. Posible nga agbalin a nasingsingpet dagiti ubbing a lallaki, ken nalalaing dagiti ubbing a babbai. Ngarud, nabatad nga agaplikar pay laeng ita ti balakad ti Biblia.

Kasano Kapateg ti Akem ti Ina?

Pannursuro ti Biblia: “Saanmo a baybay-an ti linteg ni inam.”​—Proverbio 1:8.

Natakuatan dagiti managsirarak: Idi 2006, kuna ti Handbook of Child Psychology nga ad-adu ti tiempo a pannakilangen dagiti inna iti annakda ngem iti pannakilangen dagiti amma. Gapu iti dayta, ad-adda a matulad ti ubing ti panagsasao, tigtignay, ken kababalin ti ina.

No agtinnulong ti ina ken ama a mangisuro iti annakda iti kinapudno maipapan iti Dios, adda dua a banag a maisagutda kadagiti annakda. Umuna, maaddaan dagiti annakda iti gundaway a makigayyem iti nailangitan nga Ama, ket pakagunggonaanda dayta iti unos ti panagbiagda. Maikadua, makasursuro dagiti ubbing no makitada ti panagtinnulong dagiti nagannak a mangragpat kadagiti kalatda. (Colosas 3:18-20) Nupay mabalin nga adda tumulong kadagiti nagannak, rebbengenda latta nga isuro dagiti annakda maipapan iti Dios ken iti pagayatanna mainaig iti pamilia.

Kasano ngarud a maisuroda dagiti annakda? Ania dagiti kasayaatan a pamay-an?