Apay a Dakes ti Espiritismo?

Ubing pay ni Barbara * idi makakitkita kadagiti partaan ken makangkangngeg kadagiti karkarna a timek. Kombinsido a makasarsaritana dagiti natayen a kabagianna. Agbasbasada ken lakayna a Joachim kadagiti libro ti espiritismo ket nagbalinda a nalaing nga agbasa iti baraha (tarot cards). Nabasada iti baraha a dakkel a kuarta ti masapulanda ket pimmudno dayta idi nagnegosioda. Naminsan, impakdaar dagiti baraha nga adda dakes a tattao nga umay iti pagtaenganda ken imbaga pay dagiti baraha no kasano a salaknibanda ti bagida.

KASLA inuugma ti panamati iti espiritismo ngem adu latta dagiti aginteres ken agusioso iti karkarna a bambanag. Adu a tattao iti intero a lubong ti agar-aramat iti anting-anting, Ouija board, ken agkonsultada kadagiti mammalad wenno espiritista tapno maammuanda ti gasatda wenno saanda a madangran kadagiti dakes nga espiritu. Kastoy ti kuna ti artikulo a “Laptop und Luzifer” iti magasin a Focus iti Germany: “Adu ti aginteres ken agusioso iti panagpadles gapu iti Internet.”

Ammom kadi a nadakamat ti espiritismo iti Biblia? Mabalin a maklaatka iti kunaenna.

Ania ti Kuna ti Biblia Maipapan iti Espiritismo?

Kuna ti linteg ti Dios iti nagkauna nga ilina nga Israel: “Awan koma ti masarakan kenka . . . a mangaramat iti panagpadles, maysa a managsalamangka wenno asinoman nga agsapul kadagiti partaan wenno maysa a mangkukulam, wenno maysa a mangkayaw iti sabsabali babaen ti pagilabeg wenno asinoman nga umuman iti mannakiuman iti espiritu wenno maysa a propesional a managipadles kadagiti pasamak wenno asinoman nga agimtuod iti natay. Ta isuamin nga agar-aramid kadagitoy a banag ket nakarimrimon ken Jehova.” (Deuteronomio 18:10-12) Apay a nakaing-inget ti linteg ni Jehova maibusor iti espiritismo?

Kas ipakita ti kapadasan iti ngato, adu ti mamati a kabaelan dagiti sibibiag ti makisarita kadagiti natay ken patienda a nagtaud kadagiti natay dagiti naalada nga impormasion babaen iti espiritismo. Nagtaud dagita a patpatien iti sursuro ti adu a relihion nga agtultuloy kano nga agbiag dagiti natayen a tattao iti lubong dagiti espiritu. Ngem maisupadi iti dayta ti nalawag nga isursuro ti Biblia: “No maipapan kadagiti  natay, saanda a pulos sipapanunot iti aniaman.” (Eclesiastes 9:5) Inyarigna ti kasasaadda kadagiti tattao a nargaan ti turogda a saanda a mapupuotan ti mapaspasamak iti aglawlawda. * (Mateo 9:18, 24; Juan 11:11-14) Gapuna, mabalin a maisaludsodmo, Apay ngarud nga adda karkarna a bambanag a makitkita wenno mapaspasaran dagiti tattao? Siasino ti adda iti likudan dagitoy?

Pannakikomunikar Kadagiti Espiritu

Sigun kadagiti salaysay ti Ebanghelio, nakisarita ni Jesus kadagiti espiritu idi adda ditoy daga. Kuna ti Marcos 1:23, 24 nga imbaga ti maysa a “narugit nga espiritu” ken Jesus: “Ammok . . . no siasinoka.” Sigurado nga am-ammodaka met dagiti espiritu. Ngem am-ammom kadi ida?

Sakbay a pinarsua ti Dios dagiti tattao, immuna a pinarsuana ti riniwriw nga espiritu nga annak, wenno anghel. (Job 38:4-7) Natantan-ok dagiti anghel ngem kadagiti tattao. (Hebreo 2:6, 7) Mannakabalinda ken nasariritda, ken naparsuada tapno aramidenda ti pagayatan ti Dios. Inkanta ti salmista: “Bendituenyo ni Jehova, O dakayo nga anghelna, a nabileg iti pannakabalin, a mangitungtungpal iti saona.”​—Salmo 103:20.

Ipalgak ti Biblia nga adda dagiti anghel idi agangay a nangrugi a makisarita kadagiti tattao iti wagas a saan nga anamongan ti Dios. Ania ti gandatda? Daydiay kaunaan a nakisarita iti tao inallilawna dagiti immuna a tattao, da Adan ken Eva, ket inyadayona ida manipud iti Dios ken Namarsua kadakuada. Gapu iti dayta, pinagbalinna ti bagina a Satanas a Diablo, maysa a mamarpardaya ken bumusbusor iti Dios.​—Genesis 3:1-6.

Idi agangay, “pinanawan [ti dadduma nga anghel] ti bukodda nga umiso a lugar a pagnaedan” idiay langit, nagbalinda a tattao ken nakidennada kadagiti napipintas a babbai ditoy daga. (Judas 6; Genesis 6:1, 2) Dagidiay a di matalek nga anghel ken dagiti putotda napalalo ti panangriribukda kadagiti tattao agingga a ti “daga napno iti kinaranggas.” Nalabit pamiliarka iti salaysay ti Biblia no kasano nga impatingga ti Dios dayta a naranggas ken dakes a kaputotan babaen iti Layus idi kaaldawan ni Noe.​—Genesis 6:3, 4, 11-13.

Gapu iti layus, kapilitan a pinanawan dagitoy nga anghel ti natauan a bagida ket nagsublida iti dati a kasasaadda kas espiritu. Ngem saanen nga impalubos ti Namarsua nga agsublida iti orihinal a ‘lugar a pagnanaedanda.’ Imbes ketdi, naipababada iti kasasaad a nayarig “kadagiti abut ti napuskol a kinasipnget.” (2 Pedro 2:4, 5) Inawagan ti Biblia dagiti rebelde nga anghel kas “sairo,” wenno demonio. (Santiago 2:19) Isuda ti adda iti likudan ti espiritismo.

Ti Kayat Dagiti Demonio

Dagiti dakes nga espiritu a makisarsarita iti tattao kayatda nga iyadayo ida iti panagdayaw iti pudno a Dios, ni Jehova. Ti ibagbagada a saguday wenno pannakabalin dagiti espiritista ket pangallilaw laeng kadagiti tattao tapno saanda a maammuan ti umiso a pannakaammo iti Dios ken saanda nga agbalin a nasinged kenkuana.

Ti sabali pay a panggep dagitoy a demonio ket nalawag a makita iti gandat ti liderda a ni Satanas idi nakisarita ken Jesus. Imbaga ni Satanas nga itedna ken Jesus ti “amin a pagarian ti lubong ken ti dayagda.” Ania ti subad a kayat ni Satanas? “Agruknoyka ken mangaramidka iti maysa a tignay a panagdayaw kaniak,” kinunana ken Jesus. Wen, kayat ni Satanas ken dagiti demoniona a madaydayawda.  Ngem saan a nagpasulisog ni Jesus a mangtallikud iti Dios ken iti pudno a panagdayaw.​—Mateo 4:8-10.

Manmanon ti kasta a direkta a pannakisarita dagiti dakes nga espiritu. Ngem ikagkagumaanda nga allilawen dagiti inosente babaen iti kasla awan pagdaksanna a paglinglingayan, kas iti panagaramat iti bola a kristal, baraha, ken horoscope. Dika koma paallilaw! Dagita ket saan la a simple a pamay-an a makikomunikar kadagiti di makitkita a puersa. Usaren dagiti dakes nga espiritu dagiti datdatlag tapno maallilaw ken maisiasi dagiti tattao ket saanda nga agdayaw ken Jehova. No saanda nga agballigi iti gandatda, masansan a riribuken ken parigatenda dagiti nasiluanda. No kasta ti situasionmo, ania ti maaramidam tapno makalapsutka iti impluensiada?

No Kasano ti Rumuk-at iti Espiritismo

Laglagipem a dagiti espiritu a makikomkomunikar kadagiti tattao ket kabusor ti Dios ken agur-urayda iti pannakadadael. (Judas 6) Impostor ken ulbod dagitoy, nga agpampammarang kas natayen a tattao. Ania ti riknam no naduktalam nga impostor ti agkunkuna a gayyemmo ken kayatnaka laeng nga isagmak? Ania ti riknam no naammuam a nailaw-anka a nakigayyem iti Internet iti maysa a mananggundaway iti sekso? Nakarkaro pay ti situasionmo no naisagmakka iti impluensia dagiti demonio. Masapul nga aramidem ti amin a kabaelam a rumuk-at kadakuada. Kasano?

Idi naammuan ti dadduma nga agnanaed iti nagkauna nga Efeso ti kuna ti Kasuratan maipapan iti espiritismo, nabigbigda a masapul a dadaelenda dagiti libroda maipapan iti panagsalamangka wenno mahika, kasanoman kangina dagita. “Pinuoranda ida iti sanguanan ti isuamin.” (Aramid 19:19, 20) Ita, dagiti banag a mainaig iti espiritismo ket saan laeng a dagiti libro, anting-anting, Ouija board, ken umasping kadagita no di pay ket dagiti elektroniko a material. Dimo padasen a serken ti aniaman a mangituggod kenka iti espiritismo.

Malagipmo pay kadi dagiti agassawa a nadakamat iti rugi daytoy nga artikulo? Sigun iti barahada, adda kano dakes a tattao a mapan iti balayda ket masapul a saanda a dumngeg ken saanda nga awaten ti aniaman nga ited dagitoy. Agpayso nga adda simmarungkar, dua a Saksi ni Jehova a da Connie ken Gudrun. Idi imbagada nga adda awitda a naimbag a damag maipapan iti Dios, inkeddeng da Joachim ken Barbara ti dumngeg. Idi napagsasaritaanda ti espiritismo, nangipaay da Connie ken Gudrun iti umiso nga impormasion manipud iti Kasuratan. Iti kasta, nairugi ti regular a panagadal iti Biblia.

Idi agangay, nagdesision da Joachim ken Barbara a gupdenda ti aniaman a pannakinaigda kadagiti demonio. Inlawlawag dagiti Saksi a saan a maragsakan iti dayta dagiti dakes nga espiritu. Nagbanaganna, namin-adu a pinarparigat ida dagiti demonio. Idi damo, rinabii a mabutbutengda ket sada la nabang-aran idi immakarda iti sabali a balay. Bayat a napasaranda dagita, kanayon a nagtalek dagitoy nga agassawa iti kuna ti Filipos 4:13: “Ta iti amin a bambanag addaanak iti bileg gapu iti daydiay mangmangted kaniak iti pannakabalin.” Binendisionan ni Jehova ti determinasionda ket saan idan a rirriribuken dagiti dakes nga espiritu. Iti agdama, siraragsak nga agdaydayaw da Joachim ken Barbara iti pudno a Dios, ni Jehova.

Iparegta ti Kasuratan kadagidiay mayat nga agsagrap iti bendision ti Dios: “Agpasakupkayo iti Dios; ngem busorenyo ti Diablo, ket isu agtalawto kadakayo. Umadanikayo iti Dios, ket isu umadaninto kadakayo.” (Santiago 4:7, 8) No kayatmo, maruk-atan ken matulongannaka ni Jehova a Dios manipud iti impluensia dagiti demonio. No malagipda ti pannakawayawayada manipud iti espiritismo, naimpusuan nga umanamong da Joachim ken Barbara iti sasao a mabasa iti Salmo 121:2: “Ti tulongko aggapu ken Jehova.”

[Footnotes]

[Blurb iti panid 21]

Gapu iti ar-aramid ti espiritismo, saan a maaddaan dagiti tattao iti nasayaat a relasion iti Dios

[Blurb iti panid 22]

“Umadanikayo iti Dios, ket isu umadaninto kadakayo.”​—SANTIAGO 4:8