Idatag daytoy nga artikulo dagiti saludsod a nalabit nayimtuodmon. Ipakitana met ti pakabasaam kadagiti sungbat iti Bibliam. Maragsakan dagiti Saksi ni Jehova a mangilawlawag kadagiti sungbat.

1. Ania a pagarian ti naikari ken Jesus?

Inkari ti Dios a maysa a kaputotan ni Ari David ti agturayto iti tronona agingga iti tiempo a di nakedngan. Ni Jesus ti naipadto a kaputotanna, ken agturturayen idiay langit kas Ari ti Pagarian ti Dios.​—Basaem ti Salmo 89:4; Lucas 1:32, 33.

Idi ubing pay ni David, pinili ti Dios nga agbalin nga ari iti Israel nga ili ni Jehova. Idi natay ni David, ni Solomon ti pinili ni Jehova nga agtugaw iti ‘tronona.’ (1 Cronicas 28:4, 5; 29:23) Idi natay ni Solomon, adu nga ari ti nagturay iti Jerusalem ngem kaaduan ti saan a matalek. Idi agangay, impalubos ni Jehova a ti Jerusalem dadaelen ti buyot ti Babilonia ken ikkatenna ti agturturay nga ari. Napasamak dayta idi 607 B.C.E. Sipud idin, awanen ti nagari a nagtaud iti kaputotan ni David manipud iti literal a siudad ti Jerusalem.​—Basaem ti Ezequiel 21:27.

2. Kasano kapaut nga awan ti kaputotan ni David a nagturay ken mangirepresentar iti Jerusalem?

Di nagbayag, kalpasan ti pannakadadael ti Jerusalem, kinuna ni Jehova ken propeta Daniel a mangpili ti Dios iti maysa nga ari nga agturay manipud langit. Kaano a mangrugi nga agturay?​—Basaem ti Daniel 7:13, 14.

Inlawlawag ni Daniel ti sirmata a sadiay nga imbilin ti Dios a mapukan ti dakkel a kayo, no kasano nga imbilin ti Dios nga agpatingga ken madadael ti pagarian idiay Jerusalem. Ngem mabati iti daga ti puon ti kayo tapno kalpasan ti “pito a panawen” agsaringit manen. Ipakita ti Biblia a ti tallo ket kagudua a “panawen” katupagna ti 1,260 nga aldaw, isu a ti “pito a panawen” ket agdagup iti 2,520 nga aldaw. (Apocalipsis 12:6, 14) Iti padto ti Biblia, ti al-aldaw masansan nga irepresentarna ti tawtawen. (Numeros 14:34) Isu nga iti las-ud ti 2,520 a tawen, awan ti agturay nga ari iti Pagarian ti Dios.​—Basaem ti Daniel 4:10-17.

  3. Kaano a nagbalin nga Ari ni Jesus?

Ti Dios pinagbalinna nga Ari ni Jesus idiay langit idi 1914, apag-isu a 2,520 a tawen kalpasan ti pannakadadael ti Jerusalem. Idi nagbalin nga Ari ni Jesus, ti immuna nga inaramidna ket intapuakna ni Satanas ken dagiti demoniona ditoy daga. (Apocalipsis 12:7-10) Saan a nakita dagiti tattao dayta a pasamak ngem nagresulta iti panagrigat ti sangatauan. (Apocalipsis 12:12) Dagiti pasamak sipud idi 1914 paneknekanda a nagturayen ni Jesus kas Ari iti dayta a tawen.​—Basaem ti Mateo 24:14; Lucas 21:10, 11, 31.

4. Ania ti kaipapananna kenka ti panagari ni Jesus?

Ti kaitungpalan dagiti padto maipapan iti panagari ni Jesus paneknekanda a mabalinmo ti agtalek iti Sao ti Dios. Asidegen nga usaren ni Jesus ti pannakabalinna kas ari tapno bang-aranna dagiti tattao manipud iti amin a sagsagabaenda.​—Basaem ti Salmo 72:8, 12, 13; Daniel 2:44.

Para iti kanayonan nga impormasion, kitaem ti panid 215-218 daytoy a libro, Ania a Talaga ti Isursuro ti Biblia?, nga impablaak dagiti Saksi ni Jehova.

[Tsart iti panid 16, 17]

(Para iti aktual a pannakaurnosna, kitaem ti publikasion)

Oktubre

607 B.C.E. ← 2,520 a tawen → 1914 C.E.

1000 B.C.E. | 1 B.C.E. | 1 C.E. | 1000 C.E. | 2000 C.E.

← 606.25 a tawen →← 1,913.75 a tawen →

Nadadael ti pagarian idiay Jerusalem

Agusarka iti calculator: 606.25 + 1,913.75 = 2,520

Ti Dios pinagbalinna ni Jesus nga Ari a mangituray kadagiti nasion