Relihioso ken Responsable nga Umili​—Kasano?

ANIA ti dua a banag a nalawag iti ministerio ni Jesus? Umuna, inkagumaan ni Jesus a baliwan ti kababalin dagiti tattao, saan a dagiti napolitikaan nga institusion. Kas pagarigan, usigem ti impaganetgetna iti nalatak a diskursona. Sakbay nga imbagana a napateg ti panagbalin a kas iti asin ken lawag, kinunana kadagiti dumdumngeg a dagidiay “sipapanunot iti naespirituan a kasapulanda” ti pudpudno a naragsak. Innayonna: “Naragsak dagiti naalumamay ti kababalinda, . . . dagiti nasin-aw ti pusoda, . . . dagiti mannakikappia.” (Mateo 5:1-11) Tinulonganna dagiti pasurotna a mangbigbig a napateg ti panangitunos iti pampanunot ken rikrikna iti pagalagadan ti Dios mainaig iti naimbag ken dakes. Impabigbigna met a napateg ti naimpusuan a panagserbi iti Dios.

Maikadua, idi nakita ni Jesus ti panagsagaba ti tao, naasian ken natignay a mangep-ep iti panagrigatda. Ngem saanna nga inikkat ti amin a panagsagaba iti daydi a tiempo. (Mateo 20:30-34) Pinaimbagna dagiti masakit, ngem kaskasdi a di napukaw ti sakit. (Lucas 6:17-19) Binang-aranna dagiti mairurrurumen, ngem adu latta ti agsagsagaba gapu iti kinaawan hustisia. Pinakanna dagiti mabisin, ngem adda latta panagbisin.​—Marcos 6:41-44.

Kayatna nga Agbalbaliw ken Mabang-aran ti Tao

Apay a saan a binalbaliwan ni Jesus dagiti natauan nga institusion ken saanna nga inikkat ti panagsagaba no di ket tinignayna laeng nga agbalbaliw ti tattao ken binang-aranna ida iti panagrigatda? Ammo ni Jesus a panggep ti Dios nga aramatento ti Pagarianna tapno agpatingga ti amin a natauan a gobierno ken mapunas dagiti pakaigapuan ti amin a panagsagaba. (Lucas 4:43; 8:1) Isu nga idi kiniddaw dagiti adalan ni Jesus a saan pay a pumanaw tapno adu ti maagasanna, kinunana kadakuada: “Mapantayo iti sabali pay a lugar, kadagiti . . . ili iti kabangibang, tapno mangasabaak met sadiay, ta gapu itoy a panggep a rimmuarak.” (Marcos 1:32-38) Binang-aran ni Jesus ti pisikal a panagsagaba ti adu a tattao, ngem impangpangrunana ti nangasaba ken nangisuro iti sao ti Dios.

Ikagkagumaan dagiti Saksi ni Jehova a tuladen ti ulidan ni Jesus babaen ti panangasabada. Natignayda a mangbang-ar iti panagsagaba ti tao babaen ti panangtedda iti praktikal a tulong kadagiti agkasapulan. Nupay kasta, saan nga ikagkagumaan dagiti Saksi nga ikkaten ti panagrigat ditoy lubong. Patienda a ti Pagarian ti Dios ti mangikkatto iti amin a pakaigapuan ti panagsagaba. (Mateo 6:10) Kas ken Jesus, ikagkagumaanda a tignayen dagiti tattao nga agbalbaliw ngem saanda a balbaliwan dagiti napolitikaan nga institusion. Umiso dayta ta saan a politika ti kangrunaan a parikut ti tao no di ket ti panangsurot iti pagalagadan ti Dios mainaig iti naimbag ken dakes.

Responsable nga Umili

Patien met dagiti Saksi ni Jehova a responsabilidadda kas Kristiano ti agbalin a nasayaat nga umili. Isu a raemenda dagiti agtuturay. Babaen kadagiti publikasionda ken iti panangasabada, sursuruanda dagiti kaarrubada nga agtulnog  iti linteg. Ngem saan nga agtungpal dagiti Saksi iti bilin ti gobierno no maikontra dayta kadagiti bilin ti Dios. ‘Agtulnogda iti Dios kas agturay imbes a kadagiti tattao.’​—Aramid 5:29; Roma 13:1-7.

Bumisbisita dagiti Saksi ni Jehova iti amin a tattao tapno iyawisda ti libre a panagadal iti Biblia. Kas resulta, minilion a tattao ti nagbalbaliw. Iti tinawen, ginasut a ribu ti matultulongan a mangisardeng iti makadadael a bisio a kas iti panagsigarilio, panagbarbartek, panagdroga, panagsugal, ken narugit a seksual nga ar-aramid. Nagbalindan a nasingpet ken responsable nga umili gapu ta inyaplikarda dagiti prinsipio ti Biblia.​—Kitaem ti artikulo a “Ti Biblia Balbaliwanna ti Biag,” iti panid 18 daytoy a magasin.

Makatulong met ti panagadal iti Biblia tapno umuneg ti panagraem dagiti miembro ti pamilia ken sumayaat ti panaglalangenda. Kas resulta, agbalinda a nasinged iti maysa ken maysa. Ti natibker a pamilia ket pundasion ti natibker a komunidad.

Sigun kadagiti punto a nausig, anamongan ngata ti Biblia nga aglaok ti relihion ken politika? Nabatad a saan. Ngem rumbeng kadi nga agbalin dagiti pudno a Kristiano a responsable nga umili? Wen. Ngem kasano? Babaen ti panangsurotda iti bilin ni Jesus nga agbalin a kasla asin ken lawag iti lubong.

Dagidiay mangikagkagumaan a mangyaplikar kadagitoy a praktikal a bilin ni Kristo magunggonaanda a mismo ken ti pamiliada​—agraman ti komunidadda. Sidadaan dagiti Saksi ni Jehova iti lugaryo a mangiranud iti ad-adu pay nga impormasion maipapan iti programada a panangyadal iti Biblia. a

[Footnote]

[Blurb iti panid 10]

Inkagumaan ni Jesus a tignayen dagiti tattao nga agbalbaliw, saan a dagiti napolitikaan nga institusion

[Blurb iti panid 11]

Patien dagiti Saksi ni Jehova a responsabilidadda ti agbalin a nasayaat nga umili