Asino ti Dumngeg iti Kararag?

NO ADDA Dumngeg iti kararag, sigurado a dayta ti Namarsua. Adda kadi pay makabasa iti pampanunotentayo no saan a Daydiay nangaramid iti utek? Adda pay kadi sabali a makabael a dumngeg iti amin a kararag ken makaipaay iti tulong a kasapulantayo? Ngem nalabit kunaem, ‘Nainkalintegan kadi ti mamati iti Namarsua?’

Patien ti adu a tattao a ti panamati iti Namarsua ket saan a maitunos iti moderno a siensia. Ngem saan nga agpayso dayta. Usigem ti sumaganad.

▪ Iti nabiit pay a panagadal dagiti 1,646 a propesor iti siensia iti 21 a nalatak nga unibersidad idiay United States, natakuatan a kakatlo laeng ti nangibaga a saan a mamati iti Dios.

Kinapudnona, adu a sientista ti mamati nga adda Dios.

Pammaneknek nga Adda Namarsua

Patientayo latta kadin nga adda Dumdumngeg iti kararag uray awan pammaneknek? Saan. Saan a pudno ti kapanunotan a ti pammati ket basta panamati nga awanan pammaneknek. Kuna ti Biblia a “ti pammati isu ti sigurado a panangsegsegga iti bambanag nga in-inanamaen, ti nabatad a parangarang dagiti kinapudno nupay saan a makita.” (Hebreo 11:1) Kas pagarigan, ditay makita ti radio wave, ngem ammotayo nga adda dagita gapu ta mangngegmo ti boses ti kasarsaritam iti selpon. Kasta met, uray ditay makita ti Dumdumngeg iti kararag, adda dagiti makakombinsir nga ebidensia iti kaaddana.

Sadino ti pakasarakantayo kadagiti ebidensia nga adda Dios? Masapul laeng a kumitatayo iti aglawlaw. Kuna ti Biblia: “Siempre, tunggal balay adda nangibangon, ngem ti  nangibangon iti amin a bambanag isu ti Dios.” (Hebreo 3:4) Patiem kadi dayta? No panunotem ti kinaurnos ti uniberso, ti nagtaudan ti biag, wenno ti disenio ti utek a karikutan a banag ditoy daga, maamirismo nga adda natantan-ok ngem iti tao. *

Ngem limitado laeng ti masursurotayo iti nakaparsuaan no maipapan iti Dios. Dagiti makita a pinarsua ti Dios ket mayarig iti mangngeg nga arimpadek ti sumungsungad a tao. Ammom nga adda sumungsungad ngem dimo ammo no asino. Tapno maammuam, masapul a luktam ti ruangan. Kasta met ti aramidentayo tapno maammuantayo no asino ti Namarsua.

Ti Biblia ti ruangan ti pannakaammo maipapan iti Dios. No luktam ti ruangan ken sukimatem dagiti detalyado a padto ken ti kaitungpalanda, makitam dagiti ebidensia nga adda Dios. * Malaksid iti dayta, ti salaysay maipapan iti pannakilangen ti Dios kadagiti tattao ipalgakna ti personalidad daydiay Dumngeg iti kararag.

Kasano a Nadeskribir Daydiay Dumdumngeg iti Kararag?

Ipalgak ti Biblia a ti Dumdumngeg iti kararag ket maysa a persona a mabalintayo nga am-ammuen. Sigurado a ti laeng maysa a persona ti mabalin a dumngeg ken makaawat. Makaparagsak ta kunaen ti Biblia:  “O sica a dumngeg iti cararag, kenca ti umayandanto dagiti amin a lasag.” (Salmo 65:2, Ti Biblia) Denggenna ti kararag dagidiay addaan pammati. Ibaga met ti Biblia nga adda naganna. Mabasatayo: “Adayo ni Jehova kadagidiay nadangkes, ngem ti kararag dagidiay nalinteg denggenna.”​—Proverbio 15:29.

Adda met rikna ni Jehova. Isu ti “Dios ti ayat,” ken “ti naragsak a Dios.” (2 Corinto 13:11; 1 Timoteo 1:11) Kuna ti Biblia a ‘nasaktan ti puso’ ti Dios idi simmaknap ti kinadakes ditoy daga. (Genesis 6:5, 6) Saan a pudno ti ibagbaga ti dadduma a ti Dios ti pagtataudan ti panagsagaba tapno subokenna dagiti tattao. Kuna ti Biblia: “Adayo koma iti pudno a Dios nga agtignay a sidadangkes.” (Job 34:10) Ngem panunotem, ‘No ti Dios ti mannakabalin-amin a Namarsua, apay nga ipalubosna nga agtultuloy ti panagsagaba?’

Inikkan ni Jehova dagiti tattao iti wayawaya nga agpili, ket adda isuro dayta kadatayo maipapan iti Dios. Ditay kadi ipateg ti wayawayatayo nga agpili iti kayattayo a wagas ti panagbiag? Ngem nakalkaldaang ta di umiso ti panangusar ti adu a tattao iti wayawayada isu a nagsagabada ken ti dadduma. Napateg nga utobentayo daytoy: Kasano ngarud nga ikkaten ti Dios ti panagsagaba a dina met ikkaten ti wayawaya ti tao? Maammuantayo ti sungbat iti sumaganad nga artikulo.

[Footnotes]

[Kahon iti panid 5]

Agduaduaka Kadi Gapu iti Relihion?

Nakalkaldaang ta ti relihion ti makagapu nga agduadua ti adu a tattao nga adda naasi a Dios a dumdumngeg iti kararag. Ti pannakiraman ti relihion iti gubat, terorismo, ken panangpanuynoy ti panangmolestia kadagiti ubbing ti makagapu nga uray dagiti managkararag a tattao ibagada a dida mamati iti Dios.

Apay a masansan a dakes ti impluensia ti relihion? Ngamin us-usaren dagiti tattao ti relihion a pangkalub iti dakes nga ar-aramidda. Impadto ti Biblia nga addanto dagidiay mangkontrol iti Kristianidad ken mangusar iti dayta iti dakes a panggep. Kuna ni apostol Pablo kadagiti Kristiano a manangaywan: “Manipud kadakayo tumakderto dagiti tattao ket agsaodanto iti tiritir a bambanag tapno iyadayoda a pasuroten kadakuada dagiti adalan.”​—Aramid 20:29, 30.

Makarimon iti Dios ti palso a relihion. Kinapudnona, ti Biblia a Sao ti Dios kunaenna a manungsungbat ti palso a relihion iti “dara . . . dagidiay amin a napapatay ditoy daga.” (Apocalipsis 18:24) Gapuna, nakabasolda iti dara iti imatang ti Dios ta dida insuro kadagiti tattao ti maipapan iti pudno a Dios, nga ayat ti kangrunaan a galadna.​—1 Juan 4:8.

Ti Dios a dumdumngeg iti kararag matarusanna ti rikna dagiti irurrurumen ti relihion. Din agbayag, ti panagayat ti Dios iti sangatauan ti mangtignay kenkuana a mangukom iti amin nga aginkukuna a relihioso babaen ken Jesus. Kinuna ni Jesus: “Adunto ti agkuna kaniak iti dayta nga aldaw, ‘Apo, Apo, saankami aya a nagipadto iti naganmo?’ . . . Kaskasdi nga iti dayta ipudnokto kadakuada: Saankay a pulos am-ammo! Umadayokayo kaniak, dakayo nga agar-aramid ti kinakillo.”​—Mateo 7:22, 23.