“No Agkararagkayo, Kunaenyo, ‘Ama’”

Ania ti malagipmo iti sao nga “Ama”? Naayat ken nadungngo nga ama a maseknan unay iti pagimbagan ti pamiliana? Wenno naliway, nalabit naranggas pay ketdi? Agdepende dayta no ania ti kababalin ti amam.

“AMA” ti termino a masansan nga usaren ni Jesus no makisarita ken ibagana ti maipapan iti Dios. * Idi insurona dagiti pasurotna nga agkararag, kinunana: “No agkararagkayo, kunaenyo, Ama.” (Lucas 11:2) Ania a kita nga ama ni Jehova? Nagpateg ti sungbat daytoy a saludsod. Apay? Ngamin, bayat nga umun-uneg ti pannakaammotayo no ania a kita nga ama ni Jehova, ad-adda a sumingedtayo ken matignaytayo a mangayat kenkuana.

Awanen ti kasayaatan a mangibaga kadatayo ti maipapan iti nailangitan nga Amatayo no di ni Jesus, gapu ta naaddaan iti nasinged a relasion iti Amana. Kinunana: “Awan ti makaam-ammo a naan-anay iti Anak no di ti Ama, awan met ti asinoman a makaam-ammo a naan-anay iti Ama no di ti Anak ken ti asinoman a kayat a pangipalgakan kenkuana ti Anak.” (Mateo 11:27) Isu a ti  kasayaatan a pamay-an a maam-ammotayo ti Ama ket babaen iti Anak.

Ania ti masursurotayo ken Jesus maipapan iti nailangitan nga Amatayo? Usigem ti kinuna ni Jesus: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.” (Juan 3:16) Tinukoy ditoy ni Jesus a ti ayat ti kangrunaan a galad ti nailangitan nga Amatayo. (1 Juan 4:8) Ipakpakita ni Jehova ti ayatna babaen ti pananganamong, panangngaasi, panangsalaknib, ken panangdisiplina, kasta met ti panangipaayna iti kasapulantayo.

Manamnamatayo ti Anamong ti Amatayo

Tumibker ti pakinakem ken kompiansa dagiti annak no ammoda nga anamongan dagiti nagannakda ti ar-aramidenda. Naparegta la ketdi ni Jesus idi mangngegna ti sasao ni Amana: “Daytoy ti Anakko, ti dungdungnguen, nga inanamongak.” (Mateo 3:17) Impasigurado met ni Jesus ti ayat ken anamong ni Amana kadatayo, idi kinunana: “Ti agayat kaniak ayatento ni Amak.” (Juan 14:21) Makaliwliwa la ketdi dagita a sasao! Ngem adda maysa a persona a mayat a mangipaidam kenka iti dayta a liwliwa.

Padpadasen ni Satanas nga imula iti panunottayo a dinatay anamongan ti nailangitan nga Amatayo. Kayatna a makombinsirtayo a ditay maikari iti anamongna. Masansan nga aramidenna daytoy no ti maysa ket lakayen wenno baketen, masaksakit, nakapuy, wenno maup-upay. Usigem ti kapadasan ti agtutubo a ni Lucas, a nakarikna a di maikari iti anamong ti Dios. Kunana a nagbaliwen ti kababalin dagiti nagannakna ta saandan nga an-annuroten dagiti prinsipio ti Biblia nga insursuroda kenkuana idi ubing pay. Isu a marigatan a maaddaan iti nasinged a relasion iti nailangitan nga Amana. Agproblema met iti pannakilangenna iti sabsabali gapu iti kinadarasudosna. Ngem babaen iti tulong ti naanus ken manangsuporta nga asawana, nga imbilangna a “naisangsangayan a bendision ken sagut a nagtaud iti Dios,” in-inut a nagbalin a natanang. Nabigbig ni Lucas nga ‘immay ni Kristo Jesus ditoy lubong tapno isalakanna dagiti managbasol.’ (1 Timoteo 1:15) Kunana a ti panangut-utobna iti ayat ken anamong ti Dios ti namagbalin kenkuana a naragsak ken kontento.

No adda gundaway nga agduaduaka no talaga met laeng nga ay-ayaten wenno anamongannaka ni Jehova, maparegtaka no basaem ken utobem ti Roma 8:31-39. Siaayat nga impanamnama kadatayo ni apostol Pablo nga awan ti ‘makaisina kadatayo iti ayat ti Dios nga adda ken Kristo Jesus nga Apotayo.’ *

Ama ti Nadungngo a Kinamanangngaasi

Ammo ti nailangitan nga Amatayo ti sagsagabaentayo gapu ta isu ket Dios ti “nadungngo a panangngaasi.” (Lucas 1:78) Impakita ni Jesus ti kinamanangngaasi ni Amana kadagiti imperpekto a tattao. (Marcos 1:40-42; 6:30-34) Ikagkagumaan met dagiti pudno a Kristiano a tuladen ti kinamanangngaasi ti nailangitan nga Amada. Iyap-aplikarda ti balakad ti Biblia nga ‘agbalin a manangngaasi iti maysa ken maysa, ken nadungngo a mannakipagrikna.’​—Efeso 4:32.

Usigem ti kapadasan ni Felipe. Maysa nga aldaw, bayat ti ipapanna iti trabaho, nakarikna iti nakaro nga ut-ot a kasla naduyok ti bukotna. Naitaray iti ospital. Kalpasan ti walo nga oras a pannakaeksamenna, imbaga dagiti doktor a nadadael ti kadakkelan nga urat ti pusona (aorta). Kinunada a 25 a minuto laengen nga agbiag ken saanen a mabalin nga operaan.

Gapu iti asi dagiti kapammatian ni Felipe, nagtignayda a dagus a mangyakar iti sabali nga ospital. Sadiay a naoperaan ken saanda a pimmanaw agingga a nalpas ti operasionna. Makaparagsak ta nalasatanna ti kritikal a kasasaadna.  No malagipna ti napasamak kenkuana, agyamyaman ni Felipe iti asi nga impakita dagiti kapammatianna. Ngem kombinsido a ti nailangitan nga Amana ti nangtignay kadakuada a mangipakita iti kinamanangngaasi. “Arigna a ti Dios ket naayat nga Ama nga adda iti sibayko a mangpabpabileg kaniak,” kuna ni Felipe. Kinapudnona, masansan nga ipakpakita ni Jehova ti asina babaen ti panangtignayna kadagiti adipenna ditoy daga a mangipakita iti kinadungngo.

Mangsalaknib ti Amatayo

No madlaw ti ubing nga adda peggad, mabalin nga agpaarayat iti amana. Marikna ti ubing a natalged iti nadungngo a panangarakup ni amana. Naan-anay a nagtalek ni Jesus ken ni Jehova kas mannalaknib. (Mateo 26:53; Juan 17:15) Natalgedtayo met iti panangsalaknib ti nailangitan nga Amatayo. Naespirituan ti kangrunaan a proteksion nga ipapaay ni Jehova ita. Kayatna a sawen, salsalaknibannatayo iti naespirituan a pannakadangran babaen ti panangipaayna iti kasapulantayo tapno mayadayotayo iti peggad ken mataginayon ti pannakigayyemtayo kenkuana. Ti maysa a pamay-an ket salsalaknibannatayo babaen kadagiti balakad a naibatay iti Biblia. No mabalakadantayo, arigna magmagna ni Jehova iti likudantayo a kunkunana: “Daytoy ti dalan. Magnakayo iti dayta.”​—Isaias 30:21.

Usigentayo ti kapadasan ni Tiago ken dagiti manongna a da Fernando ken Rafael, a miembro ti banda a rock-and-roll. Magagaranda unay idi napilida nga agtokar iti maysa kadagiti kalatakan a pagkonsiertuan idiay São Paulo, Brazil. Kasla daytan ti pangrugian ti panagbalinda a nalatak. Ngem, pinakdaaran ida ti maysa a kapammatianda a napeggad ti agbalin a nasinged kadagidiay saan a mangikabkabilangan iti pagalagadan ti Dios. (Proverbio 13:20) Impaganetget ti kapammatianda daytoy a balakad ti Biblia babaen ti panangestoriana iti mismo a kapadasanna. Kinunana a naisagmak ni manongna gapu iti di umiso a kakadua. Kas resulta, nagikkat da Tiago ken dagiti kakabsatna kas miembro ti banda. Agserserbida itan a tallo iti amin a tiempo kas ministro. Kombinsidoda a naliklikanda ti naespirituan a peggad gapu ta impangagda ti balakad ti Biblia.

Mangdisiplina ti Nailangitan nga Amatayo

Ti naayat nga ama disiplinaenna dagiti annakna gapu ta kayatna nga agbalinda a responsable. (Efeso 6:4) Saan a napanuynoy ti kasta nga ama no mangdisiplina kadagiti annakna ngem saan met a nauyong. Umasping iti dayta, no dadduma masapul a disiplinaennatayo ti nailangitan nga Amatayo. Ngem saan a naulpit ti panangdisiplina ti Dios no di ket kanayon a naayat. Kas iti Amana, saan a nauyong ni Jesus uray no saan nga agtulnog a dagus dagiti  adalanna iti panangdisiplinana.​—Mateo 20:20-28; Lucas 22:24-30.

Usigem no kasano nga impateg ti lalaki nga agnagan Ricardo ti naayat a disiplina ni Jehova. Binaybay-an ni tatangna idi pito laeng a bulanna. Idi agtin-edyeren, nariknana a narigat ti awanan ama. Naisagmak kadagiti dakes nga aramid isu a burburiboren ti konsiensiana. Idi nabigbigna a saan a maitunos ti biagna iti moral a pagalagadan ti Biblia, inkeddengna ti makisarita kadagiti panglakayen iti kongregasion a pakigimgimonganna. Siiinget ken siaayat a binalakadan dagiti panglakayen maitunos iti prinsipio ti Biblia. Impateg ni Ricardo ti imbalakadda kenkuana ngem napasaranna latta ti di nasayaat nga epekto ti naaramidanna ta adda dagiti rabii a di makaturturog, agsangsangit, ken maup-upay. Idi agangay, nabigbigna a ti pannakadisiplinana ket pammaneknek nga ay-ayaten pay laeng ni Jehova. Nalagipna ti kunaen ti Hebreo 12:6: “Ti ayaten ni Jehova disiplinaenna.”

Laglagipentayo koma a saan laeng a panangdusa wenno panangtubngar iti dakes nga aramid ti ramanen ti panangdisiplina. Ti Biblia inaigna met ti disiplina iti panangsanay. Isu a mabalin a disiplinaennatayo ti naayat a nailangitan nga Amatayo babaen ti panangipalubosna a sagabaentayo iti apagbiit ti bunga dagiti bidduttayo. Ngem ipakita ti Biblia a ti panangdisiplinana sanayennatayo ken tulongannatayo a magna iti nalinteg a dana. (Hebreo 12:7, 11) Wen, ti Amatayo talaga a maseknan iti pagimbagantayo ken tubngarennatayo tapno magunggonaantayo.

Ti Amatayo Ipaayna ti Pisikal a Kasapulantayo

No kasano a ti naayat nga ama ipaayna ti pisikal ken material a kasapulan ti pamiliana, kasta met ni Jehova. ‘Ammo ti nailangitan nga Amayo a kasapulanyo amin dagitoy a banag,’ kuna ni Jesus. (Mateo 6:25-34) Inkari ni Jehova: “Saankanto a pulos panawan ket saankanto a pulos baybay-an.”​—Hebreo 13:5.

Napaneknekan ti babai nga agnagan Nice nga agpayso dagita a sasao idi naawanan iti trabaho ni lakayna. Nabiit pay a nagikkat ni Nice iti trabahona a dakkel ti sueldona tapno ad-adu ti panawenna kadagiti babbalasangna ken iti panagserbina iti Dios. Pangalaanda ngarud itan ti pagbiagda? Nagkararag ni Nice ken Jehova. Kabigatanna, nagsubli ni lakayna iti pagtrabahuanna tapno iyawidnan dagiti alikamenna. Nasdaaw idi adda baro a trabaho nga intukon ti boss-na! Naawanan iti trabaho ti asawa ni Nice iti maysa nga aldaw ngem naaddaan met laeng kabigatanna. Gapu iti dayta, nagyaman dagiti agassawa iti nailangitan nga Amada. Ipakita ti kapadasanda a ni Jehova, ti naayat a Manangipaay, dinanto pulos lipaten dagiti matalek nga adipenna.

Agyamantayo iti Panagayat ti Amatayo

Pudno unay, saan nga umdas ti sasao a mangdeskribir iti naisangsangayan nga ayat ti nailangitan nga Amatayo! Kombinsidotayo nga isu ti kasayaatan nga Ama no usigentayo ti nadumaduma a pamay-an a panangipakitana iti naamaan nga ayatna kas iti pananganamongna, panangngaasina, pannalaknibna, panangdisiplinana, ken kasta met ti panangipaayna iti kasapulantayo!

Kasanotayo a maipakita ti panagyamantayo iti ayat nga impakita kadatayo ti nailangitan nga Amatayo? Ikagumaantayo nga ammuen ti ad-adu pay maipapan kenkuana ken iti panggepna. (Juan 17:3) Itunostayo ti biagtayo iti pagayatan ken daldalanna. (1 Juan 5:3) Maipakitatayo met ti ayatna iti wagas a pannakilangentayo iti sabsabali. (1 Juan 4:11) Kadagita a pamay-an, maipakitayo a bigbigentayo ni Jehova kas Amatayo ken ibilangtayo a pribilehio ti agbalin nga annakna.

[Footnotes]

[Blurb iti panid 19]

Bayat nga umun-uneg ti pannakaammotayo no ania a kita nga ama ni Jehova, ad-adda a sumingedtayo ken matignaytayo a mangayat kenkuana

[Blurb iti panid 22]

Maipakitatayo a bigbigen- tayo ni Jehova kas Amatayo ken ibilangtayo a pribilehio ti agbalin nga annakna

[Kahon/Dagiti Ladawan iti panid 21]

IPAKPAKITA NI JEHOVA TI NAAMAAN NGA AYATNA ITI NADUMADUMA A PAMAY-AN

PANANGANAMONG

PANANGNGAASI

PANNALAKNIB

PANANGDISIPLINA

PANANGIPAAY ITI KASAPULAN