Ania ti Panangmatmat ni Jesus iti Politika?

DINAKAMAT dagiti mannurat ti Ebanghelio ti sumagmamano a gundaway a naipasango ni Jesus iti politika bayat ti ministeriona. Kas pagarigan, kalpasan ti bautismona idi agarup 30 ti tawenna, intukon kenkuana ti Diablo ti panagbalin nga agturay iti lubong. Idi agangay, maysa a bunggoy ti mangpilpilit kenkuana nga agbalin nga ari. Pinadas pay ketdi dagiti tattao a pagbalinen nga aktibista. Ania ti reaksion ni Jesus? Usigentayo dagitoy a pasamak.

Agturay iti lubong. Kuna dagiti Ebanghelio a ti Diablo intukonna ken Jesus ti panangituray iti “amin a pagarian ti lubong.” Nagadu ket ngatan ti naimbag a naaramidan ni Jesus para iti agsagsagaba a sangatauan no isu ti nangituray iti lubong! No kasta, no agtaltalek ti maysa a tao iti politika ken maseknan iti pagsayaatan ti sangatauan sigurado a saanna a pagkedkedan ti tukon ti Diablo. Ngem adda nasayaat a rason no apay a pinagkedkedan ni Jesus dayta.​—Mateo 4:8-11.

Ari. Kayat ti adu a kailian ni Jesus ti maaddaan iti agturay a makasolbar iti parparikutda mainaig iti ekonomia ken politika. Gapu ta nasdaawda iti abilidadna, kayat dagiti tattao a makiraman ni Jesus iti politika. Ngem ania ti reaksion ni Jesus? Kastoy ti kuna ti mannurat ti Ebanghelio a ni Juan: “Ni Jesus, idi naammuanna nga umayda koman ket kemmegenda tapno pagbalinenda nga ari, napan manen nga agmaymaysa idiay bantay.” (Juan 6:10-15) Nalawag a nagkedked ni Jesus a makiraman iti politika.

Aktibista. Paliiwem ti napasamak sumagmamano nga aldaw sakbay a napapatay ni Jesus. Napan kenkuana ti paspasurot dagiti Fariseo (grupo a kontra iti panangituray ti Imperio ti Roma) agraman dagiti Herodiano (paset ti napolitikaan a partido a pabor iti Roma). Pilpilitenda ni Jesus a dumasig iti politika. Dinamagda no rumbeng nga agbayad dagiti Judio iti buis iti Roma.

Kastoy ti sungbat ni Jesus sigun ken Marcos: “‘Apay a subsubokendak? Iyegandak iti denario  tapno kitaek.’ Nangyegda iti denario. Ket kinunana kadakuada: ‘Makinladawan ken surat daytoy?’ Kinunada kenkuana: ‘Ni Cesar.’ Idin kinuna ni Jesus: ‘Ibayadyo ken Cesar ti bambanag ni Cesar, ngem iti Dios ti bambanag ti Dios.’” (Marcos 12:13-17) Maipapan iti sungbat ni Jesus, kuna ti libro a Church and State​—The Story of Two Kingdoms: “Dina kayat ti agbalin a napolitikaan a mesias ken nalawag nga impakitana ti beddeng ti panagpaituray ken Cesar ken iti Dios.”

Nupay kasta, maseknan ni Kristo kadagiti parikut a kas iti kinapanglaw, panagkunniber, ken kinaawan hustisia. Kinapudnona, ipakita ti Biblia a naasian ni Jesus iti nakaay-ay-ay a kasasaad dagiti tattao iti aglawlawna. (Marcos 6:33, 34) Kaskasdi, saanna nga indauluan ti panangikkat iti kinaawan hustisia ditoy lubong, nupay pinilitda a makiraman kadagiti kontrobersial nga isyu idi kaaldawanna.

Kas ipakita dagitoy a pagarigan, nabatad a di pulos nakiraman ni Jesus iti napolitikaan nga ar-aramid. Dagiti ngay Kristiano ita? Rumbeng kadi a makiramanda iti politika?