Surat Manipud Ireland

Ti Karagsakan Pay Laeng a Bakasionko!

“AGBAKASIONKA pay laeng tapno dimo sangkapanunot ti eksamenmo,” kuna dagiti nagannakko. “Intay ketdi bisitaen dagiti kasinsinmo idiay Ireland ken mangasaba sadiay kadagiti tattao a saan unay a makangkangngeg iti naimbag a damag ti Pagarian.”

Para kaniak kasla saan a praktikal dayta. Ngamin nasken nga agadalak para iti eksamenko, ken maamakak met ta diak pay idi nagluglugan iti eroplano ken pimmampanaw iti England. Maysaak a naganaygay a balasang nga agtawen iti 17, ken nairuamakon iti okupado a biag iti asideg ti siudad ti London. Kasano koma a mabagayak ti nabambannayat a biag iti bassit nga ili iti makin-abagatan a laud a murdong ti Ireland?

Awan met gayam ti rumbeng a pagdanagak. Apaman a naglanding iti Ireland ti eroplano a naglugananmi, nagustuakon ti nakitak. Ngem gapu ta nakasapsapakami a nagbiahe, nakaturogak iti lugan. Sagpaminsan a makariingak ket makitak ti napintas a buya ti away ken ti nakabite nga igid ti akikid a dalan.

Iti umuna a rabii, imyankami iti ili ti Skibbereen ken tinagiragsakmi ti makapabileg a naespirituan a panagsasarita a kadua ti maysa a pamilia nga immakar ditoy Ireland tapno tumulongda iti trabaho a panangikasaba iti Pagarian. Nagay-ayamkami iti Bible game. Mangbunot ti tunggal maysa kadakami iti maysa a karakter iti Biblia iti maysa a supot sa iyaktomi ti eksena a nainaig iti dayta a karakter. Kalpasanna, pugtuan ti sabali a grupo no asino dayta.

Kabigatanna, kaduak dagiti nagannakko, adingko, kakasinsinko, ken sabali pay a pamilia a naglugan iti ferryboat a napan iti Heir Island, a pagnanaedan ti awan pay 30 a tattao. Kinapudnona, imbaga ni Jesus a maikasaba ti naimbag a damag iti amin a mapagnaedan a daga. Isu a nagmalmalemkami a nangiranud iti makapabileg a mensahe ti Biblia kadagiti mannakigayyem ken managpadagus a tattao ken inapresiarmi ti nagpintas a buya ti aglawlaw.

Naraniag ti silnag ti init iti naariwanas nga asul a tangatang. Malang-ab iti angin ti agat-niog a banglo ti adu a duyaw a sabong ti babassit a mulmula a maawagan iti gorse. Arigna nayaplag dagiti sabong iti naaluguog a makintengnga a paset ti isla. Dagiti kadaratan nga igid ti baybay ket agturong iti nabato a rangkis, a pagumokan dagiti billit a kas iti cormorant ken gannet. Makita iti adayo dagiti babassit nga isla, nga adu kadagitoy ti saan a mapagnanaedan, a masarakan amin iti Roaringwater Bay. Apresiarenmi unay ti panagtutunos ti amin a pinarsua ni Jehova!

Naragsakanak a naaddaan iti adu a gagayyem iti kongregasion dagiti Saksi ni Jehova iti Skibbereen  ken pinadasko met dagiti bambanag a diak pay idi inar-aramid. Pagay-ayatkon ti aglugan iti kayak. Dayta ti kasayaatan a panangsursor iti kosta ti Ireland. Napankami nagkalap para iti pangrabii, ngem inun-unaandakami dagiti seal. Nagaramidkami iti bukodmi nga ay-ayam iti beach, ken pinadasko pay ti sala dagiti Irish.

Inammomi met ti pakasaritaan ti ili ti Skibbereen. Idi naperdi ti apit a patatas idi dekada 1840, ti ili ti Skibbereen ken dagiti kaarrubana a lugar ti kakaruan a naapektaran. Adu ti natay iti bisin ken agarup 9,000 ti sangsangkamaysa a naitanem. Ngem makaliwliwa a maammuan ta mabiiten nga agturay ti Pagarian ti Dios. Sadiay awanton ti bisin, ken adu kadagiti natay ti mapagungarto iti paraiso a daga.

Nakikaduakami kadagiti Saksi sadiay a nangsarungkar kadagiti tattao a manmano a madanon gapu iti naglawa a teritoria ti kongregasion. Nagbiahekami a simmalog iti akikid ken nasang-at a kalsada nga agturong kadagiti balbalay nga adda iti igid ti rangkis a matannawagan ti baybay ti Ireland. Mannakigayyem ken manangpasangbay met dagiti tattao sadiay. Kas iti inaramidmi idiay Heir Island, imbagami nga agbakbakasionkami ken us-usarenmi ti dadduma a tiempomi a mangiranud iti makaliwliwa a mensahe manipud iti Biblia.

Nakasarita ni nanangko ti maysa a babai a nangala a dagus iti impaimami a magasin a Ti Pagwanawanan ken Agriingkayo! Idi sinarungkaranmi kalpasan ti sumagmamano nga aldaw, kinunana a naragsakan a nangbasa kadagiti magasin.

“Pangngaasiyo ta umaykayto manen makisarita kaniak ken mangyeg kadagiti magasin,” kinunana. Imbagami a dandanikam agawiden ngem mangibaonkami ti umay mangsarungkar kenkuana.

“Sige,” kinunana, “inton agsublikayo, umaydakto manen bisitaen. Dikayto malipatan!”

Binusbosmi ti maudi nga aldaw ti bakasionmi iti igid ti baybay a kadua dagiti kakabsat iti kongregasion. Nagbarbekyukami nga inusarmi dagiti kayo ken bato nga inyanud ti danum. Nagtunokami met iti tahong nga inyanud ti nalitnaw a danum ti baybay a naalami kadagiti kabatuan. Agyamanak unay ta nakapasiarak ditoy!

Ti makalawas a kaaddak iti Ireland ti karagsakan pay laeng a bakasionko! Saan laeng a naragsak no di ket makapnek unay ta ammok nga ar-aramidek ti makaay-ayo ken pakaidayawan ni Jehova. Maragragsakanak nga agserbi iti Diostayo ngem ad-adda a naragsak no kaduam nga agserserbi dagiti nagsayaat a gagayyem ken kapamiliam. Idi nakaawidakon, nagyamanak ken Jehova ta impaayannak iti nagadu a naayat ken naespirituan a gagayyem ken ti napintas a pakalaglagipan a diakto pulos malipatan.

[Picture Credit Line iti panid 25]

An Post, Ireland