“Daytoy Naimbag a Damag ti Pagarian Maikaskasabanto”

“Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.”​—MATEO 24:14.

Ania ti Kaipapananna? Ti mannurat iti Ebanghelio a ni Lucas kinunana a “nagbambaniaga [ni Jesus] iti siniudansiudad ken iti pinuronpurok, nga ikaskasabana ken idekdeklarana ti naimbag a damag ti pagarian ti Dios.” (Lucas 8:1) Kinuna a mismo ni Jesus: “Masapul nga ideklarak ti naimbag a damag ti pagarian ti Dios, agsipud ta naibaonak maigapu iti daytoy.” (Lucas 4:43) Imbaonna dagiti adalanna nga ikasabada ti naimbag a damag kadagiti ili ken purok sa binilinna ida idi agangay: “Dakayto dagiti saksik . . . agingga iti kaadaywan a paset ti daga.”​—Aramid 1:8; Lucas 10:1.

Kasano nga Impakita Dayta Dagiti Nagkauna a Kristiano? Inaramid a dagus dagiti adalan ni Jesus ti imbilinna kadakuada. “Tunggal aldaw idiay templo ken iti binalaybalay nagtultuloyda nga awan sarday a mangisuro ken mangideklara iti naimbag a damag maipapan iti Kristo.” (Aramid 5:42) Ti historiador a ni Neander kinunana a “ni Celsus, ti kaunaan a mannurat a bimmusor kadagiti Kristiano, linaisna dagiti naregta a manangikasaba iti ebanghelio gapu ta umaabel, sapatero, agkurkurti iti lalat, awan adalna ken ordinarioda laeng a tattao.” Insurat ni Jean Bernardi iti librona a Les Premiers Siècles de L’Église: “Rummuar [dagiti Kristiano] a makisarita iti amin a tattao sadinoman ti ayanda​—kadagiti kangrunaan a kalsada, siudad, plasa, ken pagtaengan. Awaten man ida dagiti tattao wenno saan. . . . Agingga iti ungto ti daga.”

Siasinoda Ita ti Mangan-annurot iti Dayta? Kuna ti Anglicano a padi a ni David Watson: “Ti saan a panangasaba ken panangisuro ti simbaan ti maysa a rason no apay nga awan ti interes ita dagiti tattao iti naespirituan a bambanag.” Iti  librona a ¿Por qué se van los Católicos?, nagsurat ni José Luis Pérez Guadalupe maipapan iti aktibidad dagiti Evangelical, Adventist, ken dadduma pay ket naobserbaranna a “saanda a mapmapan iti binalaybalay.” Ngem insuratna maipapan kadagiti Saksi ni Jehova: “Sistematiko ti pamay-anda nga agbalaybalay.”

Kastoy ti makapainteres ken pudno nga obserbasion ni Jonathan Turley a nailanad iti Cato Supreme Court Review, 2001-2002: “No dagiti Saksi ni Jehova ti mapagsasaritaan, dagus a sumiplot iti panunot ti kaaduan dagiti mangaskasaba nga um-umay iti pagtaengantayo iti saan a kombiniente nga oras. Para kadagiti Saksi ni Jehova, ti panangkombinsirda kadagiti tattao iti binalaybalay ket saan laeng a tapno maisaknap ti pammatida no di ket dayta a talaga ti anag ti pammatida.”

[Kahon iti panid 9]

Mailasinmo Kadi Dagiti Pakabigbigan?

Sigun kadagiti Nainkasuratan a pakabigbigan a nailawlawag iti nagsasaruno nga artikulo, siasino ngata ita ti mangan-annurot kadagita a pakabigbigan dagiti pudno a Kristiano? Nupay pinullo a ribu dagiti grupo ken denominasion dagiti agkunkuna a Kristiano, laglagipem a kastoy ti kinuna ni Jesus kadagiti pasurotna: “Saan a tunggal maysa nga agkunkuna kaniak, ‘Apo, Apo,’ makastrekto iti pagarian ti langlangit, no di ket daydiay mangar-aramid ti pagayatan ni Amak nga adda iti langlangit.” (Mateo 7:21) No mailasinmo dagidiay mangar-aramid iti pagayatan ti Ama, nasarakam metten dagidiay mangan-annurot iti pakabigbigan dagiti pudno a Kristiano. No makikaduaka kadakuada, sagrapemto ti agnanayon a bendision nga iyeg ti Pagarian ti Dios. Pangngaasim ta kasaritam dagiti Saksi ni Jehova, a nangted kenka iti daytoy a magasin, para iti ad-adu pay nga impormasion maipapan iti Pagarian ti Dios ken kadagiti bendision nga ipaayna.​—Lucas 4:43.