Pannakisarita iti Maysa a Kaarruba​—Mapan Kadi Idiay Langit Amin a Naimbag a Tattao?

MARAGSAKAN dagiti Saksi ni Jehova a makisarita kadagiti kaarrubada maipapan iti linaon ti Biblia. Adda kadi aniaman a saludsodmo maipapan iti Biblia? Kayatmo kadi a mailawlawag kenka ti maysa a patpatien wenno narelihiosuan nga aktibidad dagiti Saksi ni Jehova? No kasta, no adda maam-ammom a Saksi, saanka koma a bumdeng a makisarita kenkuana ta maragsakan a mangilawlawag iti dayta.

Naisalaysay iti baba ti gagangay a pannakisarita ti maysa a Saksi iti kaarrubana. Ipapantayo a simmarungkar ti Saksi nga agnagan Marcus iti pagtaengan ti maysa a lalaki nga agnagan Robert.

Ania ti Aramiden Dagidiay Mapan Idiay Langit?

Marcus: Ania ti makunam, sumayaatto ngata ti kasasaad iti masanguanan?

Robert: Panagkunak sumayaatto. Segseggaak ti mapan idiay langit a makikadua iti Apo.

Marcus: Nagsayaat a namnama dayta. Masansan a dakamaten ti Biblia no ania ti kasasaad idiay langit ken ti pribilehio a mapan sadiay. Napanunotmo kadin no anianto ti aramiden dagiti mapan sadiay?

Robert: Makikaduakamto iti Dios ket idaydayawminto iti agnanayon.

Marcus: Talaga a nagsayaat dayta a namnama. Ngem saan laeng a dagiti pribilehio dagidiay mapan idiay langit ti dakamaten ti Biblia, no di ket uray pay ti nagpateg a rebbengenda.

Robert: Rebbengen nga?

Marcus: Nadakamat dayta iti Apocalipsis 5:10 a kunana: “Pinagbalin ida [ni Jesus] a kas pagarian ken papadi iti Diostayo, ket agturayda a kas ar-ari iti daga.” Nadlawmo kadi no ania ti rebbengen dagiti mapan idiay langit?

Robert: Kuna ti teksto nga agturayda kas ar-ari iti daga.

Marcus: Ania ngata ti kayat a sawen dayta?

Siasino Dagiti Iturayanda?

Marcus: Panunotem daytoy, no dagiti mapan idiay langit agturayda kas ar-ari, adda la ketdi tattao nga iturayanda, saan kadi? Apay koma nga adda gobierno no awan met ti iturayanda?

Robert: Wen nga agpayso.

Marcus: Isu a ti saludsod ita ket, Siasino ti iturayanda?

Robert: Panagkunak iturayanminto dagiti tattao ditoy daga a saan pay a napan idiay langit.

Marcus: Mabalin siguro no mapan idiay langit amin a naimbag a tattao. Ngem panunotem daytoy. Posible ngata a dadduma a naimbag a tattao ket saan a mapan idiay langit?

 Robert: Ita laeng a nangngegko dayta nga imbaga ti maysa a Kristiano.

Marcus: Insaludsodko dayta gapu iti mabasa iti Salmo 37:29. Pakibasam man ngarud.

Robert: Sige. Kunana ditoy: “Dagiti nalinteg tagikuaendanto ti daga, ket agtaengdanto nga agnanayon iti dayta.”

Marcus: Pagyamanan. Nadlawmo kadi no sadino ti pagnaedan ti adu a naimbag a tattao?

Robert: Kuna ti teksto nga agnaedda ditoy daga.

Marcus: Wen, husto​—ken saan laeng nga apagbiit. Paliiwem ta kunana ditoy: “Agtaengdanto nga agnanayon iti dayta.”

Robert: Mabalin a kayatna a sawen a kanayon nga adda naimbag a tattao nga agnaed ditoy daga. No mataytayo ket mapantayto idiay langit, suktandatayo dagiti mayanak a naimbag a tattao.

Marcus: Mabalin a kasta ti pannakaawat ti adu a tattao iti dayta a teksto. Ngem posible kadi nga adda sabali a kaipapanan ti bersikulo? Saan ngata nga ibagbagana a dagiti naimbag a tattao agbiagdanto nga agnanayon ditoy daga?

Robert: Usigekto pay siguro dayta.

Maysa a Paraiso a Daga iti Masanguanan

Marcus: Usigem ti kuna ti sabali pay a paset ti Biblia maipapan iti biag ditoy daga iti masanguanan. Basaenta ti Apocalipsis 21:4. Kastoy ti kunaenna maipapan kadagiti tattao nga agbiagto iti dayta a tiempo: “[Ti Dios] punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.” Saan kadi a nagsayaat dayta a namnama?

Robert: Wen. Ngem panagkunak desdeskribiren la dayta ti kasasaad ti biag idiay langit.

Marcus: Agpayso a dagidiay mapan idiay langit sagrapenda dagita a bendision. Ngem basaem manen ti kuna ti teksto. Ania ti ibagana maipapan iti ipapatay?

Robert: Kunana nga “awanton ni patay.”

Marcus: Husto. Ngem ammok nga umanamongka a sakbay a maawan ti maysa a banag, umuna pay a tumaud?

Robert: Siempre.

Marcus: Ngem adda kadin napasamak nga ipapatay idiay langit? Saan kadi a ditoy laeng daga ti ayan dagiti matmatay a tattao?

Robert: Wen nga agpayso aya.

Marcus: Agpayso nga isursuro ti Biblia a dadduma a naimbag a tao mapanda idiay langit ngem adu met a sabsabali ti agbiag nga agnanayon ditoy daga. Kinapudnona, ammok a nangngegmon dagitoy a sasao: “Nagasat dagiti napakumbaba, ta maitedto kadakuada ti daga.”​—Mateo 5:5, Ti Baro a Naimbag a Damag Biblia.

Robert: Wen, namin-adun a nangngegko a naibasa dayta idiay simbaan.

Marcus: No dagiti naemma tawidendanto ti daga, saan kadi nga ipamatmat dayta nga agbiagto dagiti tattao ditoy daga? Dagidiay agbiagto ditoy daga sagrapendanto dagiti bendision a naipadto ditoy Apocalipsis. Maimatangandanto ti naan-anay a nagbaliwen a lubong gapu ta ikkatento ti Dios ti amin a kinadakes, uray pay ni patay.

Robert: Maawatakon ti kayatmo a sawen ngem diak pay kombinsido iti dua a teksto a pammaneknekmo.

Marcus: Siempre adu pay a teksto ti mangpaneknek no anianto ti kasasaad ti biag ditoy daga iti masanguanan. No adda pay tiempom, kayatko nga ipabasa kenka ti maysa kadagiti paboritok a teksto.

Robert: Sige.

“Daydiay Nadangkes Awanton”

Marcus: Nabasata itay ti bersikulo 29 iti Salmo 37. Sublianta dayta a teksto ngem bersikulo 10 ken 11 ti basaenta. Pakibasam man.

 Robert: Sige. “Ket iti apagbiit laengen a kanito, ket daydiay nadangkes awanton; ket pudno unay nga imutektekamto ti lugarna, ket isu awanton. Ngem dagidiay naemma tagikuaendanto ti daga, ket pudno a maragsakandanto iti napalalo iti kinaruay ti talna.”

Marcus: Pagyamanan. No kitaenta ti bersikulo 11, sadino ti pagnaedan ‘dagiti naemma’ wenno naimbag a tattao?

Robert: Ibagana met a “tagikuaendanto ti daga.” Ngem panagkunak agaplikar itan dayta a teksto ta adda met dagiti naimbag a tattao ditoy daga ita.

Marcus: Hustoka. Ngem paliiwem ta kuna met la dayta a bersikulo a sagrapento dagiti naimbag a tattao ti “kinaruay ti talna.” Adda kadi talna ditoy lubong ita?

Robert: Awan.

Marcus: Kasano ngarud a matungpal dayta a kari? Usigem daytoy: Ipapanmo nga adda apartmentmo. Naimbag a tattao ti dadduma nga agnanaed iti dayta. Ay-aywananda a naimbag ti apartment ken nasayaatda met a kaarruba. Maragsakanka la ketdi a mangipaabang kadakuada. Ngem saan a nasayaat ti ugali ti dadduma nga agab-abang ta daddadaelenda ti apartmentmo ken riribukenda pay dagiti kaarrubada. Ania ngarud ti aramidem no dida agbalbaliw?

Robert: Papanawek ida.

Marcus: Kasta met ti aramiden ti Dios kadagiti dakes a tattao iti aglawlawtayo. Kitaem manen ti bersikulo 10 a kunana: “Daydiay nadangkes awanton.” Kayatna a sawen, “papanawen” ti Dios dagiti tattao a mangrirriribuk iti sabsabali. Iti kasta, sagrapento dagiti naimbag a tattao ti natalna a kasasaad ditoy daga. Ammok a ti panagbiag dagiti naimbag a tattao ditoy daga ket mabalin a naiduma iti dati nga ammom.

Robert: Wen, diak pay ngamin nangnangngeg dayta iti simbaanmi.

Marcus: Kas iti imbagam itay, saan nga umdas ti maysa wenno dua a bersikulo a mangpaneknek iti dayta. Masapul nga usigen amin a pammaneknek iti Biblia maipapan iti masanguanan dagiti naimbag a tattao. Ngem sigun iti teksto a nabasata, posible kadi nga adda naimbag a tattao a mapan idiay langit ken dadduma ti agbiag nga agnanayon ditoy daga?

Robert: Diak sigurado. Ngem sigun iti binasam a teksto kasla kasta nga agpayso. Panunotek pay a naimbag dayta.

Marcus: Bayat nga us-usigem dayta, nalabit maisaludsodmo pay dagitoy. Dagiti ngay nagbiag a naimbag a tattao idi un-unana? Napanda ngata amin idiay langit? No saan, ayanda ngarud?

Robert: Mayat a saludsod dayta a.

Marcus: Kayatmo kadi a mangilistaak pay iti dadduma a teksto a mangilawlawag iti topiko a nagsaritaanta? * Kalpasanna, agsubliakto tapno ilawlawagko dagita. Nalabit nabasamton ken nausigmon dagita. Ania ti makunam?

Robert: Ala wen, basaekto ngarud. Pagyamanan.

[Footnote]