“KUMPETKA,” kuna ti ama iti anakna bayat nga agsagsaganada a bumallasiw iti kalsada nga adu ti lumaslasat a lugan. Siirut a pinetpetan ti nabileg nga ima ti ama ti babassit a ramay ti anakna, isu a natalged ken saan a mabuteng ti ubing. Tartarigagayam kadi nga adda koma met mangkibin kenka tapno mapagballigiam ti aniaman a pakasikoran iti biag? Ngarud, makaliwliwa kenka dagiti sasao nga inlanad ni Isaias.​—Basaem ti Isaias 41:10, 13.

Inturong ni Isaias dagitoy a sasao iti nasion ti Israel. Nupay ti Dios imbilangna ti Israel kas ‘naisangsangayan a sanikuana,’ nalikmut dayta kadagiti kabusor. (Exodo 19:5) Rumbeng kadi nga agbuteng ti Israel? Ni Jehova inusarna ni Isaias a mangipakaammo iti makaliwliwa a mensahe. Bayat nga usigentayo dagita a sasao, laglagipentayo nga agaplikar met dagita kadagiti agdaydayaw iti Dios iti kaaldawantayo.​—Roma 15:4.

“Dika agbuteng,” indagadag ni Jehova. (Bersikulo 10) Adda panggapuan ni Jehova a mangibaga iti dayta. Inlawlawagna no apay a saan koma nga agbuteng ti ilina: “Ta addaak kenka.” Saan laeng a tumulong ni Jehova no kasapulan dayta ti ilina. Kayatna a maammuan dagiti adipenna nga isu ket adda kadakuada​—kas man la adda iti sibayda​—a kanayon a sisasagana a tumulong. Saan kadi a makaliwliwa dayta?

Ipanamnama pay ni Jehova kadagiti agdaydayaw kenkuana: “Dika agtalangkiaw.” (Bersikulo 10) Ti Hebreo a berbo a naaramat ditoy mabalin a tumukoy kadagidiay “kumita iti aglawlaw tapno kitaen[da] no adda aniaman a makadangran kadakuada.” Ilawlawag ni Jehova no apay a saan koma nga agdanag ti ilina: “Ta siak ti Diosmo.” Awanen ti ad-adda pay a makaliwliwa ngem iti dayta! Ni Jehova ti “Kangatuan,” ti “Mannakabalin-amin.” (Salmo 91:1) Yantangay ti mannakabalin-amin a ni Jehova ti Diosda, apay koma nga agbutengda?

Ania ngarud ti ekspektaren Kenkuana ti ilina? Inkarina: “Pudno nga itultuloykanto nga iggaman a siiirut babaen ti bukodko a makannawan nga ima ti kinalinteg.” (Bersikulo 10) Kinunana pay: “Siak, ni Jehova a Diosmo, ig-iggamak ti makannawan nga imam.” (Bersikulo 13) Ania ti mapanunotmo no mangngegmo dagita a sasao? “No mausig dagitoy dua a bersikulo, nagsayaat ti panangiladawanda iti relasion ti ama ken ti anakna,” kuna ti maysa a reperensia. “Saan laeng nga agtakder [ti ama] tapno mangsalaknib, no di ket adda a mismo iti sibay ti anakna; dina baybay-an a maisina kenkuana ti ubing.” Agasem, saan nga ipalubos ni Jehova a maisina kenkuana dagiti adipenna, uray no kasla daytan ti karirigatan a kanito iti biagda.​—Hebreo 13:5, 6.

Maliwliwa met ita dagiti agdaydayaw ken Jehova iti sasao nga insurat ni Isaias. Kadagitoy “napeggad a tiempo a narigat a pakilangenan,” mabalin a madanagantayo kadagiti pakasikoran iti biag. (2 Timoteo 3:1) Ngem saantayo nga agmaymaysa a mangsango kadagitoy. Madadaan a mangyawat ni Jehova iti imana ken mangpetpet iti imatayo. Kas iti ubbing nga agtalek iti amana, mabalintayo a petpetan ti nabileg nga ima ni Jehova, nga agtalektayo nga iturong wenno kibinennatayo iti umiso a dana ken tulongannatayo kadagiti parikuttayo.​—Salmo 63:7, 8.

Singasing a Basaen iti Biblia iti Enero:

◼ Isaias 24-42