Ti Biblia Balbaliwanna ti Biag

APAY a natignay ti maysa a lalaki a mangannurot manen kadagiti narelihiosuan a prinsipio a naisuro kenkuana idi ubing? Kasano a nabirokan ti maysa nga agtutubo ti ama a nabayagen nga il-iliwenna? Basaem ti salaysayda.

“Kasapulan nga Agsubliak ken Jehova.”​—ELIE KHALIL

PANNAKAYANAKNA: 1976

NAKAYANAKANNA: CYPRUS

PAKASARITAANNA: NAIWAWA NGA ANAK

TI NAPALABASKO: Nayanakak idiay Cyprus ngem dimmakkelak idiay Australia. Saksi ni Jehova dagiti nagannakko, ket inaramidda ti amin a kabaelanda a mangisuro kaniak iti panagayat ken Jehova ken iti Saona, ti Biblia. Nagbalinak a nasukir idi tin-edyerak pay. Aglibasak iti balaymi no iti rabii tapno kasinnarakko dagiti barkadak nga agtutubo. Agtakawkami iti kotse ket mairubokami gapu iti dayta.

Idi damo, inlimedko ti ar-aramidek ta maamakak a maluksaw dagiti nagannakko. Ngem in-inut a kimmalio ti pusok. Nakibarkadaak kadagiti in-inauna ngem siak a di mangay-ayat ken Jehova, ket insungsongdak nga agaramid iti di umiso. Idi agangay, imbagakon kadagiti nagannakko a diak kayaten ti agbalin a Saksi. Inan-anusandak a tinulongan ngem diak inkankano ida. Napalalo ti ladingitda.

Idi awanakon iti pagtaenganmi, inrugik ti agdroga. Agmula ken aglakoak payen iti adu a marihuana. Nagbalin nga imoral ti panagbiagko ken kanayonak a mapan kadagiti club. Nagbalinak met a managpungpungtot. No adda diak magustuan nga imbaga wenno inaramid ti sabali, dagus nga agburek ti darak ket masansan nga agbugkaw ken dumanogak. Kinapudnona, sinukirko amin a Nakristianuan a prinsipio a naisuro kaniak.

NO KASANO A BINALBALIWAN TI BIBLIA TI BIAGKO: Nagbalin a nasinged a gayyemko ti maysa a padak nga agdrogdroga a nasapa a naulila iti ama. Masansan nga agpatpatnagkami nga agsarsarita ket iyeb-ebkasna ti kasta unay nga iliwna ken tatangna. Gapu ta dimmakkelak nga ammok ti namnama a panagungar dagiti natay, diak napupuotan nga es-estoriaek gayamen kenkuana ti panangpagungar ni Jesus iti natay ken ti karina nga aramidennanto dayta iti masanguanan. (Juan 5:28, 29) Kinunak kenkuana: “Saan kadi a nagragsak no makitamto manen ni tatangmo? Mabalintayo amin ti agbiag nga agnanayon iti Paraiso ditoy daga.” Natukay ti puso ti gayyemko kadagita nga imbagak.

 Agsaludsod met no dadduma maipapan iti maudi nga al-aldaw wenno iti doktrina a Trinidad. Alaek ti Bibliana ket ipakitak kenkuana ti adu a teksto a mangibaga iti kinapudno maipapan ken Jehova a Dios, ken Jesus, ken dagiti maudi nga aldaw. (Juan 14:28; 2 Timoteo 3:1-5) Tunggal ilawlawagko kenkuana ti maipapan ken Jehova, ad-adda met a mapampanunotko ni Jehova.

In-inut a nagtubo dagiti bukel ti kinapudno manipud iti Biblia a nabayagen a naitukit iti pusok babaen kadagiti nagannakko. Kas pagarigan, adda dagiti gundaway a no agraragsakkami nga aggagayyem, bigla a mapanunotko ni Jehova. Adu a gagayyemko ti agkuna nga ay-ayatenda ti Dios ngem baliktad met ti ar-aramidenda. Diak kayat ti agbalin a kas kadakuada. Nabigbigko a kasapulan nga agsubliak ken Jehova.

Ammok ti rumbeng nga aramidek, ngem saan a kaskarina a maaramidko dagita. Adda dagiti nalaka a binalbaliwak, kas iti panangikkatko iti panagdroga. Insardengkon ti makikadua kadagiti dati a barkadak, ket nagpayadalak iti Biblia iti maysa a Kristiano a panglakayen.

Ngem adda met dagiti narigatko a balbaliwan, kas iti napudot a panagul-ulok. Adda dagiti gundaway a mailaw-anko ti agpungtot. Makonkonsensiaak kalpasanna, ket impapanko a diakon makapagbalbaliw. Naupayak isu a nagpatulongak iti panglakayen a mangyad-adal kaniak iti Biblia. Napabilegak iti kinaanus ken kinasingpetna. Naminsan, impabasana kaniak ti maysa nga artikulo ti Pagwanawanan maipapan iti kinapateg ti di isusuko. * Nagsaritaanmi dagiti mabalinko nga aramiden no kasta a makapungtotak. Gapu ta linaglagipko dayta nga artikulo ken nagkarkararagak ken Jehova, in-inut a nabaelak a medmedan ti ungetko. Idi agangay, nabautisaranak idi Abril 2000 kas maysa a Saksi ni Jehova. Anian a ragsak dagiti nagannakko!

NO KASANO A NAGUNGGONAANAK: Natalna itan ti panunotko ken nadalus ti konsiensiak ta ammok a saankon a rugrugitan ti bagik iti droga wenno imoral nga ar-aramid. Naragsakakon iti aniaman nga aramidek​—agtartrabahoak man, umat-atender iti Nakristianuan a gimong, wenno agpalpaliwaak. Positibo itan ti panangmatmatko iti biag.

Agyamanak ken Jehova ta addaanak kadagiti nagannak, a di pulos simmuko a timmulong kaniak. Pinampanunotko met ti kinuna ni Jesus iti Juan 6:44: “Awan ti tao a makaumay kaniak malaksid no ti Ama, a nangibaon kaniak, ti mangyasideg kenkuana.” Agyamanak unay ta ginuyugoynak ni Jehova isu a nakasubliak kenkuana.

 “Il-iliwek ti maysa nga Ama.”​—MARCO ANTONIO ALVAREZ SOTO

PANNAKAYANAKNA: 1977

NAKAYANAKANNA: CHILE

PAKASARITAANNA: DATI A MIEMBRO TI BANDA A HEAVY METAL

TI NAPALABASKO: Pinadakkelnak ni nanangko idiay Punta Arenas, maysa a napintas a siudad iti Strait of Magellan iti asideg ti makimbaba nga ungto ti Abagatan nga America. Nagsina dagiti nagannakko idi lima laeng ti tawenko, isu a mariknak a nabaybay-anak. Il-iliwek ti maysa nga ama.

Nakipagadal ni nanangko iti Biblia kadagiti Saksi ni Jehova, ket itugtugotnak kadagiti Nakristianuan a gimong idiay Kingdom Hall. Ngem diak magustuan ti makigimong, isu a masansan nga agmuriotak. Naminpinsan nga insardengko ti makigimong idi agtawenak iti 13.

Pagaayatko idin ti musika, ket nakitak a dayta ti paglaingak. Idi agtawenakon iti 15, dagiti musika a heavy metal ti tokarek kadagiti piesta, bar, ken pribado nga okasion. Gapu iti pannakikaduak kadagiti nalaing a musikero, naginteresak iti klasikal a musika. Inrugik ti agadal iti maysa a konserbatorio ti musika. Immakarak iti siudad ti Santiago idi agtawenak iti 20 tapno ituloyko ti agadal. Intultuloyko met ti makimiembro kadagiti banda a heavy metal.

Mariknak idi nga awan ti direksion ti biagko. Tapno mayaw-awanko dayta, agbartek ken agdrogaak a kaduak dagiti kabarkadak iti banda, nga imbilangko kas pamiliak. Rebelioso ti kababalinko kas makita iti langak. Kanayon a nangisit ti kawesko, atiddog ti barbasko, ken uray la pagatsiket ti buokko.

Gapu iti kababalinko, masansan a mairuboak ken makiririak kadagiti polis. Iti naminsan a nakainumak, rinautko ti maysa a grupo dagiti aglaklako iti droga a mangrirriribuk kaniak ken dagiti gagayyemko. Nakabkabilak nga uray la nagdiwig ti pangak.

Ngem ti nagsakitan la unay ti nakemko ket ti inaramid dagiti nasinged a gagayyemko. Iti maysa nga aldaw, naduktalak a nabayag gayamen nga adda relasion ti nobiak ken ti nasinged a gayyemko. Inlimlimed dayta ti amin a barkadak, ket nagbalinak a desperado.

Gapuna, nagsubliak idiay Punta Arenas, ket sadiay a nangisuroak iti musika ken nagtrabahoak kas paratokar iti cello. Intultuloyko met ti agtokar ken agirekord iti musika a heavy metal. Naam-ammok ti maysa a napintas a babai nga agnagan Sussan, ket nagdennakami. Idi agangay, natakuatan ni Sussan a saanko a patien ti doktrina a Trinidad ngem patien dayta ni nanangna. “Ania ti pudpudno?” dinamagna kaniak. Kinunak nga ammok nga ulbod ti doktrina a Trinidad ngem diak mapaneknekan dayta iti Biblia. Imbagak ken Sussan a maipakita kenkuana dagiti Saksi ni Jehova ti kinapudno manipud iti Biblia. Kalpasanna, inaramidko ti nabayagen a diak inar-aramid​—nagkararagak iti Dios ken nagpatulongak kenkuana.

Sumagmamano nga aldaw kalpasanna, adda nakitak a lalaki a kasla pamiliar kaniak, ket dinamagko no maysa a Saksi ni Jehova. Nupay madlawko a maamak kaniak, siaanus a sinungbatanna dagiti saludsodko maipapan kadagiti gimong iti Kingdom Hall. Kombinsidoak a daytoy  ti sungbat ti kararagko. Napanak iti Kingdom Hall ket nagtugawak iti likud tapno didak madmadlaw. Ngem adu ti nakailasin kaniak ta nakitadak a makigimgimong idi ubingak. Sibabara nga inabrasadak ket timmalged ti riknak. Kaslaak la nagawid iti mismo a pagtaengak. Idi nakitak ti nangisuro kaniak iti Biblia idi ubingak pay, kiniddawko nga iyadalannak manen.

NO KASANO A BINALBALIWAN TI BIBLIA TI BIAGKO: Maysa nga aldaw, binasak ti Proverbio 27:11, nga agkuna: “Agmasiribka, anakko, ket pagrag-oem ti pusok.” Mabalin gayam a paragsaken ti nanumo a tao ti Namarsua iti uniberso. Nabigbigko a ni Jehova ti Ama a nabayagen nga il-iliwek!

Kayatko a paragsaken ken aramiden ti pagayatan ti nailangitan nga Ama, ngem nagbalinak nga adipen ti droga ken arak iti adu a tawen. Natarusak ti insuro ni Jesus iti Mateo 6:24 nga “awan ti makabalin nga agpaadipen iti dua nga appo.” Bayat nga ikagkagumaak ti agbalbaliw, dakkel ti epekto kaniak ti prinsipio iti 1 Corinto 15:33: “Dagiti dakes a pannakitimpuyog dadaelenda dagiti makagunggona nga ugali.” Nabigbigko a diak maikkat dagiti dakes a bisiok no itultuloyko ti mapan kadagiti lugar a pagtoktokarak ken makilangenak kadagiti dati a barkadak. Nalawag kaniak ti balakad ti Biblia a masapul a gupdek ti bambanag a mangitibtibkol kaniak.​—Mateo 5:30.

Gapu ta pagaayatko ti musika, narigatanak a nangisardeng iti panagtokar iti heavy metal. Ngem naisardengko met laeng dayta babaen iti tulong dagiti gagayyemko iti kongregasion. Insardengko met ti agbartek ken agdroga. Nagpapukis ken nagibarbasak. Saan metten a puro nangisit ti badok. Idi imbagak ken Sussan a kayatkon a papukisan ti atiddog a buokko, kinunana: “Sumurotak man met kenka, kayatko a makita ti ar-aramidem iti dayta a Kingdom Hall!” Nagustuanna ti nakitana sadiay, ket di nagbayag, nagpayadal metten iti Biblia. Idi agangay, nagkasarkamin ken Sussan. Idi 2008, nabautisarankami kas Saksi ni Jehova. Maragsakankami ta kaduanakami itan ni nanangko nga agserserbi ken Jehova.

NO KASANO A NAGUNGGONAANAK: Nakalapsutak iti ubbaw a kinaragsak ken iti traidor a kakadua. Pagaayatko pay laeng ti musika, ngem pilpiliek itan dagiti tokaren ken dengdenggek. Iyestoriak dagiti kapadasak tapno magunggonaan dagiti kabagiak ken ti sabsabali, nangruna dagiti agtutubo. Kayatko a tulongan ida a makabigbig a nupay makaatrakar dagiti bambanag iti daytoy a lubong, arigna “adu a basura” laeng dagita.​—Filipos 3:8.

Nakasarakak kadagiti napudno a gagayyem iti Kristiano a kongregasion, nga ayan ti pudno nga ayat ken talna. Kangrunaanna, nasarakak met laeng ti nabayagen a tartarigagayak nga Ama babaen iti iyaadanik ken Jehova.

[Footnote]

[Blurb iti panid 13]

“Ginuyugoynak ni Jehova isu a nakasubliak kenkuana.”