Saludsod Dagiti Agbasbasa

Rumbeng Kadi a Mabuniagan Dagiti Maladaga?

▪ “Maamakak di la ket ta mapan idiay Limbo ni adingko a John,” kuna ni Victoria. Apay a maamak unay? “Natay ni John a di nabuniagan,” inlawlawagna, “ket kinuna ti maysa a Katoliko a padi a gapu iti dayta, mabalin a mapan ni John idiay Limbo.” Talaga a nakaam-amak dayta, ngem naibatay kadi iti Kasuratan? Isuro kadi ti Biblia a mapan idiay purgatorio dagiti natay nga ubbing a di nabuniagan?

Isuro ti Biblia a masapul nga agbautisar dagiti Kristiano. Imbilin ni Jesus kadagiti pasurotna: “Mangaramidkayo iti ad-adalan kadagiti tattao iti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu, nga isuroyo kadakuada a tungpalenda ti amin a bambanag nga imbilinko kadakayo.” (Mateo 28:19, 20) Paliiwem ta umuna nga agbalin nga adalan ni Jesus dagidiay mabautisaran. Kayatna a sawen, nasursuruanda maipapan ken Jesus ken pinilida a suroten ti addangna​—banag a saan a maaramid ti maladaga.

Ngem kaskasdi nga ipapilit ti adu nga agaplikar met kadagiti ubbing daytoy a bilin ni Jesus. “Masapul a mabuniagantayo amin, agraman dagiti maladaga,” impetteng ti pastor ti Lutheran a ni Richard P. Bucher. Intuloyna a kinuna: “No saanmo ida a pabuniagan, saan a mapakawan ti basolda ken mabalin a mapanda idiay purgatorio.” Ngem dagitoy a komento ket maikontra iti pannursuro ni Jesus iti tallo a pamay-an.

Umuna, saan nga insuro ni Jesus a rumbeng a mabuniagan dagiti maladaga. Apay a napateg a maammuam? Panunotem daytoy: Impaganetget ni Jesus kadagiti adalanna dagiti kalikaguman ti Dios. No dadduma, ulitenna pay dagiti kangrunaan a pannursuro. Apay? Tapno sigurado a maawatan dayta dagiti adalanna. (Mateo 24:42; 25:13; Marcos 9:34-37; 10:35-45) Ngem dina pulos insuro a masapul a mabuniagan dagiti maladaga. Nalipatan laeng ngata ni Jesus a dakamaten dayta? Imposible! Imbaga koma ni Jesus a mabuniagan dagiti maladaga no talaga a kasapulan dayta.

Maikadua, saan a pulos nga insuro ni Jesus nga adda asinoman nga agtutuok kalpasan ti ipapatay. Mamati iti Kasuratan, a nabatad nga agkuna: “Dagiti sibibiag sipapanunotda a mataydanto; ngem no maipapan kadagiti natay, saanda a pulos sipapanunot iti aniaman.” (Eclesiastes 9:5) Ammo ni Jesus a saan nga agsagsagaba dagiti natay idiay purgatorio, Limbo, impierno, wenno iti aniaman a sabali a lugar. Imbes ketdi, insurona nga awan puot dagiti natay, kas iti matmaturog.​—Juan 11:1-14.

Maikatlo, insuro ni Jesus nga agungarto “amin dagidiay adda kadagiti pakalaglagipan a tanem.” (Juan 5:28, 29) Karaman ditoy ti minilion a natay a di nabuniagan. Inton mapagungarda, adda gundawayda a mangammo kadagiti kalikaguman ti Dios ken agbiag iti agnanayon iti Paraiso a daga. a​—Salmo 37:29.

Nalawag ngarud a saan nga isuro ti Biblia a masapul a mabuniagan dagiti maladaga.

[Footnote]