Talaga Aya a Mapaspasamak Dagiti Milagro?​—Tallo a Gagangay a Rason a Di Patien Dayta ti Dadduma

UMUNA: Imposible dagiti milagro ta maikontra dagita iti linteg ti nakaparsuaan. Ti pannakaawattayo kadagiti linteg ti nakaparsuaan ket naibasar iti mapaspasamak iti aglawlawtayo kas naobserbaran dagiti sientista. Ngem dagita a linteg ket kas kadagiti pagalagadan iti gramatika ti maysa a lenguahe nga adda dagiti sumagmamano nga eksepsion. Nalabit limitado ti pannakaawattayo kadagitoy a “pagalagadan.” (Job 38:4) Mabalin nga adun a tawen ti nabusbos ti napasnek a sientista a nangadal iti maysa a linteg ti nakaparsuaan, ngem no adda uray maysa laeng nga “eksepsion,” masapul nga usigenna manen dayta a linteg. Kas tay kunadan a “No adda maysa laeng a puraw a wak, saanmon a patien a nangisit amin a wak.”

Ti nakakatkatawa nga estoria ti maysa a tao ipakitana a nalaka laeng a patien ti saan a kompleto nga impormasion. Ni John Locke (1632-1704) insalaysayna ti estoria maipapan iti embahador ti Netherlands ken ti ari ti Siam (Thailand itan): Bayat nga es-estoriaen ti embahador ti pagilianna a Holland, kinunana iti ari a no dadduma makapagna ti elepante iti rabaw ti danum. Saan a mamati ti ari ken ipagarupna nga agul-ulbod ti embahador. Ngem ibagbaga laeng ti embahador ti di pay napadpadasan ti ari. Saan nga ammo ti ari a no tumangken ti danum ken agbalin a yelo, mabalin a makapagna ti elepante iti rabawna. Kasla imposible dayta iti ari gapu ta saanna nga ammo ti amin nga impormasion.

Usigentayo ti sumagmamano a gapuanan ita a maibilang idi nga imposible sumagmamanon a dekada ti napalabas:

● Makatayab ti maysa nga eroplano nga addaan nasurok a 800 a pasahero manipud New York agingga Singapore iti kapartak a 900 a kilometro kada oras.

 ● Mabalin a rupan-rupa nga agsarita dagiti tattao manipud nagduduma a kontinente babaen ti video conference.

● Rinibu a kanta ti maikabil iti maysa a gadyet a basbassit ngem iti kaha ti posporo.

● Kabaelan dagiti doktor a sukatan (transplant) ti puso ken dadduma pay a paset ti bagi.

Ania ngarud ti nalawag a konklusiontayo kadagita a kinapudno? No kabaelan dagiti tattao nga aramiden dagiti nakaskasdaaw a gapuanan a kasla imposible a maaramid idi, sigurado ngarud a ti Dios a nangparsua iti uniberso ken amin nga adda iti dayta, kabaelanna nga aramiden dagiti nakaskasdaaw a gapuanan a ditay pay naan-anay a maawatan wenno ditay maaramidan. *​—Genesis 18:14; Mateo 19:26.

MAIKADUA: Agpannuray ti Biblia kadagiti milagro tapno mamati dagiti tattao. Saan nga ibaga ti Biblia a nasken a patientayo amin a milagro. Imbes ketdi, pakdaarannatayo a ditay basta mamati kadagiti milagro ken datdatlag. Usigem daytoy nalawag a pakdaar: “Umayto ti Managdakdakes nga addaan iti pannakabalin ni Satanas. Agaramidto kadagiti amin a kita ti milagro ken kadagiti makaallilaw a pagilasinan ken datdatlag. Aramatennanto ti amin a kita ti dakes a pangallilaw.”​—2 Tesalonica 2:9, 10. Ti Baro a Naimbag a Damag Biblia.

Impakdaar met ni Jesu-Kristo nga adunto ti agpammarang a pasurotna ngem saanto nga isuda ti pudno a pasurotna. Addanto pay agkuna kenkuana: “Apo, Apo, saankami aya a nagipadto iti naganmo, ken nangparuar kadagiti sairo iti naganmo, ken nagaramid iti adu a mannakabalin nga aramid iti naganmo?”  (Mateo 7:22) Ngem kuna ni Jesus a saanna nga awaten ida kas pasurotna. (Mateo 7:23) Nalawag ngarud a saan nga insuro ni Jesus nga amin a milagro ket naggapu iti Dios.

Saan nga ibagbaga ti Dios kadagiti adipenna nga ibatayda laeng ti pammatida kadagiti milagro. Imbes ketdi, rumbeng a naibatay ti pammatida iti napaneknekan a kinapudno.​—Hebreo 11:1.

Alaentay a pagarigan ti maysa a nalatak a milagro a nairekord iti Biblia, ti panagungar ni Jesu-Kristo. Sumagmamano a tawen kalpasan ti panagungarna, agduadua ti dadduma a Kristiano iti Corinto no talaga a nagungar ni Jesus. Kasano a tinulongan ni apostol Pablo dagita a Kristiano? Imbagana laeng kadi a, “Masapul a mamatikayo”? Saan. Paliiwem no kasano nga impalagipna kadakuada dagiti ammodan a kinapudno. Kinunana a ni Jesus ket “naitabon, wen, . . . naibangon iti maikatlo nga aldaw sigun iti Kasuratan; ket nagparang ken Cefas, kalpasanna iti sangapulo ket dua. Kalpasan dayta nagparang iti nasurok a lima gasut a kakabsat iti maymaysa a gundaway, a ti kaaduan kadakuada addada agingga iti agdama.”​—1 Corinto 15:4-8.

Nasken kadi a patien dagiti Kristiano dayta a milagro? Intuloy a kinuna ni Pablo: “No ni Kristo saan a naibangon, ti panangaskasabami pudno unay nga ubbaw, ken ti pammatitayo ubbaw.” (1 Corinto 15:14) Patienda man wenno saan ti panagungar ni Jesus, saan a tinagilag-an dayta ni Pablo! Ammona a talaga a nagungar ni Jesus gapu iti salaysay ti adu a nakasaksi a sibibiag pay laeng idi. Kinapudnona, sidadaan pay ketdi a matay dagita a nakasaksi ngem iti ilibakda ti nakitada.​—1 Corinto 15:17-19.

MAIKATLO: Dagiti milagro ket gagangay laeng a pasamak a di maawatan dagiti tattao nga awan adalna. Ikagkagumaan nga ilawlawag ti dadduma nga eskolar a dagiti milagro iti Biblia ket gagangay laeng a pasamak, saan a gapuanan ti Dios. Pampanunotenda nga iti kasta a pamay-an, ad-adda a nakappapati dagiti salaysay iti Biblia. Nupay pudno a nainaig no dadduma iti milagro dagiti gagangay a pasamak​—kas iti ginggined, didigra, ken panagreggaay ti daga​—adda nagpapadaan amin dagitoy. Saan a naikabilangan no kaano a napasamak ti milagro kas nailawlawag iti Kasuratan.

Kas pagarigan, kunaen ti dadduma a ti umuna a saplit a napagteng iti Egipto, ti panagbalin a dara ti Karayan Nilo, ket resulta ti nalabaga a daga a nayanud iti Nilo agraman ti nalabaga nga organismo a naawagan iti flagellate. Ngem kuna ti salaysay ti Biblia a ti karayan nagbalin a dara, saan a nalabaga a pitak. No sukimatem a naimbag ti Exodo 7:14-21 makitam a napasamak daytoy a milagro idi imbilin ni Moises nga iyablat ni Aaron ti sarukodna iti Karayan Nilo. Uray no gagangay ti panagbaliw ti langa ti karayan, ti tiempo a panagbalbaliwna ket napasamak idi inyablat ni Aaron ti sarukodna iti karayan!

Ti sabali pay a pagarigan a napateg ti tiempo a pannakapasamak ti milagro ket idi dandanin sumrek dagiti Israelita iti Naikari a Daga. Nabangenan ti dalanda gapu ta adalem ti Karayan Jordan. Kastoy ti kuna ti Biblia: “Iti kanito a dagiti agaw-awit iti Lakasa dimtengda agingga iti Jordan ket ti saksaka ti papadi a mangaw-awit iti Lakasa naitapogda iti igid ti dandanum . . . , idin nangrugi nga agintek ti dandanum a sumalsalog manipud surong. Timmakderda a kas maysa a puttot iti adayo unay idiay Adan.” (Josue 3:15, 16) Gapuanan kadi dayta ti ginggined wenno panagreggaay ti daga? Awan ti ibaga ti Biblia. Ngem milagro a napasamak dayta. Apag-isu a napasamak dayta iti tiempo nga imbaga ni Jehova.​—Josue 3:7, 8, 13.

No kasta, agpayso kadi nga adda dagiti milagro? Kuna ti Biblia nga adda, ken saan a basta gagangay a pasamak dagita. Ngarud, makuna kadi nga imposible dagita gapu ta saan met nga inaldaw a mapaspasamak?

[Footnote]

[Ladawan iti panid 5]

Sumagmamano laeng a tawen ti napalabas, adu ti mangipagarup nga imposible a makatayab ti tao iti ginasut a kilometro iti kada oras babaen ti eroplano