“TI TAO dinominaranna ti tao iti pakadangrananna.” (Eclesiastes 8:9) Dagita a sasao a nairekord agarup 3,000 a tawen ti napalabasen, siuumiso a deskribirenna ti kasasaad ti lubong a pagbibiagantayo. No adda autoridad ti maysa a tao agannayas a mangirurumen iti padana a tao, aniaman ti kasasaadda wenno sadino man ti pagnanaedanda. Masansan a biktimaenda dagiti awan gawayna ken marigrigat. Ania ngata ti panangmatmat ni Jehova kadagita a kinaawan hustisia? Masarakan ti sungbat iti Ezequiel 22:6, 7, 31.​—Basaem.

Iti Linteg nga intedna iti Israel, imbatad ni Jehova kadagidiay addaan autoridad a dida usaren ti posisionda iti di umiso a pamay-an. Bendisionan laeng ti Dios ti nasion no naasi ken adda konsiderasion dagiti panguloda kadagiti napanglaw. (Deuteronomio 27:19; 28:15, 45) Ngem idi kaaldawan ni Ezequiel, dagiti panguluen idiay Jerusalem ken Juda di umiso ti panangusarda iti autoridadda. Ania ti ar-aramidenda?

Us-usaren idi dagiti panguluen dagiti ‘takiagda a mangibukbok iti dara.’ (Bersikulo 6) Ti termino a “takiag” irepresentarna ti pannakabalin wenno autoridad. Kastoy ti mabasa iti sabali pay a patarus: “Dagiti prinsipe ti Israel . . . usarenda ti pannakabalinda tapno mangibukbok iti dara.” Kasano koma nga adda kinahustisia no dagiti panguluen a mangipatpatungpal iti linteg abusuenda ti autoridadda ken papatayenda dagiti inosente a tattao?

Kalpasan dayta, binabalaw ni Ezequiel saan laeng a dagiti panguluen no di ket uray dagidiay tumultulad kadakuada a mangsalsalungasing iti Linteg ni Jehova. “Inumsida ti ama ken ina,” kuna ni Ezequiel. (Bersikulo 7) Gapu ta saanda a binigbig ti umiso nga akem dagiti nagannak, dinadael dagiti tattao ti kangrunaan a pakabuklan ti nasion​—ti pamilia.​—Exodo 20:12.

Dagiti dakes a tattao ginundawayanda dagiti nakapuy. Tunggal salungasingenda ti Linteg ipakpakitada ti dida panangapresiar iti panagayat ti Dios iti Israel. Kas pagarigan, kalikaguman ti Linteg ti Dios kadagiti Israelita nga ipakitada ti konsiderasion kadagiti saan nga Israelita a makipagnanaed kadakuada. (Exodo 22:21; 23:9; Levitico 19:33, 34) Ngem “sinaurda ti ganggannaet nga agnanaed.”​—Bersikulo 7.

Pinarigatda dagidiay awanan gaway, ti “awan amana nga ubing ken ti balo a babai.” (Bersikulo 7) Maseknan ni Jehova iti kasapulan dagiti ulila ken balo. Inkari ti Dios nga ukomennanto dagidiay mangparigat kadagiti ulila ken balo.​—Exodo 22:22-24.

Kadagita a pamay-an, linabsingda ti Linteg ken inumsida ti kinamanagayat ti Dios. Ania ngarud ti aramiden ni Jehova? Inkarina: “Ibuyatkonto ti panangkondenarko kadakuada.” (Bersikulo 31) Tinungpal ni Jehova ti saona idi impalubosna a dadaelen dagiti Babilonio ti Jerusalem ken kinayawanda ti ilina idi 607 B.C.E.

Iti sasao ni Ezequiel, adda dua a punto a maadaltayo: Umuna, kagura ni Jehova ti kinaawan hustisia; maikadua, maasian ni Jehova kadagiti inosente a biktima ti kinaawan hustisia. Saan a nagbaliw ti Dios. (Malakias 3:6) Inkarina a dandaninan ikkaten ti kinaawan hustisia ken dagidiay mangisungsungsong iti dayta. (Proverbio 2:21, 22) Kayatmo kadi a maammuan ti ad-adu pay maipapan iti Dios a “managayat iti kinahustisia” ken no kasano nga agbalinka a nasingsinged kenkuana?​—Salmo 37:28.

Singasing a basaen iti Biblia iti Agosto:

▪ Ezequiel 21-38

[Blurb iti panid 27]

Nalawag a saan a kayat ni Jehova a mangirurumen dagidiay addaan autoridad