ADDA kadin nangibaga kenka a ‘kumpetka’ kenkuana?​— * Mabalin nga ibaga kenka ni tatangmo wenno ni nanangmo a kumpetka iti imana no agballasiwkayo iti kalsada. Ibagana dayta ta ay-ayatennaka ken saanna a kayat a masaktanka. Pagsaritaanta ti maipapan iti maysa a tao a kuna ti Biblia a ‘nagtultuloy a kimpet ken Jehova,’ ti pudno a Dios. Ezekias ti naganna. Kitaenta no ania ti maadalta kenkuana.

Saan a naragsak ni Ezekias idi ubing. Ti amana a ni Acaz nga ari ti Juda ket simmardeng a nagserbi ken Jehova. Insungsong ni Acaz ti panagdayaw iti palso a didios. Adda pay ketdi kabsat ni Ezekias a natay gapu ta indaton dayta ni Acaz iti pagdaydayawanna a didiosen!

Uray nagar-aramid ni Acaz iti dakes, intultuloy latta ni Ezekias ti nagtulnog ken Jehova. Nalaka ngata dayta ken Ezekias?​—Sigurado a saan. Ngem saan a simmuko! Kitaenta no kasano a “kimpet” ken Jehova ken no kasano a matuladtayo ti inaramidna.

Mabalin a naammuan ni Ezekias ti maipapan iti sabsabali a nagtultuloy a nagserbi ken Jehova. Maysa kadakuada ni David a nagbiag ginasut a tawen sakbay ni Ezekias. Nakasursuro kenkuana ni Ezekias babaen iti Kasuratan. “No kas pagarigan ti bukodko nga ama ken ti bukodko nga ina pinanawandak,” insurat ni David, “ni met laeng Jehova pidutennakto.”

Makitam kadi no ania ti nakatulong ken David nga agtulnog ken Jehova?​—Isu ti pammatina! Sigurado ni David a tulongan ni Jehova no la ket natulnog. Saan a nagduadua ni David iti  dayta! Sigurado a nakatulong ken Ezekias ti panangpanunotna iti kinatulnog ni David tapno makapagtultuloy a kumpet Jehova. Masiguradom met a tulongannaka ni Jehova no la ket itultuloymo ti kumpet ken agtulnog kenkuana.

Ngem kasanon no di agserserbi ken Jehova ni nanangmo wenno ni tatangmo?​—Imbilin ti Dios kadagiti annak a rumbeng nga agtulnogda kadagiti nagannakda. Isu a rumbeng a pagtulnogam dagiti nagannakmo. Ngem no ipaaramid kenka dagiti nagannakmo ti saan a kayat ti Dios, mabalinmo nga ilawlawag no apay a saanmo a maaramid dayta. Dika agulbod, agtakaw, wenno agaramid iti aniaman a kuna ti Dios a dakes, uray asino ti mangibaga nga aramidem dagita. Umiso laeng nga agtulnogka iti Dios!

Adu a naimbag nga ehemplo ti mabalintayo a tuladen. Saan laeng a ni David ti nagtuladan ni Ezekias no di pay ket ti mismo a lolona a ni Jotam. No kasano nga adda nasursuro ni Ezekias ken Jotam, adda met ngarud masursurotayo kadagiti pagwadan a mabasa iti Biblia. Adda kadi pay malagipmo a nasayaat a tuladentayo?​—

Pudno nga adda met mabasatayo iti Biblia a nagkamalian da Ezekias, David, Jotam, ken dadduma pay nga imperpekto a tattao. Ngem inayatda ni Jehova, binigbigda ti kamalida, ken inkagumaanda nga aramiden ti umiso. Tandaanam a ti laeng perpekto ket ni Jesus nga Anak ti Dios. Adalenta a naimbag ti maipapan ken Jesus ket ikagumaanta a tuladen ti ulidanna.