Idatag daytoy nga artikulo dagiti saludsod a nalabit nayimtuodmon. Ipakitana met ti pakabasaam kadagiti sungbat iti Bibliam. Maragsakan dagiti Saksi ni Jehova a mangilawlawag kadagiti sungbat.

1. Siasino dagiti anghel?

Dagiti anghel ket espiritu a parsua nga agnanaed idiay langit. Natantan-okda ngem kadagiti tattao. Ti pudno a Dios, a maysa met nga espiritu, immun-una a pinarsuana dagiti anghel sakbay ti daga. (Job 38:4, 7; Mateo 18:10) Napalikmutan ni Jehova kadagiti minilion a nasungdo nga anghel.​—Basaem ti Salmo 103:20, 21; Apocalipsis 5:11.

2. Tumultulong kadi dagiti anghel kadagiti tattao?

Dagiti anghel tinulonganda ti nalinteg a tao a ni Lot. Agnanaed idi iti siudad nga inkeddeng ti Dios a dadaelen gapu iti kinadakes dagiti tattao. Imbilin ti dua nga anghel nga agtalawda a sangapamiliaan. Imbilang ti dadduma nga ang-angaw ti pakdaar isu a dida inkaskaso. Nakalasat da Lot ken dagiti babbalasangna gapu ta nagtulnogda iti pakdaar dagiti anghel nga imbaon ti Dios.​—Basaem ti Genesis 19:1, 13-17, 26.

Sigun iti Biblia, dagiti anghel tultulonganda dagiti tattao babaen ti panangiwanwanda kadagiti simamatalek a mangikaskasaba iti naimbag a damag ti Pagarian ti Dios. (Mateo 24:14) Adda pakdaar a nairaman iti naimbag a damag. Kas iti naipakdaar ken Lot, saan nga ang-angaw dayta ta naggapu iti Dios babaen kadagiti anghel.​—Basaem ti Apocalipsis 1:1; 14:6, 7.

Ti Dios mabalinna nga usaren dagiti anghel a mangpabileg kadatayo no maipasangotayo iti pakasuotan. Inusarna ti maysa nga anghel a nangpabileg ken Jesus.​—Basaem ti Lucas 22:41-43.

Asidegen nga usaren ti Dios dagiti anghel a mangpukaw kadagiti dakes a tattao a pakaigapuan ti panagsagaba. Iti kasta, mabang-aran ken maragsakanto dagiti tattao.​—Basaem ti 2 Tesalonica 1:6-8.

 3. Kasano a maimpluensiaandatayo dagiti demonio?

No kasano nga adu a tattao ditoy daga ti nagsukir iti Dios, adu met nga anghel ti nagrebelde idiay langit. (2 Pedro 2:4) Dagiti nasukir nga anghel ket naawagan iti demonio. Ti kangrunaan kadakuada isu ni Satanas a Diablo. Ni Satanas ken dagiti demoniona al-allilawenda dagiti tattao.​—Basaem ti Apocalipsis 12:9.

Us-usaren ni Satanas dagiti mananggundaway a negosiante, gobierno ti tao, ken palso a relihion a mangimpluensia kadagiti tattao tapno mayadayoda iti Dios. Isu a ni Satanas ti makinggapuanan iti panangirurumen, kinaranggas, ken panagsagaba a mangparparigat kadagiti tattao.​—Basaem ti 1 Juan 5:19.

4. Kasano a dagiti demonio allilawenda dagiti tattao?

Adu a tattao ti naallilaw ni Satanas babaen ti panangisurona a dagiti natay agbalinda nga espiritu a mabalin a kasarita. Ngem ibaga ti Biblia a no matay ti tao awanen ti maaramidanna. (Eclesiastes 9:5) Ngem masansan a dagiti demonio al-allilawenda dagiti tattao babaen ti panangtuladda iti timek dagiti natayen nga ipatpategtayo. (Isaias 8:19) Us-usarenda met dagiti espiritista, mammadles, mammuyon, ken astrologo. Pakpakdaarannatayo ti Sao ti Dios a liklikantayo dagita nga aramid. Gapuna, ibellengtayo ti aniaman a banag nga adda pakainaiganna kadagiti demonio ken okulto.​—Basaem ti Deuteronomio 18:10, 11; Aramid 19:19.

No ay-ayatentayo ni Jehova, saan a rumbeng a kabutengtayo dagiti demonio. No adalentayo ti Sao ti Dios ken aramidentayo ti balakadna, busbusorentayo ti Diablo ken umadanitayo iti Dios. Nabilbileg nga amang ni Jehova ngem kadagiti demonio. Mapabilegnatayo dagiti matalek nga anghelna iti tiempo a kasapulantayo.​—Basaem ti Salmo 34:7; Santiago 4:7, 8.

Para iti kanayonan nga impormasion, kitaem ti kapitulo 10 daytoy a libro, Ania a Talaga ti Isursuro ti Biblia? nga impablaak dagiti Saksi ni Jehova.