MABALIN a makaparagsak a sublian dagiti lagip iti napalabas. Makapabang-ar a panunoten dagiti naragsak a kanito a kaduatayo dagiti ay-ayatentayo iti biag. Ngem no dadduma, kasla dakes a tagtagainep dagiti pasamak iti napalabas. Maburiboranka kadi no mapanunotmo dagiti nasaem a kapadasam iti biag? No kasta, mabalin a maisaludsodmo, ‘Mapunasto pay ngata dagitoy iti lagipko?’ Makaliwliwa unay kadatayo dagiti sasao nga insurat ni propeta Isaias.​—Basaem ti Isaias 65:17.

Panggep ni Jehova nga ikkaten ti amin a banag a mangipalagip iti nasaem a kapadasan. Kasano? Pagpatinggaenna daytoy nadangkes a lubong agraman ti amin a panagsagaba ket suktanna iti nasaysayaat a lubong. Inkari ni Jehova babaen ken Isaias: “Adtoy mangparsuaak iti baro a langlangit ken baro a daga.” Maaddaantayo iti namnama no maawatantayo daytoy a kari.

Ania ti baro a langlangit? Adda ipaay ti Biblia a dua a pangripiripan a tumulong kadatayo a mangammo iti sungbat. Umuna, ti ideya a baro a langlangit ket dinakamat ti dua pay a mannurat iti Biblia, ket agpada a nainaig dagita iti dadakkel a panagbalbaliw iti intero a daga. (2 Pedro 3:13; Apocalipsis 21:1-4) Maikadua, ti termino a “langlangit” iti Biblia ket tumukoy met iti turay, wenno gobierno. (Isaias 14:4, 12; Daniel 4:25, 26) Ti ngarud baro a langlangit ket maysa a baro a gobierno, a makabael a mangyeg iti nalinteg a kasasaad ditoy daga. Adda laeng maymaysa a turay a makaaramid iti dayta​—ti Pagarian ti Dios, ti nailangitan a gobierno nga insuro ni Jesus nga ikararagtayo. Dayta a Pagarian ti mangitungpalto iti nalinteg a pagayatan ti Dios iti intero a daga.​—Mateo 6:9, 10.

Ania ti baro a daga? Usigem dagitoy dua a punto iti Biblia a tumulong kadatayo a mangammo iti sungbat. Umuna, ti termino a “daga” iti Biblia ket tumukoy no dadduma iti tattao, saan nga iti literal a daga. (Salmo 96:1) Maikadua, impadto ti Biblia nga iti sidong ti turay ti Dios, dagiti matalek a tattao masursurodanto ti kinalinteg, nga agsaknapto iti intero a daga. (Isaias 26:9) Ti baro a daga tumukoy ngarud iti kagimongan dagiti tattao nga agpaspasakup iti turay ti Dios ken mangan-annurot kadagiti nalinteg a pagalagadanna.

Makitam kadin no kasano nga ikkaten ni Jehova ti amin a banag a mangipalagip iti nasaem a kapadasan? Asidegen ti naan-anay a panangitungpal ni Jehova iti karina a baro a langlangit ken baro a daga, ket maisagsaganan ti nalinteg a baro a lubong. * Sadiay, dinton pulos umapay iti panunottayo dagiti nasaem a pisikal, mental, ken emosional a kapadasantayo. Nakaragragsakton ti biag dagiti matalek a tattao, ken maay-ayatandanto a manglagip iti nagsasayaat a kapadasanda iti tunggal aglabas nga aldaw.

Anianto met ti mapasamak iti saem ken ut-ot a mangparparigat ita kadatayo? Inkari pay ni Jehova: “Dagiti immun-una a banag saandanto a maipalagip, saandanto met a tumpuar iti puso.” In-inutto a mapunas iti lagiptayo ti aniaman a saem ken ut-ot a napadasantayo iti daytoy daan a lubong. Kayatmo kadi dayta? No kasta, apay a dimo ammuen no kasanoka a makaadani iti Dios a nangikari iti dayta a naraniag a masanguanan?

Singasing a basaen iti Biblia iti Marso:

▪ Isaias 63-66–Jeremias 1-16

[Footnote]

[Blurb iti panid 19]

Panggep ni Jehova a punasen ti amin a banag a mangipalagip iti nasaem a kapadasan