Nasayaat a Masakbayan​—Kasano a Magun-odam?

KASANO a maaddaanka iti naballigi a biag? Ti maysa a pamay-an isu ti panangusigmo iti manayon a pagbanagan dagiti desisionmo ita.

Mabalin a narigat ti mangaramid kadagiti desision nga agbanag iti manayon a pagimbagan. Apay? Agsipud ta kayat ti adu a tattao a magun-odda a dagus dagiti tarigagayda. Kas pagarigan, mabalin a mabigbigmo a makatulong kenka no iyaplikarmo ti balakad ti Biblia tapno maaddaan iti nasinged a relasion ti pamiliam. (Efeso 5:22–6:4) Ngem tapno maaramidmo dayta, kanayon a kalangenmo ti pamiliam ken saanka nga agbalin nga okupado unay iti trabaho ken panaglinglingay. Kas iti dadduma nga aspeto ti biag, masapul nga agpilika​—ti apagbiit a ragsak wenno ti manayon a balligi. Kasano a mapilim ti umiso a desision? Aramidem dagitoy uppat nga addang.

1 Panunotem ti Pagbanagan Dagiti Desisionmo

Sakbay nga agdesisionka, panunotem nga umuna dagiti posible a resultana. Ibalakad ti Biblia: “Nasaldet [wenno, masirib] daydiay nakakita iti didigra ket rugianna ti aglemmeng.” (Proverbio 22:3) Mabalin a maliklikam dagiti dakes a resulta no saanka nga agdarasudos nga agdesision. No panunotem dagiti manayon a pagimbagan ti nainsiriban a desision, matignayka nga agpanunot a naimbag.

Saludsodam ta bagim: ‘Anianto ti pagbanagan ti desisionko kalpasan ti maysa, sangapulo, wenno duapulo a tawen? Anianto ngata ti epektona iti emosion ken salun-atko? Anianto ti epekto ti desisionko iti pamiliak ken kadagiti patpatgek?’ Kangrunaanna, mabalin nga isaludsodmo: ‘Makaay-ayonto kadi iti Dios ti desisionko? Anianto ti epektona iti relasionko kenkuana?’ Tangay inwanwan ti Dios ti pannakaisurat ti Biblia, matulongannaka dayta a mangammo iti makaay-ayo kenkuana ken ballaagannaka tapno maliklikam dagiti peggad a dimo ekspektaren.​—Proverbio 14:12; 2 Timoteo 3:16.

2 Usigem ti Sabali Pay nga Anggulo

Adda dagiti tumulad lattan iti desision ti kaaduan. Ngem dina kayat a sawen a naballigi dagita a desision. Sika a mismo ti mangusig no ania ti piliem. Kas pagarigan, kuna ti maysa a babai nga agnagan Natalie a: “Kayatko ti maaddaan iti naragsak a panagasawa. Ngem pagarupek a diak magun-odan dayta. Idi addaak pay iti kolehio, naglalaing dagiti agtutubo a gagayyemko iti klasemi. Ngem saan a nasayaat dagiti desisionda iti biag. Masukansukat dagiti nobio wenno nobiada, ket kastaak met idi. Isu a namin-adu a nasaktan ti riknak.”

Inrugi ni Natalie ti makipagadal iti Biblia kadagiti Saksi ni Jehova. Kinunana: “Kadagiti Saksi ti nakakitaak iti nararagsak nga agtutubo ken natibker a panagasawa. In-inut a binalbaliwak ti kababalin ken estilo  ti panagbiagko nupay narigat dayta.” Ania ti resultana? “Inarapaapko ti mayasawa iti pagraraemak a lalaki,” kuna ni Natalie. “Idi agangay, nakiasawaak iti maysa a kapammatiak. Mariknak nga inikkannak ti Dios iti pamilia a nasaysayaat ngem iti inarapaapko.”

3 Panunotem ti Agnanayon a Masakbayam

Tapno agpaut ti pagbanagan ti desisionmo, masapul nga ammom ti kayatmo a masakbayan ken no kasano a magun-odam dayta. (Proverbio 21:5) Saanka nga agdesision para laeng iti 70 wenno 80 a tawen a kapaut ti biag ti tao. Imbes ketdi, iladawam a tagtagiragsakem ti agnanayon a masakbayan a kinuna ti Biblia.

Ilawlawag ti Biblia a babaen iti subbot a sakripisio ni Kristo Jesus, inikkan ti Dios dagiti tattao iti gundaway nga agbiag nga agnanayon. (Mateo 20:28; Roma 6:23) Inkari ti Dios nga asidegen a matungpal ti orihinal a panggepna para iti sangatauan ken iti daga. Agbiagto nga agnanayon iti paraiso a daga dagidiay mangay-ayat iti Dios. (Salmo 37:11; Apocalipsis 21:3-5) Masagrapmo dayta no panunotem ti agnanayon a masakbayam.

4 Ikagumaam nga Aramiden ti Implanom

Ania ti aramidem tapno magun-odam ti naikari a masakbayan? Umuna, agadalka iti Biblia tapno maaddaanka iti umiso a pannakaammo iti Dios. (Juan 17:3) Dayta ti mangpabileg iti panagtalekmo kadagiti kari ti Dios iti masanguanan. Ti kasta a pammati matulongannaka a mangbalbaliw iti kababalinmo tapno anamongannaka ti Dios.

Kastoy ti kuna ni Michael: “Inrugik ti agbartek ken agdroga idi agtawenak iti 12. Miembroak idi iti maysa a gang ken pagarupek a diak madanon ti edad a 30. Gapu iti gura ken pannakadismayak, namin-adu a ginandatko ti agpakamatay. Sinapsapulko ti nasaysayaat a biag ngem diak nasarakan.” Idi adda ni Michael iti haiskul, maysa a barkadana ti nakipagadal iti Biblia kadagiti Saksi ni Jehova, isu a nakipagadal met ni Michael iti Biblia.

Gapu iti naadal ni Michael iti Biblia, nagbaliw ti panangmatmatna iti masakbayan. “Naammuak nga agbalinto manen a paraiso ti daga ken agnaedto a sitatalna ken awanan parikut dagiti tattao. Nabigbigko a kasta ti kayatko a masakbayan. Inkagumaak ti maaddaan iti nasayaat a relasion ken Jehova nupay adda dagiti pagkapuyak. Adda latta dagiti gundaway a mabartekak uray idi agad-adalakon iti Biblia. Adda pay ketdi babai a nakadennak.”

Kasano a nagbalbaliw ni Michael? Kunana: “Imparegta ti nangyadal kaniak nga inaldaw a basaek ti Biblia ken makikaduaak kadagiti mayat a mangparagsak iti Dios. Nabigbigko a napigsa pay laeng ti impluensia dagiti barkadak iti gang. Nupay imbilangko a kapamiliak ida, insardengkon ti makilangen kadakuada.”

Inkeddeng ni Michael dagiti prioridadna ken no ania dagiti addang a nalaklakana a ragpaten. Nakatulong dayta kenkuana tapno maragpatna pay dagiti napatpateg nga addang a mangitunos iti biagna kadagiti pagalagadan ti Dios. Kabaelam met dayta. Isuratmo dagiti planom ken no kasano a ragpatem dagita. Ibagam dagiti planom kadagiti maseknan kenka, ken kiddawem a tulongandaka a rumang-ay.

Dimo itantan ti panagsursurom maipapan iti Dios ken ti panangsurotmo iti bilinna. Pabilgem itan ti ayatmo iti Dios ken iti Saona, ti Biblia. Kuna ti Sao ti Dios maipapan iti tao a mangyap-aplikar kadagiti prinsipio ti Biblia: “Ti isuamin nga aramidenna agballiginto.”​—Salmo 1:1-3.

[Footnote]