Idatag daytoy nga artikulo dagiti saludsod a nalabit nayimtuodmon. Ipakitana met ti pakabasaam kadagiti sungbat iti Bibliam. Maragsakan dagiti Saksi ni Jehova a mangilawlawag kadagiti sungbat.

1. Apay nga adda personal a nagan ti Dios?

Sigurado a kayatmo ti maawagan iti naganmo imbes nga awagandaka laeng iti “lalaki,” “mister,” “madam,” wenno “babai.” Napateg ti nagan ta dayta ti pakabigbigan ti maysa a tao. Ti Dios ket maawagan kadagiti titulo a kas iti “Soberano nga Apo,” “Mannakabalin-amin a Dios,” ken “Naindaklan a Namarsua.” (Genesis 15:2; 17:1; Eclesiastes 12:1) Ngem adda personal a nagan ti Dios tapno maaddaantayo iti nasinged a relasion kenkuana. Iti Iloko, Jehova ti nagan ti Dios.​—Basaem ti Isaias 42:8.

Nupay adu nga agipatpatarus iti Biblia ti nangsukat iti nagan ti Dios kadagiti termino kas iti “Dios” ken “Apo,” dayta a nagan ket masarakan iti dandani 7,000 a daras iti nagkauna a Hebreo a manuskrito ti Biblia. Talaga a kayat ti Dios a maammuantayo ti naganna.​—Basaem ti Isaias 12:4.

2. Apay a nagpateg a maammuantayo ti nagan ti Dios?

Saan nga umdas nga ammotayo a baliksen ti nagan ti Dios. Ti panangammo iti nagan ti Dios kaipapananna a maaddaantayo iti nasinged a relasion kenkuana. Ti nagan a Jehova kaipapananna “Pagbalinenna.” Dayta a nagan ket garantia a kabaelanna ti agbalin nga aniaman a kasapulanna a pagbalinan tapno matungpal ti panggepna. Isu a ti panangammo iti nagan ti Dios ipasimudaagna ti panagtalek a tungpalen ti Dios dagiti karina. (Salmo 9:10) Gapuna, dagiti tattao a makaammo ken mangus-usar iti nagan ti Dios matignayda nga agtalek ken mangipangpangruna kenkuana iti biagda. Ni Jehova a Dios salaknibanna dagita a tattao.​—Basaem ti Salmo 91:14.

 3. Apay a kayat ti Dios a maipakaammo ti naganna?

Kayat ngamin ti Dios a magunggonaan dagiti tattao. Kayatna nga agbalinda a gayyemna ken maaddaanda iti namnama nga agbiag nga agnanayon. Dayta ti makagapu a kayat ni Jehova nga ipakaammotayo ti naganna!​—Basaem ti Juan 17:3; Roma 10:13, 14.

Impakaammo ni Jesus ti nagan ti Dios babaen ti panangisurona kadagiti dalan, linteg, ken kari ti Dios. Ipakpakaammo pay laeng ita dagiti pasurot ni Jesus ti nagan ti Dios iti amin a nasion. Ar-aramidenda dayta kas nagkaykaysa nga ‘ili maipaay iti nagan ti Dios.’​—Basaem ti Aramid 15:14; Juan 17:26.

4. Kasano nga ipadayag ti Dios ti naganna?

Kayat ni Jehova nga ipadayag ti naganna gapu ta adda nangpadakes iti dayta. Kas pagarigan, adda dagiti agkuna a saanna a pinarsua ti biag ken saan kano a nasken nga agtulnogtayo kenkuana. Kuna met ti dadduma a saan a maseknan ti Dios kadatayo ken isu kano ti makinggapuanan iti panagsagaba. Dagita a tattao ibabainda ti nagan ti Dios. Dadaelennanto dagidiay mangibabain iti naganna.​—Basaem ti Salmo 83:17, 18.

Ipadayag ni Jehova ti naganna inton dadaelen ti Pagarianna ti amin a gobierno ti tao ken isublina ti talna ken kinatalged iti sangatauan. (Daniel 2:44) Iti din agbayag, maammuanto ti amin a tattao a ni Jehova ti pudno a Dios.​—Basaem ti Ezequiel 36:23; Mateo 6:9.

Ania ti rumbeng nga aramidem? Umadanika iti Dios babaen ti panangadalmo iti Saona ken pannakikaduam iti ili a mangay-ayat kenkuana. Inton ipadayag ni Jehova ti naganna, laglagipennanto dagiti matalek nga adipenna.​—Malakias 3:16.

Para iti kanayonan nga impormasion, kitaem ti kapitulo 1 daytoy a libro, Ania a Talaga ti Isursuro ti Biblia? nga impablaak dagiti Saksi ni Jehova.

[Ladawan iti panid 16]

Ti nagan ti Dios iti nagkauna a Hebreo a manuskrito