Abraham​—Ulidan ti Ayat

Saan a masbaalan ti lakayen a ni Abraham ti ladingitna gapu iti ipapatay ti dungdungnguenna nga asawa a ni Sara. Malaglagip ni Abraham dagiti naragsak a gundaway a panagkaduada bayat ti panangipumponna. Saanna a malapdan ti panagarubos dagiti luana. (Genesis 23:1, 2) Saan a pakaibabainan ni Abraham ti panagsangitna, no di ket pammaneknek dayta ti panagayatna​—ti maysa kadagiti nagsayaat a galadna.

ANIA TI AYAT? Ti ayat ket pannakarikna iti nabara a personal a singgalut wenno nauneg a pammateg. Ipakita ti naayat a tao ti pammategna kadagiti ay-ayatenna, uray agsakripisio no kasapulan.

KASANO NGA IMPAKITA NI ABRAHAM TI AYAT? Impakita ni Abraham nga ay-ayatenna ti pamiliana. Nupay okupado ni Abraham kas ulo ti pamilia, dina pulos liniwayan ti emosional ken naespirituan a kasapulan ti pamiliana. Kinapudnona, nakita ni Jehova a responsable ni Abraham a mangidaulo iti panagdayaw iti Dios. (Genesis 18:19) Dinakamat pay ni Jehova ti panagayat ni Abraham ta tinukoyna ni Isaac kas “anakmo nga ay-ayatem unay.”​—Genesis 22:2.

Madlawtayo pay ti ayat ni Abraham iti ingungotenna nga asawa a ni Sara ta dinung-awanna idi natay. Nupay malalaki, saan nga imbain ti agsangit. Agpada nga imparangarang ni Abraham a natibker ti pakinakemna ken nalukneng ti pusona.

 Impakita ni Abraham nga ay-ayatenna ti Diosna. Kasta ti imparangarang ti intero a panagbiagna. Kasano? Mabalin a malagiptayo ti kuna ti Biblia iti 1 Juan 5:3: “Daytoy ti kaipapanan ti ayat iti Dios, a tungpalentayo dagiti bilinna.” Talaga a nagpaiduma ni Abraham kas ulidan ti panagayat iti Dios.

Dagus a nagtulnog ni Abraham iti aniaman a bilin ni Jehova. (Genesis 12:4; 17:22, 23; 21:12-14; 22:1-3) Nagtulnog latta ni Abraham nalaka man wenno narigat ti ipaaramid ti Dios, ammona man ti makagapu wenno saan. Situtulok nga inaramidna ti aniaman a kayat ti Dios. Imbilang ni Abraham a ti tunggal bilin ket gundawayna a mangipakita iti ayatna ken Jehova.

ANIA DAGITI PUNTO A MAADALTAYO? Matuladtayo ni Abraham no iyebkastayo ti pammategtayo iti sabsabali, nangruna kadagiti kameng ti pamiliatayo. Saantayo koma nga ipalubos a dagiti pakasikoran iti biag ti mangagaw iti panawentayo para kadagiti dungdungnguentayo.

Pagreggetantayo met koma a patanoren ti naimpusuan a panagayattayo ken Jehova. Dakkel ti maitulong dayta iti biagtayo. Kas pagarigan, dayta ti mangtignay kadatayo a mangbalbaliw iti panagsasao ken kababalintayo tapno maparagsaktayo ti Dios.​—1 Pedro 1:14-16.

Pudno a saan a kanayon a nalaka ti agtulnog kadagiti bilin ni Jehova. Ngem manamnamatayo a tulongannatayo ti Persona a timmulong ken Abraham​—Daydiay nangawag kenkuana kas “gayyemko.” (Isaias 41:8) Ikari ti Saona, ti Biblia, a ‘patibkeren ken papigsaennakanto.’ (1 Pedro 5:10) Anian a makaparagsak a kari ti mapagtalkan a Gayyem ni Abraham!

[Kahon iti panid 11]

Nakapuy Kadi ti Lalaki nga Agsangit?

Mabalin a “wen” ti sungbat ti adu. Nalabit masdaawda a makaammo a maysa laeng ni Abraham kadagiti nabileg ken matalek a lallaki a kinuna ti Biblia a nagsangit gapu iti ladingitna. Karaman ditoy da Jose, David, apostol Pedro, dagiti panglakayen iti kongregasion ti Efeso, ken uray ni Jesus. (Genesis 50:1; 2 Samuel 18:33; Lucas 22:61, 62; Juan 11:35; Aramid 20:36-38) Nalawag ngarud a saan nga isursuro ti Biblia a nakapuy ti lalaki nga agsangit.