Abraham​—Ulidan ti Kinatured

Buybuyaen ni Abraham ti pamiliana ken dagiti adipenna bayat nga agsagsaganada a mapan idiay Canaan. (Genesis 12:1-5) Mariknana ti dakkel a responsabilidad bayat a matmatmatanna ti dakkel a grupo ti tattao a nakadepende kenkuana iti pagbiagda. Kasano a maipaayna ti material a kasapulanda bayat nga agtataengda iti ganggannaet a daga? Saan ngata a nalaklaka a maipaayna dayta idiay Ur, maysa a narang-ay a lugar nga addaan iti nalawa a pagpastoran, nadam-eg a daga, ken adu a danum? Kasanon no agsakit wenno matay ni Abraham iti papananda a daga? Asinonto ti manga- sikaso iti pamiliana? No adda aniaman a pakadanaganna, saanna nga impalubos a dagita ti pakaupayanna. Determinado nga agtulnog kadagiti bilin ti Dios uray ania ti mapasamak. Dayta ti pagilasinan iti pudno a kinatured.

 ANIA TI KINATURED? Dayta ti nabileg a pakinakem a kasungani ti kinatakrut. Ti kinatured dina kaipapanan a saantayon a marikna ti buteng. Ti tao a natured gapu iti tulong ti Dios agtignay uray adda panagamakna.

KASANO NGA IMPAKITA NI ABRAHAM TI KINATURED? Saan a nagamak ni Abraham a maiduma iti sabali a tattao. Dimmakkel ni Abraham iti lugar nga adu a didios ken idolo ti pagdaydayawan dagiti umili. Ngem saan a nagamak a mangaramid iti ammona nga umiso, aniaman ti panunoten ti sabali a tattao. Imbes ketdi, situtured a pinili ni Abraham ti agbalin a naiduma​—ti agdayaw laeng iti “Kangatuan a Dios” a ni Jehova.​—Genesis 14:21, 22.

Inyun-una ni Abraham ti panagdayawna iti pudno a Dios imbes a ti material a bambanag. Situtulok a pinanawanna ti nanam-ay a biagna idiay Ur ket napan iti let-ang. Naan-anay a nagtalek nga ipaay ni Jehova dagiti material a kasapulanna. Bayat ti panaglabas ti tawtawen, mabalin a nalagip ni Abraham ti nanam-ay a biagna idiay Ur. Ngem sigurado ni Abraham a kanayonto nga ipaay ni Jehova ti kasapulan ti pamiliana. Situtured a nagtulnog ni Abraham kadagiti bilin ti Dios gapu ta imbilangna ni Jehova kas kapatgan a Persona iti biagna.

ANIA DAGITI PUNTO A MAADALTAYO? Matuladtayo ni Abraham no patanorentayo ti tured nga agtulnog ken Jehova, uray no saan a kasta ti ar-aramiden dagiti tattao iti aglawlawtayo. Kas pagarigan, isuro ti Biblia a dagiti gagayyem ken kakabagian mabalin a busorenda dagidiay mangitakder iti pammatida ken Jehova a Dios. (Juan 15:20) Ngem no kombinsidotayo a pudno ti naadaltayo maipapan ken Jehova, itakderantayo ti pammatitayo iti nadayaw a pamay-an.​—1 Pedro 3:15.

Agtalektayo met iti kari ti Dios nga ipaayna ti kasapulan dagidiay agpannuray kenkuana. Dayta a panagtalek ti mangpatured kadatayo a mangipamaysa iti naespirituan a bambanag imbes nga iti material a bambanag. (Mateo 6:33) Kitaentayo no kasano a naaramidan dayta ti maysa a pamilia.

Nupay adda dua a babassit nga annak da Doug ken Becky, kayatda ti umakar iti pagilian nga agkasapulan iti ad-adu a mangipakaammo iti naimbag a damag a linaon ti Biblia. Kalpasan ti panagsukimat ken napasnek a panagkararagda, inkeddengda nga ituloy dagiti planoda. “Kasapulan ti tured a mangrubbuat kadagiti ubbing ken umakar, uray saanmi nga ammo no ania a talaga ti pagtungpalan ti desisionmi,” kuna ni Doug. “Ngem idi pay rugianmi ti agplano nga umakar, nagsaritaan ken pinampanunotmin ti ulidan da Abraham ken Sara. Nakatulong kadakami ti panagtalekda ken Jehova ken ti saan a pulos panangpaay kadakuada ti Dios.”

Kinuna ni Doug maipapan iti biagda iti sabali a pagilian: “Aglaplapusanan ti bendision a nasagrapmi. Gapu ta nasimsimple ti biagmi, kaaduanna nga agkakaduakami a sangapamiliaan a mangasaba, agtutungtong, ken agay-ayam. Nakaragragsakkami ta maipamaysami nga asikasuen ti pamiliami ken ti panagdayawmi iti Dios.”

Siempre, saan nga amin ket makaaramid iti kasta a dakkel a panagbalbaliw. Ngem mabalintayo amin a tuladen ni Abraham babaen ti panangipangpangruna iti panagdayawtayo iti Dios, nga agtalektayo nga ipaayna dagiti kasapulantayo. No kasta ti aramidentayo, ipangpangagtayo ti balakad ti Biblia ket sitatalged a maikunatayo: “Ni Jehova ti katulongak; saanakto nga agbuteng.”​—Hebreo 13:5, 6.

[Blurb iti panid 7]

Ti tao a natured gapu iti tulong ti Dios agtignay uray adda panagamakna

 [Kahon/Ladawan iti panid 8]

Nadiosan a Babai ken Maipatpateg nga Asawa

Addaan ni Sara iti naidaddaduma ti kinamatalekna nga asawa. Ngem uray ni Sara ket nagsayaat met nga ulidan ti pammati. Kinapudnona, namitlo a dinakamat ti Biblia ti naganna kas nasayaat nga ulidan kadagiti babbai a managbuteng iti Dios. (Isaias 51:1, 2; Hebreo 11:11; 1 Pedro 3:3-6) Nupay bassit ti ipalgak ti Biblia maipapan itoy a natalunggadingan a babai, umdasen dayta tapno maibagatayo nga isu nasayaat a babai.

Kas pagarigan, panunotem ti reaksion ni Sara idi imbaga kenkuana ni Abraham ti bilin ti Dios a panawanda ti Ur. Dinamagna ngata ti pagturonganda ken no apay nga umakarda? Naseknan ngata kadagiti material a kasapulanda? Nagdanag ngata iti panangpanawna iti gagayyem ken kapamiliana ta saanna nga ammo no agkikitadanto pay? Sigurado a napanunotna dagita. Ngem sitatallugod a pimmanaw ket nagtalek a bendisionan ni Jehova ti kinatulnogna.​—Aramid 7:2, 3.

Saan laeng a natulnog ni Sara kas adipen ti Dios no di ket nagsayaat pay nga asawa. Imbes nga agawenna ti panangidaulo iti pamilia, naimpusuan a pinagraemanna ti asawana ket siaayat a sinuportaranna ti panangidaulo ni lakayna iti pamiliada. Gapuna, inarkosanna ti bagina kadagiti agkakaimbag a galad.​—1 Pedro 3:1-6.

Makagunggona kadi ita kadagiti assawa a babbai dagita a kababalin? “Nakasursuroak iti ulidan ni Sara a masapul nga iyebkasko ti kapanunotak iti asawak,” kuna ti babai nga agnagan Jill, a nasuroken a 30 a tawen a naasawaan. Kunana pay: “Ni lakayko ti mangaramid iti pinal a desision ta isu ti ulo ti pamilia. Aramidek ti amin a kabaelak a mangitungpal iti desisionna.”

Nalabit daytoy ti kasayaatan a maadaltayo ken Sara: Nupay nakapimpintas, saan a nagbalin a natangsit. (Genesis 12:10-13) Sipapakumbaba ketdi a sinuportaranna ni Abraham iti rigat man ken nam-ay. Wen, napakumbaba, naayat, ken matalek da Abraham ken Sara isu a nagbalinda a bendision iti maysa ken maysa.