Ti Panagturpos ti Maika-132 a Klase ti Gilead

Manangidepensa iti Kinapudno

NARAGSAK nga aldaw ti Marso 10, 2012 iti educational center dagiti Saksi ni Jehova idiay Patterson, New York. Rinibu a nanakman ti panagkawkawesda a tattao, agraman dagiti bisita manipud sabali a pagilian ti nagtataripnong iti panagturpos ti maika-132 a klase ti Watchtower Bible School of Gilead. Napno ti auditorium idiay Patterson; nagbuya met ti dadduma iti programa kadagiti naituding a lugar babaen ti video. Ti timmabuno ket agdagup iti 9,042.

Magagaranen ti amin a timmabuno. Saan a kas kadagiti napalabas a klase, amin dagiti nagraduar nga estudiante addadan iti espesial nga amin-tiempo a panagserbi kas Bethelite, special pioneer, agdaldaliasat a manangaywan ken misionero, nupay dida pay nagatender iti Gilead. Ania ngata ti manamnama kadagitoy aduanen iti kapadasan nga estudiante?

Nasungbatan a dagus dayta idi a ti tserman ti programa a ni Gerrit Lösch, maysa a kameng ti Bagi a Manarawidwid dagiti Saksi ni Jehova, impaayna ti panglukat a palawag. Indatagna ti mamagpanunot a saludsod, “Idepdepensayo Kadi ti Kinapudno?” Inlawlawagna a dagiti Kristiano idepdepensada ti kinapudno ken amin a Nakristianuan a sursuro. Ti panangidepensa iti kinapudno ket saan laeng a basta panangisuro iti kinapudno no di ket panangtulong kadagiti tattao a mangayat iti kinapudno.

“Kasanotayo nga ammo nga adda kadatayo ti kinapudno?” insaludsod ni Kabsat Lösch. Kinunana a saan a ti bilang dagiti tattao nga umawat iti dayta ti pammaneknek. Nupay minilion ita ti immawat iti pudno a panagdayaw, bassit laeng ti bilangda idi Pentecostes 33 C.E. Dinakamatna ti lima a pamay-an a mangipakita nga adda kadatayo ti kinapudno: (1) Agtalinaedtayo iti pannursuro ni Jesus, (2) adda panagayattayo iti maysa ken maysa, (3) an-annurotentayo ti nangato a pagalagadan ti Dios iti moral, (4) agtalinaedtayo a neutral kadagiti isyu iti lubong, ken (5) datayo ti ili a pinili ti Dios a mangawit iti naganna.

“Agtulnog Kadagiti Instruksion”

Pampanunoten dagiti dumdumngeg no ania ti aramiden ni Geoffrey Jackson a kameng ti Bagi a Manarawidwid idi napan iti podium nga adda guyguyodenna a maleta! Ti tema ti palawagna nga “Agtulnog iti Instruksion” ket naibasar iti Isaias 50:5. Kastoy ti kuna dayta a bersikulo maipapan ken Jesu-Kristo: “Siak, iti biangko, saanak a rebelioso. Saanak a bimmaw-ing iti sungani a turong.”

Pinaregta ni Kabsat Jackson dagiti estudiante a dagus nga agtulnogda iti instruksion nga ipaay ni Jehova babaen ti nasantuan nga espiritu, ti Biblia, ken ti organisasionna. Iti ilustrasion maipapan iti talento a nairekord iti Mateo 25:14-30, no ar-arigen agpapada ti naited iti tunggal adipen gapu ta naikkanda sigun iti abilidadda. Manamnama nga aramidenda ti amin a kabaelanda. Nakomendaran ti dua nga adipen kas “naimbag ken matalek nga adipen.” Ti kinamatalek ket saan nga agpannuray iti resulta no di ket ti agtultuloy a panangsurot iti instruksion.

Ti maikatlo nga adipen ket naawagan “nadangkes ken nabuntog” ken “awan kaes-eskanna.” Apay? Ngamin inkalina ti talento a naited kenkuana. Ti talento ket saan laeng a bassit a sinsilio no di ket katupag ti 6,000 a denario nga agdagsen iti 20 a kilo. Katupag dayta ti dagsen ti maysa a maleta a mabalin nga  awiten ti agbiahe iti eroplano. Saan a nalaka ti agikali iti banag a kas iti kadakkel ti maleta. Isu a nagbannog met ti adipen a nangikali iti talento, ngem saan a dayta ti naibilin nga aramidenna. Kasta met, mabalin nga okupado ti maysa a misionero, ngem ania ti ar-aramidenna? Agsursurat, agin-Internet, agragragsak, wenno agnegnegosio? Mabalin a makabannog dagita nga aktibidad, ngem saan a dayta ti naibilin nga aramidenna. Kinuna ni Kabsat Jackson: “Surotenyo a kanayon ti instruksion!”

“Dikay Pulos Agduadua”

Dayta ti tema nga impalawag ni Anthony Morris a kameng ti Bagi a Manarawidwid. “Ti Biblia dina pulos inaig ti pammati iti panagduadua,” kinunana. “Agkontrada.” Nagballigi ni Satanas a nangimula iti panagduadua iti isip ti perpekto a babai a ni Eva, isu a kabaelanna met nga imula ti panagduadua iti panunottayo. “Pabilgem ti pammatim iti kasta mapukaw ti panagduaduam,” kuna ni Kabsat Morris. Tinukoyna ti maipapan ken Pedro a “nagna iti rabaw ti danum” ngem idi ‘nakitana ti allawig’ nagbuteng isu a mangrugin a lumned. Idin iniggaman ni Jesus, sana kinuna: “Apay a nagduaduaka?” (Mateo 14:29-31) “Bayat nga okupadokayo iti amin-tiempo a panagserbiyo kas misionero, mabalin nga apresiaren ti dadduma ti ar-aramidenyo, a kasla magmagnakayo iti rabaw ti danum. Ngem no dumteng ti problema nga arig-bagyo, dikay agduadua.”

Kinuna pay ni Kabsat Morris a nupay dumteng dagiti arig-bagyo a kasasaad, agsardengto met laeng. No maipasangoda iti narigat a kasasaad, pinaregtana dagiti estudiante a tuladenda ti inaramid ni Pablo ken Silas idi naibaludda idiay Filipos. Kuna ti Aramid 16:25: “Idi agarup katengngaan ti rabii nagkarkararag da Pablo ken Silas ket indaydayawda ti Dios babaen iti kanta; wen, mangmangngeg ida dagiti balud.” Kinunana a saanda laeng a basta nagkararag no di ket nagkantada pay iti napigsa nga uray la nangngeg ti dadduma pay a balud. Kuna ni Kabsat Morris a saan nga amin ket nalaing nga agkanta, ngem ditay koma mabain nga agkanta nangruna no adda problematayo. Inngudo ni Kabsat Morris ti palawagna babaen ti panangbasana iti liriko ti kanta a napauluan iti “Panagibtur Agingga iti Panungpalan.” Inadawna dayta manipud iti numero 135 iti pagkantaan a napauluan Kantaanyo ni Jehova.

Dadduma Pay a Makaparegta a Palawag

“Ayatem Kadi ti Adu nga Al-aldaw?” Dayta ti tema nga impalawag ni Robert Luccioni iti Purchasing Department. Naibasar dayta iti sasao ni Ari David a nairekord iti Salmo 34:12. Dinakamat ni Kabsat Luccioni iti palawagna no kasano a makapagibtur ti maysa iti narigat a tiempo ken mataginayon ti nasayaat a relasionna ken Jehova. Adu ti masursurotayo iti salaysay ti 1 Samuel kapitulo 30. Bayat nga ilemlemmengan ni David ken dagiti buyotna ken ti pamiliada ni Ari Saul, nagnaedda idiay Siclag. Idi kinautibo dagiti rimmaut nga Amalekita dagiti pamiliada, pinabasolda ni David ken kayatda nga uboren. Ania ti inaramid ni David? Saan a naupay no di ket “pinapigsa ni David ti bagina babaen ken Jehova a Diosna.” (1 Samuel 30:6) Nagpaiwanwan ken Jehova ket sinurotna ti instruksion ti Dios, ken insalakanna dagiti nakautibo. Impasigurado ti ispiker a no agtalekda ken Jehova ken surotenda ti panangiwanwanna, naimbagto ti tungpalda iti adu nga al-aldaw. Naragsakto ti biagda iti pribilehio a naited kadakuada.

“Agtalinaed a Naridam iti Panagbantay iti Rabii.” Dayta ti tema nga impalawag ni Michael Burnett, maysa kadagiti instruktor iti Gilead School. Dagiti Israelita biningbingayda ti rabii iti tallo a panagbantay a sagpapat nga oras, manipud ilelennek agingga iti isisingising ti init. Ti maudi a panagbantay manipud alas 2:00 ti parbangon agingga iti alas 6:00 ti agsapa, ti kasipngetan ken kalam-ekan a panagbantay isu a narigat ti agtalinaed a siririing.  Tapno saan a makaturog, pinampanunot ti salmista dagiti sasao ni Jehova bayat ti maudi a panagbantay iti rabii. (Salmo 119:148) “Masapul nga agridamkayo,” kuna ni Kabsat Burnett kadagiti estudiante. “Mapasaranyonto dagiti narigat ken makaupay nga al-aldaw ken dagiti epekto ti di mangikankano ken awanan-ayat a lubong. Masapul nga agplanokayo.” Isu a pinalagipanna ida nga itultuloyda ti agadal tapno agtalinaedda a siririing iti naespirituan. Imbaga ni Kabsat Burnett ti maysa nga ilustrasion. “Kada aldaw, agkararagka ken Jehova ta kayatmo ti makigayyem kenkuana. Isu a kas maysa a gayyem, ipalubosmo a makisarita ni Jehova kenka babaen ti Biblia. Adalemen ti rabii, isu nga agplanokayo no kasanoyo nga usaren dagiti al-aldaw iti masanguananyo, iti kasta agbalinkayo a naridam iti panagbantay ti rabii.”

“Nasanay Para iti Trabaho,” a naibasar iti 1 Pedro 5:10 ti tema nga impalawag ni Mark Noumair, a maysa kadagiti instruktor iti Gilead. Sinaludsodna kadagiti estudiante: “Nupay adun ti kapadasanyo kas ministro, apay a naawiskayo ditoy Watchtower Educational Center?” Ania ti sungbat: “Agsipud ta nalaingkayo iti propesionyo. Adu a propesional ti sumardeng biit nga agtrabaho tapno agadal iti kasta agbalinda a nalalaing pay. Iti napalabas a lima a bulan, pinagbalinnakayo ni Jehova a ‘natibker’ ken ‘nabileg’ babaen iti naan-anay a panagadal iti Saona ken ti organisasionna tapno maitungpalyo dagiti nadagsen nga annongenyo. Saan nga agtiritir wenno matukkol dagiti natibker a troso. Makitanto ti resulta ti pannakasanayyo inton makipagtrabahokayo kadagiti kakabsatyo. No masuotkayo salimetmetanyonto ngata ti naadalyo iti Biblia wenno baybay-anyo dagiti pagalagadan ti Dios? Ti tibker ti troso agpannuray iti nasedsed a bugasna isu a maawitna ti nadagsen a banag. Ti kinatibkeryo agpannuray iti makin-uneg a kinataoyo. Inayabannakayo ni Jehova ditoy tapno pagbalinennakayo a nabileg ken mapagtalkan para iti trabaho iti masanguanan. Nalpasen ti paset ti Dios, isu nga idawdawatmi nga aramidenyo ti pasetyo ken bay-anyo a turposen ti ‘Naindaklan a Mannursuro’ ti panagsanayyo.”

Dagiti Kapadasan ken Interbiu

Makaparagsak met a mangngegan ti kapadasan dagiti estudiante a nagturpos iti Gilead. Iti maysa a paset ti programa, impabuya dagiti estudiante ti dadduma a kapadasanda a nangasaba. Alaentay a pagarigan ti kapadasan ti agassawa a Pranses a naguray iti innem nga oras iti airport idi agturongda iti Gilead School. Iti restawran iti airport, nakisaritada iti dua a lallaki nga agur-uray met iti eroplano a paglugananda. Idi imbaga ti maysa a lalaki nga isu ket taga-Malawi, nakisaoda kenkuana iti lenguahe a Chichewa. Nasdaaw ti lalaki isu a dinamagna no apay a makapagsaoda iti lenguahena. Imbagada a misioneroda idiay Malawi. Idi kinuna ti maysa a lalaki a taga-Cameroon, nakisaritada manen iti lenguahe a Pranses, isu a nasdaaw met. Pagraraeman dagitoy a lallaki dagiti Saksi ni Jehova, isu a kinasabaan ida dagiti misionero.

Dua nga agassawa ti ininterbiu ni Nicholas Ahladis iti Translation Services. Maysa nga agassawa a taga-Australia ti naidestino kas misionero iti nariribuk a pagilian ti East Timor. Ti sabali pay nga agassawa a taga-Korea ti naidestino idiay Hong Kong. Magagaran dagitoy nga agassawa nga agsubli iti destinoda tapno iyaplikarda dagiti naadalda.

Kalpasan a nayawat dagiti diplomada, maysa nga estudiante ti nangbasa iti surat a mangipakita iti panagyamanda kadagiti nasursuroda. Kalpasanna, iti pangserra a palawag ni Kabsat Lösch, inusarna dagiti nagpintas a piguratibo a sasao nga inyarigna ti kinapudno kas iti nagpintas a bullalayaw, ubbog iti desierto, ken angkla iti nadawel a baybay. “Nagsayaat ketdin a maammuan ti kinapudno,” kinunana. “Agbalinkayo a manangidepensa iti kinapudno, ken tulonganyo ti dadduma nga agbalin met a kas kadakayo.”

 [Tsart/Mapa iti panid 31]

ESTADISTIKA TI KLASE

12 pagilian a nairepresentar

36 promedio nga edad

20 promedio a tawen sipud bautismo

15 promedio a tawen iti amin-tiempo a ministerio

[Mapa]

(Para iti aktual a pannakaurnosna, kitaem ti publikasion)

Naipakita iti baba dagiti pagilian a nakaibaonan dagiti naggraduar:

PAKAIDESTINUAN DAGITI MISIONERO

BELIZE

BENIN

CAMBODIA

CAMEROON

CAPE VERDE

CÔTE D’IVOIRE

DOMINICAN REPUBLIC

EAST TIMOR

ECUADOR

GABON

GEORGIA

GUINEA

HONG KONG

LIBERIA

MADAGASCAR

MALAWI

PERU

SAMOA

SÃO TOMÉ AND PRÍNCIPE

UNITED STATES OF AMERICA

ZIMBABWE

[Ladawan iti panid 31]

Ti Maika-132 a Klase a Nagturpos iti Watchtower Bible School of Gilead

Iti listaan iti baba, nanumeruan dagiti intar manipud iti sango nga agpalikud, ken nailista dagiti nagan manipud iti kannigid nga agpakannawan iti kada intar.

(1) Iap, R.; Iap, J.; Ng, T.; Ng, P.; Laurino, F.; Laurino, B.; Won, S.; Won, S.

(2) Morales, N.; Morales, M.; Zanutto, J.; Zanutto, M.; Rumph, I.; Rumph, J.; Germain, D.; Germain, N.

(3) Atchadé, Y.; Atchadé, Y.; Thomas, C.; Thomas, E.; Estigène, C.; Estigène, P.

(4) Ehrman, D.; Ehrman, A.; Bray, J.; Bray, A.; Amorim, M.; Amorim, D.; Seo, Y.; Seo, Y.

(5) Simon, J.; Simon, C.; Seale, C.; Seale, D.; Erickson, J.; Erickson, R.

(6) McCluskey, D.; McCluskey, T.; Brown, A.; Brown, V.; Mariano, D.; Mariano, C.; Loyola, Y.; Loyola, C.

(7) Rutgers, P.; Rutgers, N.; Foucault, P.; Foucault, C.; Wunjah, J.; Wunjah, E.