APAY A NAIDUMDUMA TI BIBLIA? Pagaammo unay a saan a nalawag ken mapagduaduaan dagiti padles idi nagkauna a tiempo a kas met laeng iti moderno a horoscope. Ti panagipadles iti masanguanan ket naibatay iti agdama a paspasamak, ngem dida maibaga dagiti espesipiko a pasamak adu a siglo kasakbayanna. Ngem detalyado ken kanayon a matungpal dagiti padto ti Biblia uray no nadakamatda “manipud iti nabayagen a tiempo ti bambanag a saan pay a naaramid.”​—Isaias 46:10.

MAYSA A PAGARIGAN: Idi maikanem a siglo B.C.E., nakita ni propeta Daniel ti sirmata a nangipadto iti napartak a panangparmek ti Grecia iti Medo-Persia. Naipadto met nga idi “nagbalin a nabileg” ti ari ti Grecia, “nabungtol” ti turayna. Asino ti mangsuno kenkuana? Kuna ni Daniel: “Addanto tumakder nga uppat a pagarian manipud iti nasionna, ngem saan a babaen iti pannakabalinna.”​—Daniel 8:5-8, 20-22.

TI KUNAEN DAGITI HISTORIADOR: Nasurok a 200 a tawen kalpasan ti panawen ni Daniel, nagbalin ni Alexander the Great nga ari ti Grecia. Iti uneg laeng ti sangapulo a tawen, pinarmek ni Alexander ti Imperio ti Medo-Persia ket pinalawana ti Imperio ti Grecia agingga iti Indus River (agdama a Pakistan). Ngem kellaat a natay idi agedad iti 32. Kamaudiananna, nabingbingay ti imperiona gapu iti gubat a napasamak iti asideg ti Ipsus iti Asia Minor. Dagiti uppat a nagballigi iti gubat nagbibingayanda ti Imperio ti Grecia. Ngem awan kadakuada ti nangartap iti turay ni Alexander.

ANIA TI PANAGKUNAM? Adda kadi sabali pay a libro a kanayon a natungpal dagiti padtona? Wenno talaga a naidumduma ti Biblia?