Napateg Kadi ti Sungbat?

“Sangapulo ti tawenko idi rinugiak ti makikuyog kadagiti lallaki. Idi damo, agpinnetpet ken aginnagekkami laeng. Ngem idi agangay, agkinnarawa ken ageksperimentokamin mainaig iti sekso. Agtawenak iti 15 idi inrugik ti agtrabaho ket awisendak dagiti lallaki a katrabahoak tapno makidennaak kadakuada. Nagbalinak a darasudos ket kayatko a padasen ti aniaman nga ar-aramiden dagiti katrabahuak. Kayatko nga akseptarendak, ket nangituggod dayta iti ad-adu pay nga imoral a seksual nga ar-aramid.”​—SARAH, a AUSTRALIA.

MAKLAATKA kadi no maammuam a dimmakkel ni Sarah iti relihioso a pamilia? Inkagumaan dagiti dadakkelna nga iyukuok kenkuana dagiti moral a pagalagadan ti Biblia. Ngem sabali ti sinurot ni Sarah.

Mabalin nga adu ti umanamong iti pinili ni Sarah. Patienda a lausen ti panangmatmat ti Biblia maipapan iti sekso. Ipagarup ti dadduma a mabalin a paggiddanen ti kinarelihioso ken ti nalulok a panagbiag.

Napateg kadi nga ammuem ken annurotem no ania ti isursuro ti Biblia maipapan iti sekso? Kuna a mismo ti Biblia a dayta ket “impaltiing ti Dios ken makagunggona iti panangisuro.” (2 Timoteo 3:16) No patiem a pinarsua ti Dios dagiti tattao ken patiem a ti Biblia ket impaltiingna a Saona, napateg ngarud a maammuam ti ibagana maipapan iti sekso.

Ngem adu ti mariro no ania ti isursuro ti Biblia maipapan iti sekso. Agsisimparat ti isursuro dagiti lider ti relihion nga agkuna a raraemenda ti Biblia. Kinapudnona, agduduma ti ibagbaga dagiti nalatak a relihion.

Imbes a mamatika iti kuna ti sabsabali, apay a dimo usigen a mismo dayta? Iti sumaganad nga artikulo, direkta a masungbatan ti sangapulo a saludsod mainaig iti kunaen ti Biblia maipapan iti sekso. Naibatay dagitoy a sungbat iti talaga nga isursuro ti Biblia. Ilawlawag met ti maysa pay nga artikulo no apay a napateg ti desisiontayo.

[Footnote]