DAYTA ti manglais a saludsod ti gobernador ti Roma a ni Poncio Pilato kenni Jesus. Saan nga interesado ni Pilato iti sungbat, ken saan met a sinungbatan dayta ni Jesus. Nalabit matmatan ni Pilato nga imposible a ti maysa maawatanna ti kinapudno.​—Juan 18:38.

Kasta ti panangmatmat ti adu a tattao ita, a pakairamanan dagiti panguluen ti relihion, edukador, ken politiko. Patienda a ti kinapudno​—nangnangruna dagiti nasayaat a kababalin ken dagiti kinapudno a linaon ti Biblia​—ket saan a naan-anay ken agbaliwbaliw dayta. Ipakita daytoy a panangmatmat a kayat dagiti tattao nga isuda ti mangikeddeng para iti bagida no ania ti umiso ken di umiso. (Isaias 5:20, 21) Dayta met ti pangibatayanda a mangilaksid kadagiti ibilangda a nagpason a prinsipio ken moral a pagalagadan nga inan-annurot dagiti naglabas a kaputotan.

Nasayaat nga usigentayo dagiti sasao a nangtignay ken Pilato nga agsaludsod. Kinuna ni Jesus: “Maigapu itoy a nayanakak, ken maigapu itoy nga immayak iti lubong, tapno saksiak ti kinapudno.” (Juan 18:37) Iti biang ni Jesus, ti kinapudno ket nalawag ken maawatan. Inkarina kadagiti adalanna: “Maammuanyonto ti kinapudno, ket ti kinapudno wayawayaannakayto.”​—Juan 8:32.

Pakasarakan iti kasta a kinapudno? Naminsan, inkararag ni Jesus iti Dios: “Ti saom ket kinapudno.” (Juan 17:17) Ti Biblia, nga impaltiing ti Dios, ipalgakna ti kinapudno a mangipaay iti mapagtalkan a giya ken natalged a namnama iti masanguanan​—ti biag nga agnanayon.​—2 Timoteo 3:15-17.

Sinayang ni Pilato ti gundaway a mangammo iti dayta a kinapudno. Dakayo met ngay? Apay a diyo ammuen kadagiti Saksi ni Jehova no ania dayta a “kinapudno” nga insuro ni Jesus? Maragsakanda a mangiranud iti dayta a kinapudno kadakayo.