Adda Kadi Makinggapuanan iti Amin a Kinadakes?

“NAALAMANOK ti diablo,” kinuna ti komander ti armada ti United Nations idiay Rwanda ta saanda a nalapdan ti panagiinnibus iti puli iti dayta a daga idi 1994. Kinuna ti sabali pay a nakaimatang iti nakaam-ames a kinaranggas: “No adda pay laeng mangibaga nga awan ni Satanas, awisek a kitaenna ti nakaitabonan ti adu a tattao idiay Rwanda.” Talaga kadi nga aramid ti Diablo dagitoy a nakaro a kinaranggas?

Saan a bigbigen ti kaaduan nga aramid ti nadangkes nga espiritu ti nakaam-amak a kinaranggas ken kinaulpit. Adu ti agkuna a ti nainkasigudan a kinadakes ti tao ken ti kinaagumtayo ti kangrunaan a makagapu kadagitoy. Ipapan ti dadduma nga adda kano nabaknang, nabileg, ken nalimed nga agkakappon a grupo a mangkonkontrol kadagiti tattao iti adun a dekada tapno iturayanda ti intero a lubong. Siempre, adda met dagiti mangbabbabalaw kadagiti gobierno ken agtuturay gapu iti kinaawan hustisia ken panagsagaba a makitkitatayo.

Ania kadagitoy ti patiem? Apay nga agraraira ita ti kinadakes, kinaulpit, kinaranggas, ken panagsagaba ditoy lubong nupay maikagkagumaan met a masolbar dagita? Apay a kasla pagay-ayat ti sangatauan ti maisagmak iti kinadakes, a dida dumdumngeg iti maulit-ulit a ballaag? Adda kadi mangkonkontrol kadakuada? Asino a talaga ti mangiturturay iti lubong? Mabalin a maklaatka iti sungbat.